सोलापूरच्या विकासासाठी निधी समान वाटावा: खासदार प्रणिती शिंदेंची पालकमंत्री जयकुमार गोरे यांच्याकडे मागणी!
‘निधी वाटपात पक्षीय भेदभाव नको, अन्यथा जनतेवर अन्याय ठरेल’, खासदारांचा थेट इशारा; पालकमंत्र्यांकडून निधी वाटपात पारदर्शकतेची ग्वाही
सोलापूर, प्रतिनिधी :- पंडित गवळी, दिनांक ११ ऑक्टोबर, २०२५, मॅक्स मंथन डेली न्यूज:
सोलापूर लोकसभा मतदारसंघाच्या खासदार प्रणिती शिंदे यांनी आज सोलापूरचे पालकमंत्री जयकुमार गोरे यांची भेट घेतली आणि जिल्ह्याच्या विकासासाठी अत्यंत महत्त्वाच्या असलेल्या (जिल्हा नियोजन समिती) निधीचे वाटप सर्व लोकप्रतिनिधींमध्ये समसमान आणि पारदर्शक पद्धतीने करण्याची मागणी केली. नियोजन भवन, सोलापूर येथे शिष्टमंडळासोबत ही महत्त्वपूर्ण बैठक पार पडली.
खासदार प्रणिती शिंदेंचा स्पष्ट इशारा
पालकमंत्री गोरे यांच्याकडे आपली भूमिका स्पष्ट करताना खासदार प्रणिती शिंदे म्हणाल्या, “जिल्हा नियोजन समितीच्या निधी वाटपात कोणत्याही प्रकारची अनियमितता किंवा पक्षीय भेदभाव होता कामा नये.” मागील काळात (राष्ट्रीय कृषी विकास योजना) निधीच्या वाटपात विरोधी पक्षाच्या लोकप्रतिनिधींना जाणूनबुजून डावलण्यात आले होते, तशी परिस्थिती च्या निधी वाटपात पुन्हा दिसू नये, असे त्यांनी ठामपणे सांगितले.
खासदार शिंदे यांनी हा मुद्दा जनतेच्या विकासाशी जोडत म्हटले की, “निधी न देणे हे आमच्यावर नव्हे, तर सोलापूरच्या जनतेवर अन्याय आहे. आपण सर्व लोकप्रतिनिधी आपापल्या मतदारसंघातील लोकांच्या विकासासाठी निधी मागतो. त्यामुळे निधी वाटपात पक्षीय भेदभाव झाल्यास तो सोलापूरच्या जनतेवर अन्याय ठरेल.”
यावेळी त्यांनी पालकमंत्र्यांना ही बाब संवेदनशीलतेने हाताळण्याचे आवाहन करत महानगरपालिका, जिल्हा परिषद आणि ग्रामपंचायत स्तरावरही समसमान निधी वाटप व्हावे, अशी मागणी लावून धरली.
पालकमंत्र्यांकडून आश्वासनाची ग्वाही
खासदार प्रणिती शिंदे आणि शिष्टमंडळाची मागणी ऐकून घेतल्यानंतर पालकमंत्री जयकुमार गोरे यांनी निधी वाटपाबाबत आपली भूमिका स्पष्ट केली. “ निधी वाटप करताना कुठलाही पक्षीय दूजाभाव होणार नाही. विरोधी पक्षाच्या लोकप्रतिनिधींनाही योग्य त्या प्रमाणात निधी दिला जाईल,” अशी ग्वाही त्यांनी दिली. तसेच, निधीच्या वितरणाची प्रक्रिया नियमितपणे सुरू असल्याचेही त्यांनी यावेळी स्पष्ट केले.
या महत्त्वपूर्ण बैठकीला सोलापूर शहर काँग्रेसचे अध्यक्ष चेतनभाऊ नरोटे, माजी महापौर संजय हेमगड्डी, आरिफ शेख, अलकाताई राठोड, प्रवीण निकाळजे यांच्यासह विनोद भोसले, परवीन इनामदार, अनुराधा काटकर, मनोज यलगुलवार, हणमंतू सायबोलू, सुशील बंदपट्टे, गणेश डोंगरे, प्रमिला तुपलवंडे, जुबेर कुरेशी, वाहिद बिजापूरे आदी मान्यवर मोठ्या संख्येने उपस्थित होते.
© मॅक्स मंथन डेली न्यूज. सर्व हक्क राखीव.
