नवा प्राप्तिकर कायदा २०२५: करदात्यांसाठी प्रक्रिया सोपी आणि पारदर्शक होणार; विवेक वाडेकर यांची माहिती

पुणे/पिंपरी प्रतिनिधी लक्ष्मण प्रधान, १३ मे २०२६ मॅक्स मंथन डेली न्यूज:

पुणे: “नव्याने लागू करण्यात आलेला ‘प्राप्तिकर कायदा, २०२५’ हा करदात्यांसाठी सुलभता, वादात घट आणि पारदर्शकता निर्माण करण्याच्या उद्देशाने तयार करण्यात आला आहे. तंत्रज्ञानावर आधारित ही व्यवस्था सामान्य नागरिकांना समजण्यास अत्यंत सोपी असेल,” अशी माहिती पुण्याचे मुख्य प्राप्तिकर आयुक्त (Pr-CCIT) विवेक वाडेकर यांनी मंगळवारी दिली.

आयकर भवन येथे आयोजित पत्रकार परिषदेत वाडेकर यांनी सांगितले की, १ एप्रिल २०२६ पासून लागू झालेला हा नवीन कायदा १९६१ च्या जुन्या कायद्याची जागा घेईल. गेल्या सहा दशकांत जुन्या कायद्यात ४,००० पेक्षा अधिक दुरुस्त्या झाल्यामुळे तो अत्यंत क्लिष्ट झाला होता.

नव्या कायद्यात रचनेत मोठे बदल करण्यात आले असून,  पूर्वीची ८१९ कलमे कमी करून आता ५३६ करण्यात आली आहेत. ४७ प्रकरणांऐवजी आता केवळ २३ प्रकरणे असतील. ५११ नियमांऐवजी ३३३ नियम आणि ३९९ फॉर्म्सऐवजी केवळ १९० फॉर्म्स राहतील.

करदात्यांच्या शंकांचे तातडीने निरसन करण्यासाठी विभागाने “कर साथी” (Kar Saathi) हा २४x७ एआय-आधारित चॅटबॉट लाँच केला आहे. तसेच, “कर सेतू” (Kar Setu) या उपक्रमांतर्गत २,००० हून अधिक वारंवार विचारले जाणारे प्रश्न (FAQs) आणि शैक्षणिक माहिती पुस्तिका उपलब्ध करून देण्यात आल्या आहेत. विशेष म्हणजे, महाराष्ट्रातील करदात्यांसाठी ही माहिती मराठी भाषेतही उपलब्ध करून देण्यात आली आहे.

वाडेकर यांनी स्पष्ट केले की, आता प्राप्तिकर परतावा (Refund) बेंगळुरू येथील ‘सेंट्रलाइज्ड प्रोसेसिंग सेंटर’ (CPC) द्वारे कोणत्याही मानवी हस्तक्षेपाशिवाय स्वयंचलितपणे प्रक्रियेत आणला जात आहे. करदात्यांनी आपले ईमेल आणि संपर्क तपशील अद्ययावत ठेवावेत, जेणेकरून संवादात कोणतीही अडचण येणार नाही, असे आवाहनही त्यांनी केले.

नव्या कायद्याबाबत जनजागृती करण्यासाठी “प्रारंभ २०२६” (PRARAMBH 2026) या मोहिमेअंतर्गत दि. १५ मे रोजी सकाळी १०:३० वाजता गणेशखिंड येथील ‘कॉसमॉस बँक ऑडिटोरियम’ मध्ये एका भव्य कार्यक्रमाचे आयोजन करण्यात आले आहे.

© २०२६ मॅक्स मंथन डेली न्यूज. सर्व हक्क राखीव.