संघर्षातून साकारलेली भक्ती: पिंपरी-चिंचवड मनपाकडून कोविड योद्धा महिला बचत गटाच्या ‘शबनम बॅग’ची वारकऱ्यांना अनोखी भेट!
उमेद जागर उपक्रमांतर्गत विधवा महिलांना रोजगार, आता त्यांच्या श्रद्धेचाही सन्मान; आयुक्त शेखर सिंह यांच्या संकल्पनेतून ‘ज्ञानोबा-तुकाराम’ गजरात ‘आत्मनिर्भरते’चा संदेश!
पिंपरी, २१ जून २०२५ (मॅक्स मंथन डेली न्यूज): जगद्गुरू संत तुकाराम महाराज आणि संतश्रेष्ठ संत ज्ञानेश्वर महाराज यांच्या पालखी सोहळ्यामध्ये सहभागी झालेल्या वारकऱ्यांचा दरवर्षी पिंपरी चिंचवड महापालिकेकडून सन्मान केला जातो. मात्र, यावर्षीचा सन्मान केवळ वारकऱ्यांपुरता मर्यादित न राहता, तो कोरोना महामारीच्या काळात संघर्ष करून उभ्या राहिलेल्या महिलांच्या निःस्वार्थ भक्तीचा आणि आत्मविश्वासाचा सन्मान ठरला आहे. पिंपरी चिंचवड महापालिकेने यंदा वारकऱ्यांना कोविड योद्धा महिला बचत गटातर्फे तयार केलेल्या खास ‘शबनम बॅग’ (कापडी पिशवी – मांजरपाट) भेट दिल्या आहेत.
‘ज्ञानोबा माऊली तुकाराम’ गजरात ‘आत्मनिर्भरते’चा संदेश
पिंपरी चिंचवड शहरामध्ये १९ जून रोजी जगद्गुरू संत तुकाराम महाराज यांच्या पालखीचे, तर २० जून रोजी संतश्रेष्ठ संत ज्ञानेश्वर महाराज यांच्या पालखीचे आगमन झाले. यावेळी महापालिकेच्या वतीने या दोन्ही पालख्यांचे स्वागत करताना वारकऱ्यांचा सन्मान कोविड योद्धा महिला बचत गटातर्फे बनवलेल्या सुंदर शबनम बॅग देऊन करण्यात आला. ‘ज्ञानोबा माऊली तुकाराम…’ असा गजर करीत पंढरपूरकडे निघालेल्या वारकऱ्यांच्या खांद्यावर दिसणारी ही शबनम बॅग स्वतःचं दुःख विसरून श्रद्धेने सेवेसाठी उभे राहण्याचा एकप्रकारे संदेशच देत होती.
‘उमेद जागर’: संघर्षातून सक्षमीकरणाकडे
कोरोना महामारीमध्ये विधवा झालेल्या महिलांना रोजगार उपलब्ध करून देण्यासाठी, तसेच त्यांच्या आर्थिक सक्षमीकरणासाठी आयुक्त शेखर सिंह यांच्या मार्गदर्शनाखाली महापालिकेने ‘उमेद जागर’ उपक्रमांतर्गत थेरगाव येथे एक विशेष शिलाई केंद्र सुरू केले आहे. या शिलाई केंद्रात महिलांना शिवणकामाचे प्रशिक्षण देण्यात आले आहे. याच केंद्रात गेल्या दोन वर्षांपासून महिला वारकऱ्यांसाठी कापडी पिशव्या तयार करत आहेत. या वर्षी वारकऱ्यांना वाटण्यासाठी तब्बल २ हजार शबनम बॅग या महिलांनी मोठ्या मेहनतीने तयार केल्या होत्या.
महापालिकेच्या समाज विकास विभागाच्या उपायुक्त ममता शिंदे यांच्या मार्गदर्शनाखाली या संपूर्ण उपक्रमाची अंमलबजावणी यशस्वीपणे झाली. तसेच, सहाय्यक समाजविकास अधिकारी संतोषी चौरगे, समूह संघटक वैशाली खरात, विशाल शेडगे, संगीता इंद्राक्षे, रेश्मा पाटील, अनिकेत सातपुते, प्रदीप गायकवाड यांच्या मार्गदर्शनाखाली थेरगाव शिलाई केंद्रातील स्मिता अंकुशे, मंगल लोंढे, सीमा चौधरी, सविता शिंदे, सत्यभामा उदमले, मीना चौधरी, कविता साबळे, हिरा कांबळे, राणी शेट्टी, सारिका सूर्यवंशी, मंगल कांबळे या बचत गट सदस्यांनी या शबनम बॅगचे शिवणकाम केले.
‘महिला सक्षमीकरण आणि भक्तीचा अनोखा संगम’ – आयुक्त शेखर सिंह
या अनोख्या उपक्रमाविषयी बोलताना पिंपरी चिंचवड महापालिकेचे आयुक्त तथा प्रशासक शेखर सिंह म्हणाले, “महिला सक्षमीकरणासाठी महापालिकेतर्फे विविध उपक्रम राबवले जातात. ‘उमेद जागर’ उपक्रमांतर्गत कोविड योद्धा बचत गटातील महिलांना याद्वारे व्यवसायाची संधी मिळाली असून, त्यांचा आत्मविश्वास वाढला आहे. वारकऱ्यांना वाटण्यासाठी त्यांनी शबनम बॅग तयार केल्यामुळे या महिलांनी भक्तीचा एक वेगळाच अर्थ स्वतःच्या कृतीतून मांडला आहे.”
उपायुक्त, समाज विकास विभाग ममता शिंदे यांनीही या उपक्रमाचे कौतुक केले. “कोविड योद्धा बचत गटातील महिलांना ‘उमेद जागर’ उपक्रमांतर्गत व्यवसायाची संधी उपलब्ध करून त्यांचे मनोधैर्य वाढवण्याचा महानगरपालिकेचा प्रयत्न आहे. या बचत गटातील महिलांनी तयार केलेली शबनम बॅग वारकऱ्यांना वितरित केल्यामुळे एकप्रकारे हा बचत गटातील महिलांच्या कामाचा सन्मान ठरला आहे.”
बचत गट सदस्या मंगल लोंढे यांनी आपला अनुभव व्यक्त करताना सांगितले, “पिंपरी चिंचवड महापालिकेने आम्हाला शिलाई प्रशिक्षण देऊन शिलाई युनिट उभे करून दिले आहे. आर्थिक सक्षम होण्यास यामुळे मदत झाली असून, आत्मविश्वास वाढला आहे. आम्ही तयार केलेल्या शबनम बॅग देऊन वारकऱ्यांचा सन्मान केल्याचा खूप आनंद आहे.”
आणखी एक सदस्य सविता शिंदे म्हणाल्या, “महापालिका प्रशासनाने आम्हाला वारकऱ्यांसाठी शबनम बॅग शिवून देण्याची ऑर्डर देऊन भाविकांच्या रूपात विठुरायाची सेवा करण्याची संधी दिली. यामुळे सामाजिक बांधिलकी जपता आली आहे.”
या उपक्रमामुळे महिला सक्षमीकरण आणि वारीतील सेवेचा अनोखा संगम साधला गेला असून, या महिलांच्या कार्याचे आणि महापालिकेच्या दूरदृष्टीचे सर्वत्र कौतुक होत आहे.
© २०२५ मॅक्स मंथन डेली न्यूज. सर्व हक्क राखीव.
