मूर्तिजापूर: आपले संपूर्ण जीवन राष्ट्रसेवा, समाजप्रबोधन, ग्रामविकास आणि सामाजिक समतेसाठी समर्पित करणारे महान क्रांतिकारक संत राष्ट्रसंत वंदनीय तुकडोजी महाराज यांना मरणोत्तर ‘भारतरत्न’ हा देशातील सर्वोच्च नागरी सन्मान प्रदान करण्यात यावा, अशी जोरदार मागणी श्री गुरुदेव सेवा मंडळ, मूर्तिजापूर तालुका समितीच्या वतीने करण्यात आली आहे. यासंदर्भातील मागणीचे निवेदन भारताच्या माननीय राष्ट्रपती महोदयांना उद्देशून मूर्तिजापूर मतदारसंघाचे आमदार श्री. हरीशभाऊ पिंपळे तसेच उपविभागीय अधिकारी (SDO), मूर्तिजापूर यांच्यामार्फत अधिकृतरीत्या सादर करण्यात आले.

राष्ट्रसंत तुकडोजी महाराजांनी स्वातंत्र्यपूर्व काळापासूनच ग्रामविकास आणि समाज उभारणीसाठी व्यापक चळवळ उभी केली. त्यांनी लिहिलेल्या अजरामर ‘ग्रामगीता’ या ग्रंथातून स्वावलंबी, स्वच्छ, सुसंस्कृत, व्यसनमुक्त आणि आदर्श ग्रामजीवनाचा विचार त्यांनी जगासमोर मांडला. अंधश्रद्धा निर्मूलन, व्यसनाधीनता निर्मूलन, सामाजिक विषमता आणि अनिष्ट रुढी-परंपरांविरुद्ध त्यांनी आयुष्यभर प्रभावी जनजागृती केली. त्यांचे विचार आणि कार्य आजही राष्ट्र उभारणीसाठी अत्यंत प्रेरणादायी व मार्गदर्शक ठरत आहेत.

तुकडोजी महाराजांचे हे अतुलनीय राष्ट्रकार्य, समाजसेवा आणि ग्रामविकासातील ऐतिहासिक योगदान लक्षात घेता, त्यांना मरणोत्तर ‘भारतरत्न’ पुरस्काराने सन्मानित करणे हीच त्यांच्या कार्याला खरी राष्ट्रीय मानवंदना ठरेल, असा आग्रह निवेदनाद्वारे व्यक्त करण्यात आला आहे.

या संपूर्ण उपक्रमात आणि निवेदन सादरीकरणाच्या वेळी मान्यवर समाजसेवक विष्णू लोडम यांची विशेष आणि उल्लेखनीय उपस्थिती राहिली. राष्ट्रसंतांचे विचार समाजातील तळागाळातील घटकांपर्यंत पोहोचवण्यासाठी आणि जनसामान्यांच्या प्रश्नांना सातत्याने वाचा फोडण्यासाठी विष्णू लोडम हे नेहमीच अग्रेसर असतात.

त्यांच्या या निस्वार्थी समाजकार्यामुळे आणि सामाजिक बांधिलकीमुळे स्थानिक नागरिकांमध्ये आणि सर्वसामान्य जनतेत त्यांची अतिशय स्वच्छ, आदरयुक्त आणि विश्वासार्ह प्रतिमा निर्माण झाली आहे. राष्ट्रसंतांना सर्वोच्च सन्मान मिळवून देण्यासाठी त्यांनी घेतलेला हा पुढाकार त्यांच्या उच्च सामाजिक मूल्यांचे आणि जनसेवेचे प्रतीक मानला जात आहे.

निवेदन सादर करतेवेळी श्री. सुधीर दुबे तसेच ज्येष्ठ समाजसेवक श्री. राजकुमार नाचणे प्रामुख्याने उपस्थित होते. याप्रसंगी तालुका समितीचे अध्यक्ष बबनराव देशमुख, उपाध्यक्ष उत्तमराव पिंजरकर, सचिव दादाराव ढोक, समाजसेवक विष्णू लोडम, निळकंठराव गिऱ्हे, ज्ञानेश्वर वानखडे, गोवर्धन पाथरे, गजानन सोनेकर, जानराव मुळे, प्रेमभैया कैथवास, नानाभाऊ मेहर, नारायण धामणे, दयाराम मोरे, राजू गवळी, सुरेश सावरकर, दीपक घाटे, गजानन घाटे, नितीन गावंडे, विलास वानखडे, किशोर गाडगे, गिरधर बोंडे, रूपराव मेहर, दशरथ दिवनाले, विजय गावंडे, जगदीश जोगडे, बंडूभाऊ सांगळूदकर, लक्ष्मण बावणे, गजानन सावरे, मनोहर झडगे, रवींद्रबापू देशमुख, श्रावण तिवस्कर यांसह श्री गुरुदेव सेवा मंडळाचे अनेक ज्येष्ठ कार्यकर्ते, पदाधिकारी आणि नागरिक मोठ्या संख्येने उपस्थित होते.

केंद्र शासनाने या रास्त व ऐतिहासिक मागणीचा सकारात्मक विचार करून राष्ट्रसंतांना ‘भारतरत्न’ जाहीर करावा, अशी अपेक्षा सर्व उपस्थितांनी व्यक्त केली.