चिखलात भवितव्य अन् हायवेवर जीव! पिंपळे गुरवमधील ‘शेवंताबाई जगताप’ शाळेचे काम ५ वर्षांपासून रखडले; लोकप्रतिनिधींच्या सोशल मीडिया स्टंटबाजीवर प्रदीप गायकवाड यांचा आक्रमक प्रहार

पिंपरी चिंचवड प्रतिनिधी आकाश कांबळे, २४ जून २०२६ मॅक्स मंथन डेली न्यूज:

पिंपरी: “पिंपरी-चिंचवड शहराला ‘स्मार्ट आणि प्रगत’ बनवण्याच्या वल्गना करणाऱ्या महानगरपालिका प्रशासनाला आणि स्थानिक लोकप्रतिनिधींना स्वतःच्याच नाकाखाली असणाऱ्या एका सरकारी शाळेची इमारत ५ वर्षांत उभी करता आलेली नाही. पिंपळे गुरव येथील ‘कै. शेवंताबाई खंडूजी जगताप शाळेचे’ बांधकाम अनेक वर्षांपासून रखडलेले आहे. या समस्येचा सातत्याने पाठपुरावा करूनही सुस्त प्रशासनाला आणि वातानुकूलित गाड्यांतून फिरणाऱ्या नेत्यांना जाग आलेली नाही. याउलट, आमदार, माजी नगरसेवक आणि संबंधित सामाजिक कार्यकर्ते हे केवळ पालिका अधिकाऱ्यांसोबत बांधकामाच्या ठिकाणी जाऊन पाहणी दौऱ्याचे फोटो काढतात आणि ते समाजमाध्यमांवर (सोशल मीडिया) प्रसारित करून स्वतःची पाठ थोपटून घेतात. पण या चिमुकल्यांचा जीव धोक्यात घालून प्रवास करताना त्यांच्या वेदनेची जाणीव या फोटोबहाद्दरांना कधी होणार?” असा अत्यंत तीव्र, खरमरीत आणि जळजळीत सवाल राष्ट्रवादी काँग्रेस पार्टी (अजित पवार गट) अर्बन सेलचे शहराध्यक्ष श्री. प्रदीप गायकवाड यांनी उपस्थित केला आहे.

पिंपळे गुरवमधील शेकडो विद्यार्थ्यांच्या रखडलेल्या शिक्षणाच्या आणि त्यांच्या रोजच्या जीवघेण्या प्रवासाच्या विरोधात प्रदीप गायकवाड यांनी थेट महापालिका आयुक्त डॉ. विजय सूर्यवंशी यांच्याकडे आक्रमक शब्दांत दाद मागितली असून, या प्रश्नाची कोंडी फोडण्यासाठी आता थेट पालकांना आणि विद्यार्थ्यांना सोबत घेऊन तीव्र जनआंदोलन छेडण्याचा आणि संपूर्ण प्रशासनाला कोंडीत पकडण्याचा इशारा दिला आहे.

शाळेची मूळ इमारत पूर्ण न झाल्यामुळे सध्या या जगताप विद्यालयातील चिमुकल्या विद्यार्थ्यांचे शिक्षण शेल पेट्रोल पंपाजवळील अत्यंत अपुऱ्या आणि पर्यायी शाळेत सुरू आहे. मात्र, हा पर्यायी मार्ग विद्यार्थ्यांसाठी अत्यंत जीवघेणा ठरत आहे.लांकाशीद पार्क, जवळकर नगर, अनंत नगर, प्रभात नगर, सुदर्शन नगर आणि थेट कासारवाडी अशा लांबच्या वस्त्यांमधून गोरगरीब कष्टकऱ्यांची लहान मुले-मुली दररोज या शाळेत पायी प्रवास करून येतात.  हा संपूर्ण रस्ता वाहनांच्या प्रचंड वर्दळीचा आहे. येथून अवजड वाहने, डंपर आणि सुसाट धावणारी वाहने अहोरात्र जात असतात. गतिरोधक नसल्याने या मार्गावर जीव मुठीत धरूनच चिमुकल्यांना चालावे लागते. “अधिकारी आणि लोकप्रतिनिधी स्वतःच्या आलिशान गाड्यांतून फिरताना गरिबांच्या या मुलांच्या अपघाती प्रवासाकडे डोळेझाक कशी काय करू शकतात?” असा संतप्त सवाल रहिवाशांनी विचारला आहे.

