ज्येष्ठ नागरिक मित्र परिवाराचा स्तुत्य उपक्रम: नेत्रदान व देहदान करणाऱ्या दात्यांची नामावली वैद्यकीय अधीक्षकांकडे सुपूर्द

अकोला/मुर्तिजापूर प्रतिनिधी विलास सावळे , २१ एप्रिल २०२६ मॅक्स मंथन डेली न्यूज:

मूर्तिजापूर: सामाजिक उत्तरदायित्व आणि ‘मरणांतरही जगण्याची’ जिद्द उराशी बाळगून, स्थानिक ज्येष्ठ नागरिक मित्र परिवाराच्या वतीने एक प्रेरणादायी पाऊल उचलण्यात आले आहे. परिवारातील सदस्यांनी स्वेच्छेने संमती दिलेल्या नेत्रदान आणि देहदान दात्यांची अधिकृत नामावली आज लक्ष्मीबाई देशमुख उपजिल्हा रुग्णालयाचे वैद्यकीय अधीक्षक डॉ. राजेंद्र नेमाडे यांच्याकडे सुपूर्द करण्यात आली.

समाजातील अंधश्रद्धा दूर करून अवयवदानाचे महत्त्व पटवून देण्यासाठी ज्येष्ठ नागरिक परिवार सातत्याने कार्यरत आहे. या उपक्रमांतर्गत सदस्यांनी मृत्यूनंतर आपले अवयव किंवा शरीर वैद्यकीय संशोधनासाठी आणि गरजू रुग्णांसाठी उपलब्ध करून देण्याचा निस्वार्थ संकल्प केला आहे.

वैद्यकीय अधीक्षक डॉ. राजेंद्र नेमाडे यांनी या उपक्रमाचे स्वागत केले. “अशा दात्यांमुळे वैद्यकीय क्षेत्रातील विद्यार्थ्यांना अभ्यासासाठी आणि दृष्टिहीन रुग्णांना नवीन दृष्टी मिळण्यासाठी मोठी मदत होईल,” असे मत त्यांनी व्यक्त केले. या नामावलीनुसार सर्व दात्यांना लवकरच ‘दाता ओळखपत्र’ प्रदान करण्यात येणार आहे.

• रमेश फडणाईक (माजी नगराध्यक्ष): “आयुष्यभर समाजासाठी योगदान दिल्यानंतर, मृत्यूनंतरही कोणाच्या तरी कामी येता यावे, हीच आमची भावना आहे.”

• जयंतीभाई हरिया: “शंभर ज्येष्ठ नागरिक नेत्रदाते संकल्प पूर्ण झाल्यानंतरही, इतर नागरिकांना या कार्यासाठी प्रवृत्त करण्यासाठी आम्ही प्रयत्नशील राहू.”

मनोहर पाठक, रमेश फडणाईक, फुलचंद शर्मा, रतनलाल महाजन, हंसाबाई महाजन, प्रा. जगदीश पांडे, चंदा पांडे, किशोर गावंडे, वनिता गावंडे, अरुण ठाकरे, सुधाकर गौरखेडे, जयंतीलाल हरीया, दमयंती हरीया, धनराज वानखडे, वच्छला वानखडे, वसंतराव जुनेकर, वासुदेवराव कावरे, मनोहर ताकतोडे, विजयकुमार नीरखे आणि दामोदर गुल्हाने यांसह अनेक ज्येष्ठ नागरिकांनी आपले अर्ज सुपूर्द केले.

यावेळी समाजसेवक विष्णू लोडम, रवी मार्कंड, डॉ. भरणे, डॉ. पौर्णिमा अवघाते, डॉ. चारथळ, सुनील वानखडे, डॉ. शेळके, डॉ. पुजारी यांच्यासह रुग्णालयाचे कर्मचारी उपस्थित होते. ज्येष्ठ नागरिकांच्या या क्रांतिकारी निर्णयाचे सर्व स्तरांतून कौतुक होत आहे.

© २०२६ मॅक्स मंथन डेली न्यूज. सर्व हक्क राखीव.