डॉ. संपदा मुंडे आत्महत्या प्रकरण: दोषींवर कठोर कारवाईची मागणी; वंजारी समाजाचा पिंपरी-चिंचवड पोलिसांना इशारा!

एसआयटी चौकशी, आरोपींना फाशी आणि निगडीच्या वरिष्ठ पोलीस निरीक्षकांना तातडीने बडतर्फ करण्याची मागणी; उपमुख्यमंत्री आणि पोलीस आयुक्तांना निवेदन

फलटण, पिंपरी चिंचवड, प्रतिनिधी बालाजी नवले, दि. २८ ऑक्टोबर २०२५, मॅक्स मंथन डेली न्यूज:

फलटण (Phaltan) येथील डॉ. संपदा मुंडे यांच्या आत्महत्येच्या (Dr. Sampada Munde Suicide Case) घटनेने संपूर्ण महाराष्ट्रात खळबळ माजली आहे. या घटनेनंतर वंजारी समाज आक्रमक झाला असून, पिंपरी-चिंचवडमध्ये समाजाच्या विविध संघटनांनी एकत्र येत या प्रकरणाची एसआयटी (SIT) मार्फत सखोल चौकशी करण्याची आणि दोषींना कठोरात कठोर शिक्षा देण्याची मागणी केली आहे.

आज, २७ ऑक्टोबर रोजी पिंपरी-चिंचवड वंजारी सेवा संघ, जय गणेश सामाजिक संस्था, भगवान बाबा मित्र मंडळ, तसेच आम आदमी पार्टीच्या शिष्टमंडळाने या मागणीसंदर्भात महाराष्ट्राचे उपमुख्यमंत्री देवेंद्र फडणवीस तसेच पिंपरी-चिंचवड पोलीस आयुक्त यांना उद्देशून असलेले निवेदन पोलीस उपायुक्त शिवाजी पवार यांना सादर केले.

वंजारी समाजाच्या प्रतिनिधींनी निवेदनात म्हटले आहे की, डॉ. संपदा मुंडे यांनी पोलिसांकडून होणाऱ्या सततच्या त्रासाला कंटाळून आत्महत्या केली. आत्महत्येपूर्वी त्यांनी आपल्या हातावर संबंधित दोषी पोलीस अधिकाऱ्यांची नावे लिहिली होती.

याआधीही मृत डॉक्टरने या पोलीस अधिकाऱ्यांच्या त्रासाविरोधात लेखी तक्रार केली होती, परंतु संबंधित विभागीय अधिकाऱ्यांनी ती तक्रार दुर्लक्षित करून कोणतीही कारवाई केली नाही. त्यामुळे या आत्महत्येला जबाबदार असलेल्या दुर्लक्षित करणाऱ्या अधिकाऱ्यांवरही कारवाई व्हावी, अशी मागणी शिष्टमंडळाने केली आहे.

शिष्टमंडळाने पोलीस उपायुक्तांना केलेल्या प्रमुख मागण्यांमध्ये खालील बाबींचा समावेश आहे:

• डॉ. मुंडे यांनी हातावर लिहिलेल्या नावांच्या आधारे संबंधित सर्व पोलीस अधिकारी व कर्मचाऱ्यांवर फौजदारी गुन्हे दाखल करावेत.
• सर्व दोषी पोलीस अधिकारी व कर्मचाऱ्यांवर तत्काळ सेवेतून बडतर्फीची कारवाई करावी.
• हा खटला अतिजलद न्यायालयात (Fast Track Court) चालवून दोषींना फाशीची शिक्षा द्यावी.

यावेळी समाज नेत्यांनी कठोर इशारा दिला की — “जर दोषींवर तात्काळ आणि कठोर कारवाई झाली नाही, किंवा त्यांना पाठीशी घालण्याचा प्रयत्न झाला, तर वंजारी समाज रस्त्यावर उतरून आंदोलन, रास्ता रोको यासह तीव्र आंदोलनात्मक भूमिका घेईल.”

निवेदन देणाऱ्या शिष्टमंडळात माजी उपमहापौर केशव घोळवे, माजी नगरसेविका योगिता नागरगोजे, गणेश ढाकणे, अमोल नागरगोजे, कैलास सानप, गोरख सानप, बद्रीनारायण घुगे, सुरेश घुगे, डॉ. नारायण जायभाये, विनोद मुंढे, गजानन सोलून, भाऊसाहेब कुटे, रामहारी केदार, वैजिनाथ शिरसाठ, सुनील नरसिंगे, श्रवण दहातोंडे आदींचा समावेश होता.

© २०२५ मॅक्स मंथन डेली न्यूज. सर्व हक्क राखीव.