ह क्षेत्रीय कार्यालयाअंतर्गत नवी सांगवी येथे ३ अनधिकृत आर. सी. सी. बांधकामांवर निष्कासन कारवाई

पिंपरी चिंचवड प्रतिनिधी बालाजी नवले, १५ मे २०२६ मॅक्स मंथन डेली न्यूज:

पिंपरी: पिंपरी चिंचवड महानगरपालिकेच्या ‘ह’ क्षेत्रीय कार्यालयाअंतर्गत नवी सांगवी प्रभाग क्र. ३१ मध्ये अनधिकृत बांधकामांविरोधात आज महापालिकेने धडक निष्कासन (पाडकाम) कारवाई केली. यामध्ये नेताजी नगर, गांगर्डे नगर, विनायक नगर आणि गजानन नगर परिसरातील अंदाजे १३० चौरस मीटर क्षेत्रफळावरील ३ अनधिकृत आर.सी.सी. बांधकामे जमीनदोस्त करण्यात आली.

महापालिका आयुक्त डॉ. विजय सूर्यवंशी यांच्या आदेशान्वये तसेच ह क्षेत्रीय अधिकारी पूजा दुधनाळे यांच्या अधिपत्याखाली ही कारवाई अत्यंत चोखपणे पार पाडण्यात आली.

या कारवाईदरम्यान कोणताही अनुचित प्रकार घडू नये यासाठी कडेकोट बंदोबस्त तैनात करण्यात आला होता. या मोहिमेमध्ये उप अभियंता प्रताप मोरे, कनिष्ठ अभियंता जयवंत रोकडे, महापालिका धडक कारवाई पथकातील बीट निरीक्षक रोहन कांबळे, प्रफुल्ल भोकरे, सुरज माने यांच्यासह महाराष्ट्र सुरक्षा बलाचे (MSF) १८ जवान प्रत्यक्ष घटनास्थळी उपस्थित होते. हे अनधिकृत बांधकाम हटवण्यासाठी प्रशासनाने १० मजूर, १ जेसीबी आणि ३ ट्रॅक्टर ब्रेकरच्या सहाय्याने कारवाई पूर्ण केली.

“पिंपरी चिंचवड शहरातील अनधिकृत बांधकामे आणि अतिक्रमणांविरोधात महापालिका प्रशासनाची ही कारवाई यापुढेही अशीच सातत्याने सुरू राहणार आहे. नागरिकांनी शहरात कोणतेही बांधकाम करताना महापालिकेची आवश्यक ती रीतसर परवानगी घेऊनच बांधकाम करावे आणि नियमांचे काटेकोर पालन करावे. अन्यथा, अनधिकृत बांधकाम अथवा अतिक्रमण केल्यास संबंधितांवर कठोर कायदेशीर कारवाई करण्यात येईल.”

– डॉ. विजय सूर्यवंशी, आयुक्त, पिंपरी चिंचवड महानगरपालिका

© २०२६ मॅक्स मंथन डेली न्यूज. सर्व हक्क राखीव.