“विधानसभेच्या अध्यक्षांनी माय मराठीची केलेली मोडतोड संतापजनक!” आशाताई भोसले यांच्या शोकप्रस्तावातील अक्षम्य चुकांवरून काशिनाथ नखाते यांचा कडाडून प्रहार

पिंपरी चिंचवड प्रतिनिधी बालाजी नवले, २४ जून २०२६ मॅक्स मंथन डेली न्यूज:

पिंपरी: “महाराष्ट्राचे आराध्य दैवत आणि आपल्या सुरेल गाण्यांनी जगाला वेड लावणाऱ्या गानकोकिळा कै. आशाताई भोसले यांच्या निधनाबद्दल विधिमंडळात अत्यंत गंभीर शोकप्रस्ताव वाचला जात असताना, राज्याच्या सर्वोच्च घटनात्मक पदावर बसलेल्या व्यक्तीने मातृभाषेची केलेली चिरफाड मन सुन्न करणारी आहे. ‘पंडित दीनानाथ मंगेशकर’ यांचा उल्लेख थेट ‘दीनदयाल मंगेशकर’ करणे आणि मराठी भाषेच्या सुगम शब्दांचे वारंवार चुकीचे उच्चार करणे ही केवळ एक साधी घाई गडबड नाही, तर तो आपल्या भाषिक अस्मितेचा आणि सर्वोच्च लोकशाही मंदिराचा अक्षम्य अवमान आहे. ज्या मराठीला नुकताच आपण अभिजात भाषेचा ऐतिहासिक दर्जा मिळवून दिला, त्याच भाषेची विधानसभेच्या सभागृहात अशी केविलवाणी मोडतोड केली जात असेल तर हे संपूर्ण महाराष्ट्रासाठी अत्यंत क्लेशदायक आहे,” अशा संतप्त शब्दांत कष्टकरी संघर्ष महासंघाचे अध्यक्ष तथा ज्येष्ठ कामगार नेते श्री. काशिनाथ नखाते यांनी विधानसभा अध्यक्ष राहुल नार्वेकर यांच्यावर कडाडून हल्ला चढवला.

विधानसभा सभागृहात शोकप्रस्तावाचा मराठी मजकूर वाचताना अध्यक्षांकडून झालेल्या सलग आणि गंभीर चुकांनंतर महाराष्ट्रात उमटलेल्या तीव्र पडसादाच्या पार्श्वभूमीवर, काशिनाथ नखाते यांनी प्रसिद्धीस दिलेल्या पत्रकाद्वारे आपला तीव्र निषेध नोंदविला आहे.

विधीमंडळाच्या चालू पावसाळी अधिवेशनादरम्यान ज्येष्ठ गायिका कै. आशाताई भोसले यांच्या निधनाचा दुःखद शोकप्रस्ताव मांडण्यात आला होता. अत्यंत गांभीर्य आणि सन्मान राखत वाचायचा हा प्रस्ताव वाचताना विधानसभा अध्यक्ष राहुल नार्वेकर यांनी अनेक तांत्रिक व भाषिक चुका केल्या. आशाताईंचे थोर वडील आणि संगीत विश्वाचे दीपस्तंभ पंडित दीनानाथ मंगेशकर यांचा उल्लेख त्यांनी थेट ‘दीनदयाल मंगेशकर’ असा केला. लिखित मजकुरामध्ये असलेल्या ‘यथोचित’ या शब्दाचा उच्चार त्यांनी ‘यशोचित’ असा केला. तसेच ‘दुर्दम्य इच्छाशक्ती’ ऐवजी ‘दुर्दमय इच्छाशक्ती’ असा चुकीचा उच्चार केला. ‘आशा’ या अत्यंत साध्या नावाचा उच्चार देखील त्यांनी ‘अशा’ असा वारंवार केला. तसेच संगीत विश्वातील प्रसिद्ध शब्द ‘हृदया सिंहासनी’ आणि ज्येष्ठ गायिका सुमन कल्याणपूर यांच्या नावाचाही त्यांनी अत्यंत अशुद्ध उच्चार केला. या अक्षम्य चुकांवर बोट ठेवत काशिनाथ नखाते यांनी अध्यक्षांच्या भाषिक जाणिवेवर आणि ढिसाळ कारभारावर गंभीर प्रश्नचिन्ह उभे केले आहे.

