पिंपरी-चिंचवडमध्ये वृक्ष छाटणीच्या नावाखाली नियमांचे उल्लंघन?

उद्योगनगरीतील झाडांची परवानगी असुनही अतिरिक्त पद्धतीने अवैध कत्तल; कर्मचारी-ठेकेदार यांच्या लागेबांध्यांचा आरोप

२५ ऑगस्ट २०२५, मॅक्स मंथन डेली न्यूज:

पिंपरी – पिंपरी-चिंचवड शहराच्या उद्यान विभागावर पुन्हा एकदा नियमांचे उल्लंघन करून बेकायदेशीर वृक्ष छाटणीला परवानगी दिल्याचा गंभीर आरोप करण्यात आला आहे. महानगरपालिकेचे कर्मचारी आणि ठेकेदार यांच्या संगनमताने हे प्रकार वारंवार घडत असून, यामुळे शहराच्या हरित प्रतिमेला धक्का बसत आहे. संतप्त नागरिकांनी या प्रकाराची तातडीने चौकशी करून दोषींवर कायदेशीर कारवाई करण्याची मागणी केली असून, अन्यथा जनआंदोलन छेडण्याचा इशारा दिला आहे.

औद्योगिक नगरीची हिरवी ओळख धोक्यात

पिंपरी-चिंचवड शहराची एकेकाळी औद्योगिक नगरी म्हणून ओळख होती, त्याचे एक महत्त्वाचे कारण म्हणजे एमआयडीसी भागांमध्ये असलेली मोठ्या प्रमाणात झाडे. मात्र, आता काही कंपन्या बांधकाम करण्यासाठी झाडे तोडण्याचा हट्ट धरत आहेत. याच प्रयत्नांना उद्यान विभागातील कर्मचारी आणि ठेकेदार यांच्या संगनमताने पाठबळ मिळत असल्याचा आरोप नागरिक करत आहेत.

सेमित्सु फॅक्टरी ऑटोमेशन प्रायव्हेट लिमिटेड, एच ब्लॉक, एमआयडीसी पिंपरी येथे अशाच एका प्रकरणाची तक्रार समोर आली आहे. कंपनीने वृक्ष छाटणीसाठी अर्ज केला होता, त्यावर उद्यान विभागाने पाहणी अहवाल सादर करत काही अटी घालून परवानगी दिली.

अधिकृत कागदपत्रांमध्येच संशय

उद्यान विभागाने दिलेल्या परवानगीनुसार, कंपनीला धोकादायक फांद्यांची छाटणी करण्याची आणि काही झाडांची उंची जमिनीपासून १५ फुटांपर्यंत कमी करण्याची परवानगी देण्यात आली. यामध्ये ५ अशोक, २ निलगिरी, १ सुबाभूळ, २ आंबा आणि १ जांभूळ अशा एकूण ११ वृक्षांचा समावेश होता.

मात्र, या कागदपत्रांमध्ये ‘वृक्ष काढण्यास’ परवानगी देण्यात आल्याचा उल्लेख आहे, जो केवळ छाटणीच्या मागणीपेक्षा अधिक गंभीर आहे. यामुळे नियमांचे उल्लंघन झाले असल्याचा आणि अधिकाराचा गैरवापर झाल्याचा संशय व्यक्त केला जात आहे.

या सर्व प्रकाराची कायदेशीर चौकशी करण्याची जबाबदारी उद्यान विभागाचे प्रमुख म्हणून आयुक्त शेखर सिंह यांची आहे. नागरिकांनी आयुक्तांना लवकरात लवकर लक्ष घालून, या गैरप्रकाराला आळा घालण्याची मागणी केली आहे, जेणेकरून शहराची हिरवी ओळख जपली जाईल.

© 2025 मॅक्स मंथन डेली न्यूज. सर्व हक्क राखीव.