निवडणुकीचा धुरळा उडाला! पहिल्याच दिवशी इच्छुकांची मोठी पसंती; ‘अ’ क्षेत्रीय कार्यालय ठरले हॉटस्पॉट

पिंपरी-चिंचवड मनपा निवडणूक: पहिल्याच दिवशी अर्जांसाठी उसळली गर्दी; २२१२ अर्जांचे वितरण

‘अ’ क्षेत्रीय कार्यालयात सर्वाधिक ३५६ तर ‘ग’ मधून १८९ उमेदवारांनी नेले अर्ज; निवडणूक रिंगण तापले

पिंपरी प्रतिनिधी शाम सोनवणे, दि.२४ डिसेंबर २०२५, मॅक्स मंथन डेली न्यूज:

पिंपरी (दि. २४ डिसेंबर २०२५): पिंपरी-चिंचवड महानगरपालिका सार्वत्रिक निवडणूक २०२५-२६ च्या रणधुमाळीला आता खऱ्या अर्थाने वेग आला आहे. काल, २३ डिसेंबरपासून उमेदवारांसाठी नामनिर्देशन पत्र (उमेदवारी अर्ज) वाटपाची प्रक्रिया सुरू झाली असून, पहिल्याच दिवशी इच्छुकांची मोठी गर्दी पाहायला मिळाली. शहरातील ८ निवडणूक निर्णय अधिकारी कार्यालयांतून अवघ्या चार तासांत २ हजार २१२ अर्जांचे वितरण झाले आहे.

निवडणूक निर्णय अधिकारी कार्यालयांतून अर्जांच्या वितरणाची आकडेवारी पाहता, ‘अ’ क्षेत्रीय कार्यालयात इच्छुकांचा सर्वाधिक कल दिसून आला आहे.

राज्य निवडणूक आयोगाच्या सूचनेनुसार १५ डिसेंबर २०२५ रोजी निवडणुकीची अधिसूचना प्रसिद्ध झाली. त्यानंतर आता प्रत्यक्ष अर्ज वितरणाला सुरुवात झाली आहे. सकाळी ११ ते दुपारी ३ या वेळेत हे अर्ज उपलब्ध करून दिले जात आहेत. पहिल्याच दिवशी झालेली ही गर्दी पाहता, यंदा मोठ्या प्रमाणावर अपक्ष आणि बंडखोर उमेदवार निवडणूक रिंगणात उतरण्याची चिन्हे दिसत आहेत.

महापालिकेच्या वतीने प्रत्येक क्षेत्रीय कार्यालयात नामनिर्देशन पत्रांच्या वितरणासाठी आणि स्वीकृतीसाठी स्वतंत्र खिडक्यांची व्यवस्था करण्यात आली आहे. उमेदवारांना अर्ज भरताना कोणतीही अडचण येऊ नये, यासाठी मार्गदर्शन केंद्रेही उभारण्यात आली आहेत. विशेषतः प्रभाग क्र. १९ (अ कार्यालय), प्रभाग क्र. ९ (क कार्यालय) आणि प्रभाग क्र. ३० (ह कार्यालय) या ठिकाणी प्रत्येकी १४० हून अधिक अर्जांचे वितरण झाले आहे, जेथे लढत अत्यंत चुरशीची होण्याची शक्यता आहे.

© २०२५ मॅक्स मंथन डेली न्यूज. सर्व हक्क राखीव.