पत्रकात बोलताना काशिनाथ नखाते अत्यंत संताप व्यक्त करत म्हणाले:

“मराठी ही केवळ संवादाची भाषा नसून ती संत ज्ञानेश्वर, संत तुकाराम आणि छत्रपती शिवाजी महाराजांच्या विचारांचे तेज जपणारी भाषा आहे. संयुक्त महाराष्ट्र चळवळीत १०५ हुतात्म्यांनी स्वतःच्या प्राणांचे बलिदान देऊन मुंबईसह महाराष्ट्र मिळवला आणि या भाषेला अधिकृत स्थान मिळवून दिले. आज अशा पवित्र विधानसभेमध्ये जे लोक कायदे आणि संविधानाचे रक्षण करण्याची शपथ घेतात, त्यांना स्वतःच्या भाषेत लिहून दिलेली चार वाक्ये देखील बिनचूक वाचता येत नाहीत, हे महाराष्ट्राच्या सुजाण राजकीय संस्कृतीला लागलेले फार मोठे ग्रहण आहे. सभागृहात उपस्थित एकाही आमदाराने या चुकीवर आक्षेप घेऊन तिथे दुरुस्ती करायला न सांगणे, हे त्याहून अधिक क्लेशदायक आणि संतापजनक आहे.”

१) अध्यक्षांनी जाहीर दिलगिरी व्यक्त करावी: संगीत विश्वातील महामेरू आणि दीनानाथ मंगेशकर यांच्या नावाचा चुकीचा उल्लेख केल्याबद्दल विधानसभा अध्यक्षांनी महाराष्ट्रातील कोट्यवधी मराठी भाषिकांची व कलाप्रेमींची जाहीर माफी मागावी. २) शासकीय भाषा चाचणी अनिवार्य करा: राज्यातील सर्वच घटनात्मक आणि शासकीय कार्यालयांमध्ये मराठीच्या शुद्ध आणि बिनचूक वापराबाबत कडक नियमावली लागू करण्यात यावी. ३) आमदारांसाठी भाषिक प्रशिक्षण वर्ग सुरू करा: विधानसभा किंवा विधानपरिषदेचे सदस्य असणाऱ्या सर्व लोकप्रतिनिधींसाठी राज्य सरकारने मराठी भाषेचा इतिहास, शुद्ध लेखन आणि अचूक उच्चार संदर्भातील विशेष ‘प्रशिक्षण व मार्गदर्शन’ वर्ग तात्काळ सुरू करावेत.

शेवटी बोलताना काशिनाथ नखाते यांनी सरकारला ताकीद दिली:

“आम्ही मराठीला अभिजात भाषेचा दर्जा मिळवला म्हणून ढोल-ताशे वाजवून आनंद साजरा करतो, परंतु आपल्या सर्वोच्च घटनात्मक पदावरील नेत्यांना साधे ‘यथोचित’ किंवा ‘दुर्दम्य’ शब्द अचूक वाचता येत नाहीत. हा विरोधाभास तात्काळ थांबला पाहिजे. जर लोकप्रतिनिधींना आपल्या भाषेचा सन्मान राखता येत नसेल तर त्यांनी त्या महत्त्वाच्या खुर्चीवर बसू नये. यापुढे सभागृहात अशी भाषेची आणि इतिहास पुरुषांच्या नावांची मोडतोड झाल्यास महाराष्ट्रभरातील मराठी प्रेमी आणि कष्टकरी रस्त्यावर उतरून तीव्र निषेध नोंदवतील.”

© २०२६ मॅक्स मंथन डेली न्यूज. सर्व हक्क राखीव.