पिंपरी चिंचवडमध्ये मराठा सेवा संघ व संभाजी ब्रिगेडच्या वतीने ‘लोकराज्य दिन’ प्रचंड उत्साहात साजरा; के.एस.बी. चौकात राजर्षी शाहू महाराजांना अभिवादन

पिंपरी चिंचवड प्रतिनिधी लक्ष्मण प्रधान , २९ जून २०२६ मॅक्स मंथन डेली न्यूज:

पिंपरी चिंचवड : मराठा सेवा संघ आणि संभाजी ब्रिगेडच्या वतीने बहुजन प्रतिपालक, लोकराजा राजर्षी छत्रपती शाहू महाराज यांचा जयंती दिवस ‘लोकराज्य दिन’ म्हणून पिंपरी चिंचवड शहरात प्रचंड उत्साहात आणि सामाजिक सलोख्याच्या वातावरणात साजरा करण्यात आला. २६ जून रोजी चिंचवड येथील के.एस.बी. चौकात असलेल्या राजर्षी शाहू महाराजांच्या पूर्णाकृती पुतळ्यास मराठा सेवा संघाचे पिंपरी चिंचवड शहराध्यक्ष इंजी. आबासाहेब ढवळे यांच्या हस्ते पुष्पहार अर्पण करून अभिवादन करण्यात आले. यावेळी उपस्थित शेकडो समाज बांधवांनी राजर्षी छत्रपती शाहू महाराजांचा जयघोष करत संपूर्ण परिसर दुमदुमून टाकला.

भारतरत्न डॉ. बाबासाहेब आंबेडकर यांनी ‘माझा वाढदिवस तुम्ही साजरा केला नाही तरी चालेल; पण राजर्षी शाहू महाराजांचा जन्मदिवस हा दिवाळीसारखा अत्यंत धूमधडाक्यात साजरा करा’ असे आवाहन केले होते. डॉ. बाबासाहेबांच्या या आदेशाला प्रमाण मानून मराठा सेवा संघ आणि संभाजी ब्रिगेडच्या वतीने दरवर्षीप्रमाणे याही वर्षी शहरात शाहू जयंतीचा भव्य सोहळा पार पडला.

याप्रसंगी संभाजी ब्रिगेडचे शहराध्यक्ष प्रवीण कदम यांनी उपस्थित समाज बांधवांना राजर्षी शाहू महाराजांचा जीवन संघर्ष आणि त्यांचे विचार थोडक्यात समजावून सांगितले. ते म्हणाले की, “राजर्षी छत्रपती शाहू महाराजांचे धार्मिक, शैक्षणिक, आर्थिक, कृषी विषयक आणि सामाजिक ऐक्याचे धोरण अत्यंत पुरोगामी होते. आजच्या आधुनिक काळातही समाजातील ऐक्य आणि सामाजिक सलोखा टिकवून ठेवण्यासाठी शाहू महाराजांच्या विचारांची देशाला नितांत गरज आहे.”

 कार्यक्रमात ज्येष्ठ सामाजिक कार्यकर्ते मानवजी कांबळे यांनी शाहू महाराजांच्या जीवनातील एक हृदयस्पर्शी आणि ऐतिहासिक प्रसंग उलगडला. ते म्हणाले की, “कोल्हापुरात गंगाराम कांबळे नावाच्या एका दलित युवकाने हॉटेलचा व्यवसाय सुरू केला होता, परंतु तत्कालीन अस्पृश्यतेमुळे तिथे चहा पिण्यासाठी कोणीही जात नसे. ही गोष्ट जेव्हा शाहू महाराजांना समजली, तेव्हा त्यांनी राजदरबारातील सर्व अधिकाऱ्यांना सोबत घेतले आणि थेट गंगाराम कांबळे यांच्या हॉटेलवर जाऊन स्वतः फक्कड चहाची चव घेतली. राजा स्वतः तिथे चहा पित असल्याची वार्ता करवीर नगरीत पसरताच जनतेच्या मनातील सामाजिक विषमतेची भावना गळून पडली आणि लोक तिथे जाऊ लागले. यातून समाजात खऱ्या अर्थाने बंधुभाव निर्माण झाला. हाच आदर्श आजच्या राज्यकर्त्यांनी व सामाजिक कार्यकर्त्यांनी घेणे गरजेचे आहे.”

 पिंपरी चिंचवड महानगरपालिकेच्या वतीने सध्या के.एस.बी. चौक येथे भव्य ‘शाहू सृष्टी’ उभारण्याचे काम वेगाने सुरू आहे. या शाहूसृष्टीमध्ये राजर्षी छत्रपती शाहू महाराज हे गंगाराम कांबळे यांच्या हॉटेलमध्ये चहा पित असतानाचे ऐतिहासिक तैलचित्र (Mural/Painting) लावण्यात यावे. या तैलचित्राच्या माध्यमातून शाहू महाराजांच्या समतावादी विचार आणि कार्याला खऱ्या अर्थाने न्याय मिळेल, अशी आग्रही मागणी मराठा सेवा संघाचे शहराध्यक्ष इंजी. आबासाहेब ढवळे यांनी मराठा सेवा संघाच्या वतीने महापालिका प्रशासनाकडे केली आहे.

या ऐतिहासिक जयंती उत्सवासाठी मराठा सेवा संघाचे इंजी. अशोकराव सातपुते, शहर उपाध्यक्ष वसंतराव पाटील, सखाराम ईके, संघटक बबन प्रभुणे उपस्थित होते. तसेच संभाजी ब्रिगेडचे शहर कार्याध्यक्ष आप्पासाहेब चांदवडे, उपाध्यक्ष तेजस गवई, सचिव श्रीकांत गोरे, सहसचिव सदाशिव लोभे, कोषाध्यक्ष राजेश सातपुते, शहर संघटक अर्जुन मोरे, विनोद माने यांच्यासह अनेक कार्यकर्ते आणि शिव-शाहूप्रेमी नागरिक मोठ्या संख्येने उपस्थित होते.

© २०२६ मॅक्स मंथन डेली न्यूज. सर्व हक्क राखीव.