प्रादेशिक परिवहन विभागाचे बसस्थानक स्वच्छता सर्वेक्षण; अद्यावत स्थानकांना मिळणार पुरस्कार
भद्रावती, प्रतिनिधी: सुनील दैदावार, दिनांक: ८ एप्रिल २०२६, मॅक्स मंथन डेली न्यूज:
भद्रावती: महाराष्ट्र राज्य मार्ग परिवहन महामंडळाच्या वतीने बस स्थानकांचा कायापालट करण्यासाठी आणि प्रवाशांना दर्जेदार सुविधा उपलब्ध करून देण्यासाठी ‘स्वच्छता सर्वेक्षण’ मोहीम हाती घेण्यात आली आहे. या अंतर्गत उत्तम सोयी-सुविधा देणाऱ्या बस स्थानकांना पुरस्कृत करण्यात येणार असून, नुकतीच पुणे प्रदेशच्या प्रादेशिक व्यवस्थापकांनी भद्रावती बस स्थानकाची पाहणी केली.
पुणे प्रदेशच्या प्रादेशिक व्यवस्थापक अमृता ताम्हणकर आणि प्रादेशिक अभियंता आर. कांबळे यांच्या चमूने ६ एप्रिल रोजी भद्रावती बस स्थानकास भेट दिली. यावेळी त्यांनी बस स्थानकाचा निवारा, स्वच्छता आणि परिसराची सविस्तर पाहणी केली. याप्रसंगी चंद्रपूर आगार व्यवस्थापक पुण्यवर्धन वर्धेकर, वाहतूक निरीक्षक उत्कर्षा चौधरी आणि स्थानिक पत्रकार उपस्थित होते.
स्वच्छता सर्वेक्षणाच्या प्रश्नावलीनुसार बस स्थानकांचे गुणांकन करण्यात येत आहे. यामध्ये प्रामुख्याने खालील बाबींची तपासणी करण्यात आली:
-
स्वच्छता व परिसर: बस स्थानकाचा परिसर, स्वच्छता, शौचालय आणि मूत्रीघरांची अवस्था.
-
प्रवासी सुविधा: पिण्याचे शुद्ध जल, वीज व्यवस्था, प्रवासी निवारा आणि उपहारगृह.
-
कर्मचारी शिस्त: कर्मचाऱ्यांचा गणवेश आणि प्रवाशांशी असलेले सौजन्यपूर्ण वर्तन.
-
इतर: वाहन तळ आणि परिसरातील बागेची निगा.
यावेळी उपस्थित पत्रकारांनी भद्रावती बस स्थानकातील विविध समस्या अधिकाऱ्यांच्या निदर्शनास आणून दिल्या. त्यावर सकारात्मक प्रतिसाद देत ताम्हणकर यांनी या समस्यांचा वरिष्ठांकडे पाठपुरावा करण्याचे आश्वासन दिले.
सर्वेक्षणाच्या निमित्ताने भद्रावती बस स्थानक परिसर अत्यंत सुंदर आणि स्वच्छ करण्यात आला होता. कर्मचारी देखील खाकी गणवेशात तत्परतेने कार्यरत होते. मात्र, ही स्वच्छता आणि शिस्त केवळ सर्वेक्षणापुरती मर्यादित न राहता, त्यात वर्षभर सातत्य असावे, अशी रास्त अपेक्षा उपस्थित प्रवाशांनी व्यक्त केली.
याप्रसंगी वाहतूक नियंत्रक शेषराव कडाम, रुपाली ऐबट, लिपिक प्रदीप रंगारी, नीता आत्राम, प्रवासी मित्र मो. रफिक मो. शेख, सौ. परचाके तसेच पत्रकार दिलीप मांढरे, प्रा. विवेक सरपटवार, प्रा. लिमेश माणूसमारे आदी उपस्थित होते.
© २०२६ मॅक्स मंथन डेली न्यूज. सर्व हक्क राखीव.
