आज सकाळी ठरलेल्या दौऱ्यानुसार राज ठाकरे यांनी कर्जत तालुक्यातील साईडोंगर आणि भीमाशंकर परिसरातील ज्या भागात टोरेंट हायड्रो-इलेक्ट्रिक प्रकल्पासाठी वृक्षतोड सुरू आहे, त्याठिकाणी प्रत्यक्ष भेट दिली.

या प्रकल्पासाठी तब्बल ३२,४८० हून अधिक झाडे तोडली जात असून, प्रत्यक्षात २,०७५ हून अधिक जुनी व औषधी झाडे कापली गेल्याचे पाहणीदरम्यान स्पष्ट झाले.  या प्रकल्पांमुळे विस्थापित होणारे स्थानिक आदिवासी आणि ग्रामस्थ मोठ्या संख्येने उपस्थित होते. त्यांनी आपल्या शेकडो वर्षांच्या जुन्या वस्त्या, देवराई आणि पर्यावरणाचे होणारे नुकसान राज ठाकरेंसमोर मांडले. स्थानिकांचे गाऱ्हाणे ऐकून घेतल्यानंतर राज ठाकरेंनी प्रशासकीय अधिकार्‍यांचीही कानउघाडणी केली.

सकाळच्या स्थळपाहणीनंतर सायंकाळी ५ वाजता कर्जत येथील पोलीस ग्राउंडवर राज ठाकरे यांची जाहीर सभा पार पडत आहे. या सभेत ते नेमके काय बोलणार आणि सरकारला कोणता अल्टिमेटम देणार, याकडे संपूर्ण महाराष्ट्राचे लक्ष लागले आहे. सभेमध्ये खालील प्रमुख मुद्द्यांवर प्रखर भाष्य होण्याची शक्यता आहे:

 ग्रामपंचायतींचा किंवा स्थानिकांचा कोणताही विरोध असताना किंवा ठराव नसताना हा प्रकल्प लादल्याबद्दल राज्य सरकारवर कडक टीका.  गुजरातच्या कंपनीच्या फायद्यासाठी महाराष्ट्रातील पर्यावरणाचा घात केला जात असल्याचा गंभीर आरोप. वृक्षतोड तात्काळ थांबवली नाही, तर मनसे संपूर्ण महाराष्ट्रात तीव्र आंदोलन उभा करेल, असा इशारा या सभेत दिला जाण्याची दाट शक्यता आहे. राज ठाकरे यांच्या या दौऱ्यामुळे रायगडमधील राजकारण तापले असून, सत्तेतील नेत्यांचे धाबे दणाणले आहेत.