रहाटणीत ज्येष्ठ महिला ठरली ‘रणरागिणी’; फरफटत नेले तरी साखळी सोडली नाही, एका चोरट्याला नागरिकांच्या मदतीने पकडले
पिंपरी प्रतिनिधी आकाश कांबळे, ५ फेब्रुवारी २०२६ | मॅक्स मंथन डेली न्यूज:
पिंपरी-चिंचवड/रहाटणी : रहाटणी परिसरात मंगळवारी पहाटे एका धाडसी ज्येष्ठ दाम्पत्याने साखळी चोराचा प्रयत्न केवळ हाणून पाडला नाही, तर जीवाच्या आकांताने एका चोरट्याला पकडून पोलिसांच्या स्वाधीन केले. चोरट्याने ३.८० लाख रुपयांची सोन्याची साखळी खेचल्यानंतर महिलेने त्याला घट्ट पकडून ठेवले. यावेळी चोरट्याने त्यांना रस्त्यावरून फरफटत नेले, तरीही त्यांनी त्याची पकड ढिली होऊ दिली नाही. त्यांच्या या शौर्याचे संपूर्ण शहरात कौतुक होत आहे.
तक्रारदार आत्माराम माने (वय ६४, निवृत्त वरिष्ठ शासकीय अधिकारी) आणि त्यांच्या पत्नी मंगळवारी सकाळी ६ च्या सुमारास रहाटणी येथील त्यांच्या गृहनिर्माण संस्थेतून फिरण्यासाठी बाहेर पडले होते. नखाते चौकाजवळून चालत असताना एका दुचाकीवरून तीन तरुण त्यांच्या जवळ आले. त्यापैकी एक जण खाली उतरला आणि त्याने माने यांच्या पत्नीच्या गळ्यातील सोन्याची साखळी जोरात खेचली.
साखळी खेचल्यानंतर चोरटा पळून जात असताना, या धाडसी महिलेने त्याचा हात आणि हातातील धातूचे ‘कडे’ घट्ट पकडले. चोरट्याने स्वतःला सोडवून घेण्यासाठी त्यांना जमिनीवर पाडून रस्त्यावरून फरफटत नेले, मात्र त्यांनी हार मानली नाही आणि आरडाओरडा सुरू केला. पत्नीची ओढाताण होत असल्याचे पाहून आत्माराम माने आणि परिसरातील रिक्षाचालक व नागरिकांनी तातडीने धाव घेतली आणि त्या चोरट्याला जागीच पकडले.
नागरिकांनी पकडलेल्या चोरट्याचे नाव संजय लुनाक्का (वय २९, रा. नांदेड) असे असून, काळेवाडी पोलिसांनी त्याला अटक केली आहे. त्याचे इतर दोन साथीदार दुचाकीवरून पळून जाण्यात यशस्वी झाले. लुनाक्का हा सराईत गुन्हेगार असून त्याच्यावर यापूर्वीही चोरीचे गुन्हे दाखल आहेत. हे तिघेही १५ दिवसांपूर्वीच पुण्यात गुन्हे करण्याच्या उद्देशाने आले होते.
या झटापटीत महिलेच्या हातापायाला जखमा झाल्या आहेत, मात्र त्यांनी दाखवलेल्या प्रसंगावधानामुळे ३.८० लाखांचे सोने वाचले. काळेवाडी पोलीस स्टेशनचे वरिष्ठ पोलीस निरीक्षक राजेंद्र बहिरट यांनी या धाडसी महिलेची भेट घेऊन त्यांच्या शौर्याबद्दल त्यांचा विशेष सत्कार केला.
© २०२६ मॅक्स मंथन डेली न्यूज. सर्व हक्क राखीव.
