मेट्रोच्या कामावर तक्रारींचा पाऊस; राष्ट्रवादी काँग्रेसकडून मेट्रो एमडींना निवेदन

पिंपरीतील खड्डे, अर्धवट कामे आणि अपुऱ्या सुविधांवर लक्ष वेधले; तातडीने निराकरणाचे आश्वासन

पिंपरी चिंचवड प्रतिनिधी बालाजी नवले, २५ सप्टेंबर २०२५, मॅक्स मंथन डेली न्यूज:

पुणे महामेट्रोचे व्यवस्थापकीय संचालक श्रावण हर्डीकर यांच्यासमोर राष्ट्रवादी काँग्रेस पार्टीच्या (अजितदादा पवार गट) पिंपरी-चिंचवड शहर जिल्हा उपाध्यक्ष प्रदीप गायकवाड यांनी मेट्रोच्या कामासंदर्भात विविध तक्रारींचा पाढा वाचला. मेट्रोने निर्माण केलेल्या पायाभूत असुविधा आणि अर्धवट कामांमुळे नागरिकांना होत असलेल्या त्रासाकडे त्यांनी हर्डीकर यांचे लक्ष वेधले.

तक्रारींचे प्रमुख मुद्दे

गायकवाड यांनी दिलेल्या निवेदनात अनेक महत्त्वाचे मुद्दे उपस्थित केले, त्यात प्रामुख्याने खालील बाबींचा समावेश होता:

• वल्लभनगर स्थानक: माजी मुख्यमंत्री कै. यशवंतराव चव्हाण यांच्या पुतळ्यासमोर वल्लभनगर स्थानकाजवळ लोखंडी प्रवेशद्वार, सीसीटीव्ही कॅमेरे आणि कोनशिला बसवावी. तसेच, यशवंतराव यांच्या कारकिर्दीतील घटनांचे शिल्प (म्युरल्स) बसविण्याची मागणीही केली.
• दुभाजकातील माती: मेट्रोच्या दोन खांबांमधील दुभाजकांमध्ये मुरूममिश्रित मातीचा वापर केला असून, त्याऐवजी झाडे लावण्यासाठी योग्य अशी पोयटा माती टाकण्याची मागणी करण्यात आली.
• सेवा रस्त्यावरील खड्डे: निगडी ते चिंचवडदरम्यानच्या मेट्रो सेवा रस्त्यावर मोठ्या प्रमाणावर खड्डे पडले आहेत. यामुळे वाहनचालकांना कसरत करावी लागत असून, लहान-मोठे अपघात सातत्याने घडत आहेत. हे खड्डे तातडीने बुजवण्याची मागणी करण्यात आली.

या सर्व समस्यांचे तातडीने निराकरण करण्याचे आश्वासन मेट्रोचे व्यवस्थापकीय संचालक श्रावण हर्डीकर यांनी दिले आहे.

© 2025 मॅक्स मंथन डेली न्यूज. सर्व हक्क राखीव.