छत्रपती संभाजीनगरमध्ये चैन स्नॅचिंगचा सुळसुळाट! हॉटेलमधून घरी परतणाऱ्या महिलेचे ३ तोळ्यांचे मंगळसूत्र लांबवले
छत्रपती संभाजीनगर, २० जानेवारी २०२६ | मॅक्स मंथन डेली न्यूज
छत्रपती संभाजीनगर : शहरात महिलांना लक्ष्य करून दागिने चोरणाऱ्या टोळीचा हैदोस सुरूच असून, सातारा, उस्मानपुरा आणि जवाहरनगर पोलीस ठाण्यांच्या हद्दीत चैन स्नॅचिंगच्या घटनांमध्ये मोठी वाढ झाली आहे. ताज्या घटनेत, बीड बायपास परिसरात एका विवाहित महिलेच्या गळ्यातील ३ तोळ्यांची सोन्याची चैन दुचाकीस्वाराने लंपास केली आहे.
मिळालेल्या माहितीनुसार, रायगड नगर येथे राहणाऱ्या जयश्री नायर (वय ५५) या आपल्या कुटुंबासह १७ जानेवारी रोजी रात्री जेवणासाठी बीड बायपासवरील एका हॉटेलमध्ये गेल्या होत्या. रात्री १०:४० च्या सुमारास जेवण करून घरी परतत असताना, मागून आलेल्या एका दुचाकीस्वाराने त्यांच्या गळ्यातील ३ तोळ्यांची सोन्याची चैन हिसकावून घेतली आणि वेगाने पळ काढला.
सातारा पोलीस ठाण्याच्या हद्दीत गेल्या काही दिवसांपासून सातत्याने अशा घटना घडत आहेत. पोलिसांकडून गस्त वाढवण्याचे दावे केले जात असले, तरी प्रत्यक्षात चोरटे पोलिसांना आव्हान देत मोकाट फिरत आहेत. बीड बायपाससारख्या वर्दळीच्या ठिकाणी अशा प्रकारे धाडसी चोरी होत असल्याने महिलांमध्ये भीतीचे वातावरण निर्माण झाले आहे.
सातारा पोलिसांनी चैन स्नॅचिंगचे अनेक गुन्हे दाखल केले आहेत, मात्र अद्याप एकाही घटनेचा छडा लावण्यात त्यांना यश आलेले नाही. सीसीटीव्ही फुटेज आणि इतर पुराव्यांच्या आधारे तपास सुरू असल्याचे पोलिसांचे म्हणणे आहे. मात्र, ठोस कारवाई होत नसल्याने चोरट्यांचे धाडस वाढत चालले आहे.
या वाढत्या घटनांच्या पार्श्वभूमीवर, महिलांनी रात्रीच्या वेळी बाहेर पडताना काळजी घ्यावी आणि संशयास्पद हालचाली दिसल्यास तातडीने पोलिसांशी संपर्क साधावा, असे आवाहन प्रशासनातर्फे करण्यात आले आहे.
© २०२६ मॅक्स मंथन डेली न्यूज. सर्व हक्क राखीव.
