पिंपरी-चिंचवडचे महापौरपद ‘खुले’; ८४ नगरसेवकांसाठी संधीची कवाडे उघडली! बापू काटे यांच्या नावाचा शहरभर बोलबाला

पिंपरी चिंचवड प्रतिनिधी बालाजी नवले, २२ जानेवारी २०२६ | मॅक्स मंथन डेली न्यूज

पिंपरी : पिंपरी-चिंचवड महानगरपालिकेच्या महापौरपदाच्या आरक्षणाबाबत आज दिवसभर कमालीचा सस्पेन्स राहिला. सुरुवातीला ‘सर्वसाधारण महिला’ आरक्षण पडल्याची चर्चा असतानाच, शासनाच्या अधिकृत यादीत महापौरपद ‘सर्वसाधारण’ (Open) प्रवर्गासाठी राखीव झाल्याचे स्पष्ट झाले. या नव्या बदलामुळे सत्ताधारी भारतीय जनता पक्षाच्या सर्व ८४ नगरसेवकांना महापौर होण्याची संधी उपलब्ध झाली असली, तरी शहराचे नेतृत्व करण्यासाठी भाजप शहराध्यक्ष शत्रुघ्न उर्फ बापू काटे यांचे नाव सर्वाधिक चर्चेत असून ते या पदाचे प्रबळ दावेदार मानले जात आहेत.

मंत्रालयात पार पडलेल्या आरक्षण सोडतीनंतर काही काळ गोंधळाचे वातावरण होते. मात्र, अधिकृत यादी प्रसिद्ध होताच महापौरपद खुल्या प्रवर्गासाठी असल्याचे निश्चित झाले. यामुळे भाजपमधील दिग्गज पुरुष नगरसेवकांच्या आशा पल्लवित झाल्या आहेत. आता पक्षाच्या वरिष्ठ नेतृत्वाकडून कोणाच्या गळ्यात विजयाची माळ घातली जाते, याकडे राजकीय वर्तुळाचे लक्ष लागले आहे.

शत्रुघ्न उर्फ बापू काटे हे पिंपरी-चिंचवडच्या राजकारणातील एक अभ्यासू आणि संयमी नेतृत्व म्हणून ओळखले जातात. २०१७ पासून २०२६ पर्यंतचा त्यांचा प्रवास शहराच्या विकासाशी आणि भाजपच्या विस्ताराशी जोडलेला आहे.

• पक्षनिष्ठेचे फळ: २०१७ मध्ये भाजपने पहिल्यांदा सत्ता मिळवली तेव्हाही बापू काटे महापौरपदाच्या शर्यतीत आघाडीवर होते. मात्र, पक्षीय शिस्त पाळत त्यांनी ‘वेटिंग’वर राहणे पसंत केले. यंदा त्यांच्याच नेतृत्वाखाली भाजपने ८४ जागा जिंकत ऐतिहासिक विजय मिळवला आहे, त्यामुळे त्यांच्या कष्टाचे फळ त्यांना मिळावे, अशी भावना कार्यकर्त्यांमध्ये आहे.

• २०१७ ते २०२६: कामाचा झंझावात: बापू काटे यांनी गेल्या नऊ वर्षांत आपल्या प्रभागासह संपूर्ण शहरात पायाभूत सुविधांचे जाळे विणण्यासाठी अथक परिश्रम घेतले आहेत. स्मार्ट सिटी प्रकल्प, पाणीपुरवठ्याचे नियोजन आणि रस्ते विकास यांत त्यांनी दिलेले योगदान महत्त्वपूर्ण आहे.

• कौशल्यपूर्ण नेतृत्व: शहराध्यक्ष म्हणून त्यांनी पक्षातील अंतर्गत मतभेद मिटवून सर्वांना सोबत घेण्याची कला अवगत केली. नुकत्याच झालेल्या महापालिका निवडणुकीत त्यांनी ज्या पद्धतीने रणनीती आखली, त्याचेच फलित म्हणजे भाजपचे निर्विवाद बहुमत होय.

बापू काटे हे मुख्यमंत्री देवेंद्र फडणवीस यांच्या विश्वासातील खंदे समर्थक मानले जातात. “गेल्या वेळी डावलले गेले असले, तरी यावेळी बापू काटे यांचे पारडे जड आहे,” अशी चर्चा पिंपरी-चिंचवडच्या गल्लीबोळात सुरू आहे. एक संवेदनशील लोकप्रतिनिधी आणि विकासाची दृष्टी असलेला नेता म्हणून त्यांच्या नावाला विरोधकांनीही अनेकदा दाद दिली आहे.

महापौरपदाची माळ बापू काटे यांच्या गळ्यात पडल्यास शहराच्या विकासाला एक नवी दिशा मिळेल, असा विश्वास त्यांच्या समर्थकांना वाटत आहे. आता केवळ औपचारिकता बाकी असून, लवकरच शहराला नवीन ‘महापौर’ मिळणार आहे.

© २०२६ मॅक्स मंथन डेली न्यूज. सर्व हक्क राखीव.