पिंपरी-चिंचवडचा प्रारूप विकास आराखडा वादळी ठरला!

‘जनविरोधी’ धोरणांविरोधात राष्ट्रवादी काँग्रेसचा महापालिकेवर एल्गार; गुरुवारी विराट महामोर्चाचे आयोजन

पिंपरी, दि. ५ ऑगस्ट २०२५: पिंपरी-चिंचवड शहराच्या भविष्याची दिशा ठरवणारा प्रारूप सुधारित विकास आराखडा २०२५ सध्या वादळाच्या केंद्रस्थानी आहे. महापालिकेने सादर केलेला हा आराखडा केवळ कागदावरचा देखावा असून, तो शहरातील लाखो नागरिकांच्या आशा-आकांक्षांना आणि विकासाच्या वास्तवाला पूर्णपणे विसंगत आहे, अशी संतप्त भूमिका राष्ट्रवादी काँग्रेसने घेतली आहे. या आराखड्यातील गंभीर त्रुटी, बेकायदेशीर बाबी आणि जनविरोधी धोरणांविरोधात आवाज उठवण्यासाठी राष्ट्रवादी काँग्रेसने गुरुवार, दि. ७ ऑगस्ट २०२५ रोजी महापालिका भवनावर महामोर्चाचे आयोजन केले आहे.

५०,००० हरकती; आराखडा अपयशी ठरल्याची पावती

या आराखड्याला जनतेचा किती तीव्र विरोध आहे, याची प्रचिती तब्बल ५०,००० हरकतींवरून येते. भूमिपुत्र, शेतकरी, छोटे उद्योजक आणि सामान्य नागरिकांच्या अपेक्षा पूर्ण करण्यास हा आराखडा सपशेल अपयशी ठरला आहे. हा आराखडा केवळ जुन्या चुकांची पुनरावृत्ती करत आहे, असे राष्ट्रवादी काँग्रेसचे म्हणणे आहे.

• जुन्या आरक्षणांची पुनरावृत्ती: जुन्या आराखड्यातील एकूण १,४३० पैकी ८०० हून अधिक आरक्षणे कोणतीही फेरबदल न करता तशीच ठेवण्यात आली आहेत.
• अविकसित आरक्षणे: केवळ २०.८% आरक्षित जागांचा विकास झाला असून, १,१०० हून अधिक जागा अविकसित राहिल्या आहेत. यामुळे सार्वजनिक सुविधा केवळ कागदावरच राहिल्या आहेत.

आराखड्यावर राष्ट्रवादी काँग्रेसचे गंभीर आक्षेप

राष्ट्रवादी काँग्रेसने पत्रकार परिषदेत आराखड्यातील अनेक गंभीर त्रुटींवर बोट ठेवले:

• ‘भीमसृष्टी’वरील आरक्षण: भारतरत्न डॉ. बाबासाहेब आंबेडकर यांच्या पुतळ्यामागील ऐतिहासिक ‘भीमसृष्टी मैदान’वर पोलीस स्टेशन आणि बस टर्मिनसचे आरक्षण प्रस्तावित करणे हा आंबेडकरी अनुयायी आणि नागरिकांच्या भावनांवर केलेला हल्ला आहे.
• ऐतिहासिक स्थळांना धोका: चिंचवड गावातील ऐतिहासिक चाफेकर स्मारकाच्या जागेवर इतर आरक्षणे टाकण्यात आली आहेत, ज्यामुळे या स्थळाला धोका निर्माण झाला आहे.
• बेकायदेशीर आरक्षणे: रेडझोन, पवना, इंद्रायणी आणि मुळा नदीच्या पूररेषांमधील क्षेत्रात तसेच घनकचरा प्रकल्पाच्या बफर झोनमध्ये शाळा, रुग्णालये यांसारखी बांधकामे प्रस्तावित केली आहेत, जे अनेक कायद्यांचे उल्लंघन आहे.
• पूररेषेतील घोटाळा: काही विशिष्ट जमीन मालकांना फायदा देण्यासाठी पूररेषांची आखणी हेतुपुरस्सर बदलण्यात आल्याचा आरोपही करण्यात आला आहे.
• HCMTR कागदावरच: गेल्या ३५ वर्षांपासून केवळ कागदावर असलेल्या ‘हाय कपॅसिटी मास ट्रान्झिट रोड’ (HCMTR) चा प्रस्ताव आजही तसाच ठेवला आहे.
• घरांवर आरक्षणे: अनेक ठिकाणी नव्याने अस्तित्वात असलेल्या अधिकृत घरांवर आरक्षणे प्रस्तावित केली आहेत, ज्यामुळे वैध बांधकामे धोक्यात आली आहेत.

• पिंपरी कँम्प `गावठाण` मागणीकडे दुर्लक्ष –*
  पिंपरी कॅम्प हा मूळतः निर्वासितांच्या छावणीचा १०-१२ फूट रुंद आणि ४०-५० फूट लांब असलेल्या जमिनींवर दाट लोकवस्तीने विकसित झालेला परिसर आहे. या भागाला ‘कँजस्टीड एरिया’ म्हणजेच ‘गर्दी’ ‘गावठाण’ क्षेत्र म्हणून घोषित करण्याची दीर्घकाळापासूनची मागणी आणि महानगरपालिकेतील ठरावही दुर्लक्षित करण्यात आला आहे. यामुळे या परिसराच्या ऐतिहासिक आणि सामाजिक संरचनेचे जतन होण्यास अडथळा निर्माण झाला आहे.

महामोर्चाचे आवाहन

राष्ट्रवादी काँग्रेसचे शहराध्यक्ष योगेश बहल यांनी या पत्रकार परिषदेत सांगितले की, हा जनविरोधी आराखडा तातडीने रद्द करण्यात यावा. त्यांनी पिंपरी-चिंचवडच्या सर्व नागरिकांना आपल्या हक्कांसाठी आणि शहराच्या उज्ज्वल भविष्यासाठी महामोर्चात सहभागी होण्याचे आवाहन केले आहे.

मोर्चाचे तपशील:

• दिवस व दिनांक: गुरुवार, ७ ऑगस्ट २०२५
• वेळ: सकाळी १०.३० वाजता
• स्थळ: शगुन चौक, पिंपरी येथून पुणे-मुंबई महामार्गाने महापालिका भवनावर मोर्चा धडकणार आहे.

सदर पत्रकार परिषदेस शहराध्यक्ष योगेश बहल, मा.नगरसेवक अजित गव्हाणे, मा.विरोधी पक्षनेते विठ्ठल उर्फ नाना काटे, महिला अध्यक्ष कविता आल्हाट, माजी नगरसेवक भाऊसाहेब भोईर, राहुल भोसले, मयूर कलाटे, कार्याध्यक्ष शाम लांडे, फजल शेख, पंकज भालेकर,प्रभाकर वाघेरे, माजी नगरसेविका माया बारणे, प्रकाश सोमवंशी, सतीश दरेकर,जगन्नाथ साबळे, मायाला खत्री,संजय उदावंत, रवींद्र ओव्हाळ, अक्षय माच्छरे आदी पदाधिकारी उपस्थित होते.

© 2025 मॅक्स मंथन डेली न्यूज. सर्व हक्क राखीव.