ओबीसी विद्यार्थ्यांसाठी ‘आधार’ आणि ‘स्वयंम’ योजनांचा लाभ घेण्याचे आवाहन!
शासकीय वसतिगृहातील प्रवेशासाठी २९ सप्टेंबरपर्यंत मुदत; अधिक माहितीसाठी संपर्क साधा
अमरावती, प्रतिनिधी अविनाश वानखेडे, 24 सप्टेंबर २०२५, मॅक्स मंथन डेली न्यूज:
राज्यातील इतर मागास वर्ग, विमुक्त जाती, भटक्या जमाती आणि विशेष मागास प्रवर्गातील (VJNT, OBC, SBC) विद्यार्थ्यांसाठी ‘ज्ञानज्योती सावित्रीबाई फुले आधार योजना’ आणि ‘पंडित दीनदयाल उपाध्याय स्वयंम योजना’ सुरू करण्यात आल्या आहेत. शासकीय वसतिगृहात प्रवेशापासून वंचित राहिलेल्या पात्र विद्यार्थ्यांना या दोन्ही योजनांचा लाभ घेता येणार असून, त्यासाठी अर्ज सादर करण्याची अंतिम मुदत २९ सप्टेंबर आहे.
बारावीनंतरच्या विद्यार्थ्यांसाठी योजना
शैक्षणिक वर्ष २०२५-२६ पासून सुरू झालेल्या या दोन्ही योजना बारावीनंतरच्या बिगर व्यावसायिक आणि व्यावसायिक अभ्यासक्रमांच्या प्रथम वर्षात प्रवेश घेतलेल्या विद्यार्थ्यांसाठी आहेत. इच्छुक विद्यार्थ्यांनी hmas.mahait.org या संकेतस्थळावर आपला अर्ज ऑनलाइन सादर करावा, असे आवाहन करण्यात आले आहे.
अर्ज स्वीकारण्याची प्रक्रिया आणि महत्त्वाच्या तारखा:
- अर्जांची मुदत: १९ सप्टेंबर ते २९ सप्टेंबर
- अर्जांची छाननी: ३० सप्टेंबर ते ५ ऑक्टोबर
- पहिली निवड यादी: ६ ऑक्टोबर
- प्रवेशाची अंतिम मुदत: १६ ऑक्टोबर
- दुसरी यादी: १७ ऑक्टोबर ते ३१ ऑक्टोबर
अर्जासाठी संपर्क
अर्जाच्या अधिक माहितीसाठी, विद्यार्थ्यांनी इतर मागास बहुजन कल्याण विभागाचे सहायक संचालक गजेंद्र मालठाणे यांच्याशी संपर्क साधावा. कार्यालयाचा पत्ता सामाजिक न्याय भवन, पोलीस आयुक्तालयाच्या मागे, चांदूर रेल्वे रोड, अमरावती असा असून, ईमेल आयडी dobbwoamravati@gmail.com आहे.
अर्ज सादर करण्याचे ठिकाण:
- मुले: इतर मागास बहुजन कल्याण मुलांचे शासकीय वसतिगृह, अग्रवाल टॉवर, जाफरीन प्लॉट, आदर्श हॉटेल जवळ, कॉटन मार्केट रोड, अमरावती.
- मुली: इतर मागास बहुजन कल्याण मुलींचे शासकीय वसतिगृह, ब्लॉक A, राम लक्ष्मण संकुल, तिसरा मजला, रामपूरी कॅम्प जवळ, विलास नगर चौक, अमरावती.
© 2025 मॅक्स मंथन डेली न्यूज. सर्व हक्क राखीव.