या रखडलेल्या बांधकामाच्या ठिकाणी महापालिकेच्या स्थापत्य विभागाने साधी पारदर्शकता राखलेली नाही. संपूर्ण परिसरात एकही अधिकृत माहिती फलक लावण्यात आलेला नाही, ज्यामुळे खालील गंभीर आणि संशयास्पद प्रश्न उपस्थित होत आहेत: १) ठेकेदाराचे नाव काय? या रखडलेल्या कामाचा मूळ ठेकेदार कोण आहे आणि त्याची ही संथ गती खपवून का घेतली जात आहे? २) बजेट आणि कालमर्यादा काय? हे काम नक्की किती कोट्यवधी रुपयांचे आहे, त्या कामाचा मूळ कालावधी किती निश्चित केला होता आणि मुदत संपल्यावरही काम का थांबले? ३) जागा मालकीचा वाद आहे का? या शाळेची जागा नक्की कोणाच्या मालकीची आहे? यात आणखी कोणी खाजगी भागीदार गुंतलेला आहे का?  अशा अनेक अनुत्तरीत प्रश्नांवर संबंधित सर्वच राजकीय नेते आणि अधिकारी संशयास्पदरीत्या मूग गिळून गप्प बसले आहेत.

प्रदीप गायकवाड यांनी महापालिकेच्या अंतर्गत प्रशासकीय विसंवादावर तीव्र हल्ला चढवला. ते म्हणाले, “या प्रलंबित कामाबाबत आम्ही जेव्हा स्थापत्य विभाग, शिक्षण मंडळ आणि क्षेत्रीय कार्यालयात लेखी निवेदने देतो किंवा थेट फोनवर संपर्क साधतो, तेव्हा अधिकाऱ्यांना काहीही फरक पडत नाही. ‘ते काम आमच्या अखत्यारीत येत नाही, ते दुसऱ्या विभागाचे काम आहे’ असे सांगत अधिकारी केवळ एकमेकांकडे बोट दाखवण्यात धन्यता मानत आहेत. जनतेच्या पैशातून गलेलठ्ठ पगार घेणाऱ्या या अधिकाऱ्यांची संवेदना आता संपूर्णपणे नष्ट झाली आहे.”

प्रशासनाला शेवटचा आणि आक्रमक इशारा देताना राष्ट्रवादी काँग्रेस अर्बन सेलचे शहराध्यक्ष प्रदीप गायकवाड म्हणाले:

“आम्ही वारंवार विनंत्या केल्या, निवेदने दिली; पण या मुजोर प्रशासनाला आणि फोटो सेशन करणाऱ्या आमदारांना सर्वसामान्यांच्या पोरांच्या जिवाशी काहीही देणेघेणे राहिलेले नाही. त्यामुळे आता केवळ विनंत्या करून हा प्रश्न सुटणार नाही. आता यावर एकच अंतिम आणि प्रभावी उपाय उरला आहे; तो म्हणजे पिंपळे गुरवमधील सर्व त्रस्त पालकांनी, सजग नागरिकांनी आणि स्वतः विद्यार्थ्यांनी एकत्र येऊन या रखडलेल्या इमारतीच्या दारातच संबंधित आमदार, स्थानिक माजी नगरसेवक, शिक्षण मंडळाचे ढिम्म अधिकारी आणि कडक शिस्तीचे दावे करणारे मनपा आयुक्त डॉ. विजय सूर्यवंशी यांना प्रत्यक्ष घेराव घालणे! जोपर्यंत ते काम पूर्ण करण्याचे अधिकृत लेखी आश्वासन आणि तारीख जाहीर करत नाहीत, तोपर्यंत आम्ही कोणालाही जागेवरून हलून देणार नाही. हाच या समस्येची कोंडी फोडण्याचा एकमेव मार्ग असून, लवकरच या विराट ‘घेराव आंदोलनाची’ तारीख जाहीर केली जाईल!”

आपला विश्वासू, प्रदीप गायकवाड शहराध्यक्ष, अर्बन सेल राष्ट्रवादी काँग्रेस पार्टी (मा. अजितदादा पवार गट), पिंपरी-चिंचवड.

© २०२६ मॅक्स मंथन डेली न्यूज. सर्व हक्क राखीव.