शहरीकरणाच्या गर्दीतही जपली गावपणची परंपरा! टाळगाव चिखलीत बैलगाड्यावर महापौरांची शाही मिरवणूक
पिंपरी चिंचवड प्रतिनिधी आकाश कांबळे, दिनांक: ८ एप्रिल २०२६, मॅक्स मंथन डेली न्यूज:
पिंपरी-चिंचवड: औद्योगिकनगरी आणि झपाट्याने होणारे शहरीकरण अशी ओळख असलेल्या पिंपरी-चिंचवड शहरात आजही गावकीच्या परंपरा तितक्याच उत्साहात जपल्या जात आहेत. टाळगाव चिखली येथे आयोजित श्री भैरवनाथ महाराज उत्सव व हनुमान जन्मोत्सव यात्रेनिमित्त हा रांगडा उत्साह पाहायला मिळाला. या यात्रेचे खास आकर्षण ठरले ते म्हणजे महापौर रवि लांडगे यांची बैलगाड्यावरून काढलेली शाही मिरवणूक.
चिखली परिसरातील ग्रामस्थांनी आपल्या लाडक्या महापौरांचे स्वागत अत्यंत पारंपरिक पद्धतीने केले. महापौरांना बैलगाड्यावर बसवून त्यांची संपूर्ण गावातून वाजत-गाजत मिरवणूक काढण्यात आली. विशेष म्हणजे, महापौरांनी बैलगाड्यावर उभे राहूनच टाळगाव चिखलीकरांना जत्रेच्या आणि हनुमान जन्मोत्सवाच्या शुभेच्छा दिल्या. शहरी भागात जिथे आज आलिशान गाड्यांचा वापर होतो, तिथे बैलगाड्यावर स्वार झालेले महापौर पाहणे हा चिखलीकरांसाठी एक ऐतिहासिक आणि अभिमानास्पद क्षण ठरला.
टाळगाव चिखलीची जत्रा म्हटली की ‘बैलगाडा शर्यत’ हे समीकरण आजही कायम आहे. हनुमान जन्मोत्सवाचे औचित्य साधून आयोजित करण्यात आलेल्या या शर्यती पाहण्यासाठी पंचक्रोशीतील हजारो शौकिनांनी गर्दी केली होती. अंगावर शहारे आणणाऱ्या या शर्यतींनी यात्रेची रंगत अधिकच वाढवली.
यावेळी बोलताना महापौर रवि लांडगे यांनी ग्रामस्थांचे आभार मानले. ते म्हणाले की, “शहराचा कितीही विकास झाला तरी आपल्या मातीची संस्कृती आणि गावची जत्रा आपल्याला आपल्या मुळांशी जोडून ठेवते. टाळगाव चिखलीकरांनी ज्या प्रेमाने माझे स्वागत केले, ते माझ्यासाठी अविस्मरणीय आहे.”
या सोहळ्याप्रसंगी चिखलीतील ज्येष्ठ नागरिक, तरुण मंडळ, महिला आणि राजकीय क्षेत्रातील अनेक मान्यवर मोठ्या संख्येने उपस्थित होते. ढोल-ताशांच्या गजरात आणि ‘बुरुम बुरुम’च्या आवाजात चिखलीचा परिसर दुमदुमून गेला होता.
© २०२६ मॅक्स मंथन डेली न्यूज. सर्व हक्क राखीव.
