प्रवाशांना दिवाळीपूर्वी मोठा दिलासा! एसटीची हंगामी भाडेवाढ रद्द
उपमुख्यमंत्री एकनाथ शिंदे यांच्या सूचनेनंतर परिवहन मंत्री प्रताप सरनाईक यांचा निर्णय; पूरस्थिती आणि जनभावनेचा आदर करत दरवाढ तत्काळ मागे.
मुंबई, मूर्तीजापूर, प्रतिनिधी : विलास सावळे, दि. ऑक्टोबर , मॅक्स मंथन डेली न्यूज:
दिवाळी सणाच्या तोंडावर गावी जाणाऱ्या एसटी प्रवाशांसाठी एक अत्यंत मोठी आणि दिलासा देणारी बातमी आहे. महाराष्ट्र राज्य मार्ग परिवहन महामंडळाने (MSRTC) ऑक्टोबर ते नोव्हेंबर या काळात प्रस्तावित केलेली टक्के हंगामी भाडेवाढ रद्द करण्याचा महत्त्वपूर्ण निर्णय घेतला आहे.
उपमुख्यमंत्री एकनाथ शिंदे यांच्या निर्देशानंतर परिवहन मंत्री प्रताप सरनाईक यांनी ही दरवाढ रद्द करण्याची घोषणा केली. मंगळवारी ही भाडेवाढीची घोषणा झाली असताना, केवळ दुसऱ्याच दिवशी हा निर्णय मागे घेण्यात आला आहे.
पूरस्थितीमुळे उपमुख्यमंत्री एकनाथ शिंदे यांनी दिले निर्देश
एसटी महामंडळाने महसूल वाढीसाठी दिवाळीच्या काळात ही भाडेवाढ प्रस्तावित केली होती. मात्र, या निर्णयावर सर्वसामान्यांकडून तीव्र नाराजी व्यक्त होत होती. विशेषतः राज्यातील बळीराजा अतिवृष्टी आणि पूर परिस्थितीमुळे खचलेला असताना, सार्वजनिक वाहतुकीची दरवाढ सर्वसामान्य प्रवाशांना परवडणारी नव्हती.
या पार्श्वभूमीवर, उपमुख्यमंत्री एकनाथ शिंदे यांनी भाडेवाढ तत्काळ रद्द करण्याच्या सूचना परिवहन मंत्री प्रताप सरनाईक यांना दिल्या. त्यानुसार, सरनाईक यांनी ही भाडेवाढ रद्द करण्याचे आदेश एसटी प्रशासनाला दिले.
लाखोंच्या प्रवाशांना दिलासा
वातानुकूलित शिवनेरी आणि शिवाई बसेस वगळता सर्वच सामान्य बसेससाठी ही दरवाढ लागू होणार होती. ही दरवाढ रद्द झाल्यामुळे गावखेड्यापासून ते लांब पल्ल्याच्या गाड्यांनी प्रवास करणाऱ्या लाखोंच्या घरात असलेल्या एसटी प्रवाशांना मोठा दिलासा मिळाला आहे.
एसटीचा प्रवास सुरक्षित मानला जात असल्याने आजही दिवाळीसारख्या सणाच्या काळात मोठ्या संख्येने नागरिक एसटी बसने प्रवास करतात. त्यामुळे हा निर्णय प्रवाशांच्या दृष्टीने अत्यंत महत्त्वपूर्ण ठरला आहे.
© मॅक्स मंथन डेली न्यूज. सर्व हक्क राखीव.
