मोशीतील १०० फुटी संभाजी महाराज पुतळा प्रकल्प वादाच्या भोवऱ्यात! ५० कोटींच्या वाढीव खर्चाला मारुती भापकरांचा विरोध; ‘धनेश्वर कंस्ट्रक्शन’च्या चौकशीची मागणी

पिंपरी प्रतिनिधी आकाश कांबळे, १६ मार्च २०२६ | मॅक्स मंथन एक्सक्लुझिव्ह:

पिंपरी : मोशी येथे उभारण्यात येत असलेल्या स्वराज्यरक्षक छत्रपती संभाजी महाराजांच्या १०० फुटी भव्य पुतळा आणि स्मारकाचे काम भ्रष्टाचाराच्या आणि तांत्रिक त्रुटींच्या संशयावरून वादात सापडले आहे. या प्रकल्पासाठी आज स्थायी समितीने मंजूर केलेल्या ५० कोटी रुपयांच्या वाढीव कामांना स्थगिती देऊन या संपूर्ण प्रकरणाची सखोल चौकशी करण्याची मागणी ज्येष्ठ सामाजिक कार्यकर्ते मारुती भापकर यांनी आयुक्त डॉ. विजय सूर्यवंशी यांच्याकडे पत्राद्वारे केली आहे.

मारुती भापकर यांनी आयुक्तांना दिलेल्या पत्रात प्रकल्पाच्या सुरुवातीपासूनच्या नियोजनावर गंभीर प्रश्न उपस्थित केले आहेत:

• जागा बदलामुळे साडेपाच कोटींचा फटका: सुरुवातीला पुतळ्यासाठी निवडलेली जागा चुकीची ठरल्याने तिथे खर्च झालेले ५.५० कोटी रुपये पाण्यात गेले आहेत. या नुकसानीस जबाबदार कोण, असा सवाल भापकरांनी केला आहे.

• ठेकेदाराचे ‘रिंग’ आणि राजकीय संबंध: सदर कामाचा ठेकेदार ‘धनेश्वर कंस्ट्रक्शन’ हा सत्ताधारी भाजप नेत्यांच्या जवळचा असून, त्याने भोसरीतील शितल बाग पुलासह अनेक कामात खर्च वाढवून घेतल्याचा आरोप पत्रात करण्यात आला आहे.

• पुतळ्याला तडे गेल्याचा खळबळजनक दावा: दोन वर्षांपूर्वी दिल्लीहून आणलेल्या पुतळ्याच्या सुट्या भागांना (मोजडी व इतर भाग) चिरा पडल्याचे उजेडात आले होते. मालवण येथील छत्रपती शिवाजी महाराजांच्या पुतळ्यासारखी दुर्घटना मोशीत घडू नये, अशी भीती भापकरांनी व्यक्त केली आहे.

मारुती भापकर यांनी प्रशासनाला १६ प्रश्नांच्या सरबत्तीद्वारे धारेवर धरले आहे:

१. आज मंजूर झालेल्या ५० कोटींच्या कामाला तातडीने स्थगिती का देऊ नये?

२. धनेश्वर कंस्ट्रक्शनला पुतळा उभारण्याचा पूर्वानुभव आहे का?

३. पुतळ्यासाठी वापरलेल्या ब्राँझ धातूची गुणवत्ता (C 903 किंवा तत्सम) तज्ज्ञांकडून तपासली आहे का?

४. पुतळ्याच्या सुट्या भागांना तडे का गेले होते आणि त्यावर अधिकाऱ्यांनी काय पत्रव्यवहार केला?

५. संबंधित ठेकेदाराचा मागील १० वर्षांतील टर्नओव्हर आणि त्याला दिलेली एकूण कामे यांची चौकशी व्हावी.

“छत्रपती संभाजी महाराज हे महाराष्ट्राची अस्मिता आहेत. पुतळा भव्य व्हावाच, पण तो भ्रष्टाचारमुक्त, दर्जेदार आणि चिरस्थायी असावा. मालवणच्या घटनेची पुनरावृत्ती होऊ नये यासाठी इतिहासकार, तज्ज्ञ इंजिनीअर्स आणि कला संचालनालयामार्फत या कामाची चौकशी होणे गरजेचे आहे,” असे मारुती भापकर यांनी पत्रात नमूद केले आहे.

आजच्या स्थायी समिती सभेत सिव्हिल कामासाठी ३२ कोटी आणि इलेक्ट्रिक कामासाठी १८ कोटी असे एकूण ५० कोटी रुपये मंजूर करण्यात आले आहेत. भापकरांच्या या खळबळजनक पत्रानंतर आता महापालिका प्रशासन या वाढीव खर्चाला स्थगिती देते की काम पुढे सुरू ठेवते, याकडे संपूर्ण शहराचे लक्ष लागले आहे.

© २०२६ मॅक्स मंथन डेली न्यूज. सर्व हक्क राखीव।