विषारी दारू प्रकरणातील बाधित कुटुंबांना सन्मानाने जगण्याची संधी मिळवून देणार; आमदार अण्णासाहेब बनसोडे आणि अण्णासाहेब बनसोडे युवा मंचाचे ॲड.अतिश लांडगे पीडित कुटुंबांना मोठा दिलासा
पिंपरी चिंचवड प्रतिनिधी लक्ष्मण प्रधान, २८ जून २०२६ मॅक्स मंथन डेली न्यूज:
पिंपरी चिंचवड : पिंपरी चिंचवड परिसरातील अत्यंत दुर्दैवी अशा विषारी दारू प्रकरणात मृत्युमुखी पडलेल्या नागरिकांच्या कुटुंबीयांना न्याय आणि भक्कम आधार देण्यासाठी ‘अण्णासाहेब बनसोडे युवा मंच’ व विधानसभेचे उपाध्यक्ष अण्णासाहेब बनसोडे,स्थानिक लोकप्रतिनिधी पूर्ण ताकदीने सरसावले आहेत. या दुःखद घटनेमुळे ज्या कुटुंबांनी आपला कर्ता पुरुष गमावला आहे, अशा बाधित कुटुंबांचे पालकत्व स्वीकारून त्यांना समाजात सन्मानाने जगण्याची संधी मिळवून देण्यासाठी आम्ही कटिबद्ध आहोत, असा ठाम निर्धार प्रसिद्ध कायदेतज्ज्ञ आणि सामाजिक नेते अॅड. अतिश लांडगे यांनी व्यक्त केला.
या पीडित कुटुंबांना केवळ तात्पुरती आर्थिक मदत न करता, त्यांचे कायमस्वरूपी पुनर्वसन करून त्यांना आर्थिकदृष्ट्या स्वावलंबी व स्थिर करण्यासाठी विधानसभा उपाध्यक्ष आमदार अण्णा बनसोडे व
अॅड. अतिश लांडगे यांच्या विशेष पुढाकाराने आज एक महत्त्वपूर्ण बैठक पार पडली. या बैठकीत अॅड. अतिश लांडगे यांनी सर्व बाधित कुटुंबीयांशी अत्यंत संवेदनशीलतेने सविस्तर संवाद साधला. त्यांच्या अडीअडचणी, कौटुंबिक व्यथा आणि भविष्यातील गरजा समजून घेत त्यांना धीर दिला.
पीडित कुटुंबांचे भविष्य सुरक्षित करण्यासाठी अॅड. अतिश लांडगे यांनी बैठकीमध्ये उपस्थित योग्य त्या शासकीय व सामाजिक यंत्रणेला आवश्यक त्या सूचना दिल्या. या अंतर्गत मृत व्यक्तींच्या पत्नींना त्यांच्या शैक्षणिक पात्रतेनुसार तातडीने सन्मानजनक रोजगार उपलब्ध करून देणे, तसेच त्यांच्या मुलांचे शिक्षण कोणत्याही परिस्थितीत खंडित होऊ न देणे आणि त्यासाठी आवश्यक ती सर्व शासकीय मदत विनाविलंब मिळवून देण्याबाबत संबंधित विभागांना निर्देश देण्यात आले.
याशिवाय, ‘अण्णासाहेब बनसोडे युवा मंच’ या सामाजिक संस्थेच्या माध्यमातून सर्व बाधित कुटुंबातील मुलांच्या पहिलीपासूनच्या पुढील उच्च शिक्षणासाठी लागणारी सर्व शैक्षणिक मदत, फी व इतर साहित्य मंचाच्या वतीने पुरविण्यात येणार असल्याची घोषणाही यावेळी करण्यात आली. पीडित कुटुंबीयांना न्याय, आधार आणि पुन्हा उभे राहण्याची ताकद देण्यासाठी आम्ही शेवटपर्यंत त्यांच्या पाठीशी खंबीरपणे उभे राहू, अशी ग्वाही अॅड. अतिश लांडगे यांनी दिली.
बाधित कुटुंबांना आधार देण्यासाठी आयोजित केलेल्या या महत्त्वपूर्ण बैठकीला विधान परिषदेचे उपाध्यक्ष तथा आमदार अण्णासाहेब बनसोडे,पिंपरी चिंचवड महानगरपालिकेचे नगरसेवक सिद्धार्थ बनसोडे, स्थानिक नगरसेविका स्वाती उर्फ माई काटे, नगरसेविका प्रतीक्षा लांघी, अॅड. अतिश लांडगे, ज्येष्ठ सामाजिक कार्यकर्ते रवी कांबळे यांच्यासह स्थानिक नागरिक आणि परिसरातील महिला मोठ्या संख्येने उपस्थित होत्या. अॅड. अतिश लांडगे यांनी घेतलेल्या या संवेदनशील पुढाकारामुळे आणि अण्णासाहेब बनसोडे युवा मंचाच्या मदतीमुळे या कठीण प्रसंगात पीडित कुटुंबांना मोठा मानसिक व सामाजिक दिलासा मिळाला आहे.
© २०२६ मॅक्स मंथन डेली न्यूज. सर्व हक्क राखीव.
