मराठवाडा जनविकास संघाचे सात टँकर पालखी सोहळ्यातील वारकऱ्यांच्या सेवेत; संत-महंतांच्या हस्ते जलपूजन अन् ५०० हून अधिक वृक्षारोपणाचे वाटप!
पिंपरी चिंचवड प्रतिनिधी लक्षण प्रधान , ६ जुलै २०२६ मॅक्स मंथन डेली न्यूज:
पिंपरी-चिंचवड: संतश्रेष्ठ श्री संत ज्ञानेश्वर महाराज आणि जगद्गुरू श्री संत तुकाराम महाराज यांच्या आषाढी पालखी सोहळ्याचे प्रस्थान अवघ्या दोन दिवसांवर आले असताना, वारीमध्ये सहभागी होणाऱ्या लाखो वारकरी बांधवांसाठी पिंपरी-चिंचवडमधून एक अत्यंत कौतुकास्पद आणि सेवाभावी उपक्रम समोर आला आहे. दरवर्षीप्रमाणे यंदाही ‘मराठवाडा जनविकास संघा’च्या वतीने पालखी सोहळ्यातील वारकऱ्यांची तहान भागवण्यासाठी ७ भव्य पाण्याच्या टँकर्सची व्यवस्था करण्यात आली आहे. पिंपळे गुरव येथे आयोजित एका विशेष कार्यक्रमात उपस्थित संत-महंत आणि मान्यवरांच्या हस्ते या जलटँकर्सचे विधीवत पूजन करून ते पंढरपूर वारीसाठी रवाना करण्यात आले.
या मंगल प्रसंगी विविध दिंडी प्रमुखांचा पारंपरिक पद्धतीने सत्कार करण्यात आला, तसेच पर्यावरण रक्षणाचा संदेश देत ५०० हून अधिक वृक्षांच्या रोपांचे मोफत वाटप करण्यात आले.
पिंपळे गुरव येथे पार पडलेल्या या सोहळ्यात उद्योजक बाळासाहेब काटे, ह.भ.प. ज्ञानेश्वर (छोटे माऊली) कदम महाराज, श्री क्षेत्र भंडारा डोंगर देवस्थान ट्रस्टचे अध्यक्ष ह.भ.प. बाळासाहेब काशीद पाटील, विश्वस्त ह.भ.प. जगन्नाथ नाटक पाटील, ह.भ.प. तांदळे महाराज, ह.भ.प. बब्रुवान वाघ महाराज, मराठवाडा जनविकास संघाचे अध्यक्ष अरुण पवार, ह.भ.प. बाळासाहेब शेटे, ह.भ.प. दिलीप पडवळ, राष्ट्रीय शिव कीर्तनकार प्रा. डॉ. गजानन वाव्हळ महाराज, सीआरपीएफ जवान उमेश मिसाळ, वारकरी सेवा संघाचे सचिव सौरभ शिंदे आणि न्यायाधीश रमेश उमरगेकर यांच्या हस्ते टँकरचे पूजन करण्यात आले. याप्रसंगी उपस्थित सर्व दिंडी प्रमुख व भाविकांचा टोपी, उपरणे, ‘श्री तुकाराम गाथा’ आणि ‘ज्ञानेश्वरी’ ग्रंथ देऊन सन्मान करण्यात आला.
मराठवाडा जनविकास संघाचे हे सात पाण्याचे टँकर संपूर्ण वारी मार्गावर वारकऱ्यांना शुद्ध पिण्याचे पाणी पुरवणार आहेत. यामध्ये आळंदी ते पंढरपूर मार्ग: सोपानकाका कराडकर दिंडी क्र. ११, स्वयंभू श्रीराम प्रभू दिंडी क्र. ३३६, कमळेश्वर दिंडी, कै. ह.भ.प. धोंडुजीबुवा चिझघरकर दिंडी क्र. १८ (सालगांवकर) आणि ह.भ.प. बाबूराव तांदळे महाराज दिंडी क्र. १९७ च्या सोबत हे टँकर असतील. देहू ते पंढरपूर मार्ग: श्रीक्षेत्र नवलाख उंब्रे (मावळ), श्री क्षेत्र भंडारा डोंगर प्रासादिक दिंडी (हवेली तालुका दिंडी क्र. २१ च्या मागे) आणि श्री रोकडोबा दादा दिंडी क्र. २० (रथापुढे) या दिंड्यांसोबत पंढरपूरपर्यंत ही जलसेवा अखंड सुरू राहील.
“मराठवाडा जनविकास संघाच्या माध्यमातून अखंडपणे सुरू असलेल्या या लोकसेवेचे हे यंदाचे दशकपूर्ती वर्ष (१० वे वर्ष) आहे. वारी मार्गावर वारकऱ्यांना मोफत आणि शुद्ध पिण्याच्या पाण्याची सेवा मिळावी हाच आमचा प्रामाणिक उद्देश आहे. निसर्गाचा समतोल राखण्यासाठी आम्ही जलसेवेसोबतच ५०० हून अधिक वृक्षदानाचा संकल्प केला आहे.”
– अरुण पवार, अध्यक्ष, मराठवाडा जनविकास संघ
या प्रसंगी ह.भ.प. छोटे माऊली कदम महाराज, प्रा. डॉ. गजानन वाव्हळ महाराज आणि ह.भ.प. बब्रुवान वाघ महाराज यांनी अरुण पवार यांच्या सामाजिक, राष्ट्रीय आणि पर्यावरणीय कार्याचे भरभरून कौतुक केले. वारीत तहानलेल्यांना पाणी देणे आणि सृष्टीसाठी वृक्ष लावणे हीच खरी ईश्वरसेवा असल्याचे त्यांनी सांगितले. या सामाजिक कार्यात खारीचा वाटा म्हणून स्थानिक हास्ययोग परिवार, नवचैतन्य हास्य क्लबच्या ज्योती कांबळे, संगीता माने, हेमलता कुंभार, शोभाताई माने, उज्ज्वला टिळेकर आदि महिला भगिनींनी सढळ हाताने आर्थिक मदत सुपूर्द केली.
या सोहळ्याप्रसंगी कॅप्टन युवराज माने, ह.भ.प. बाळासाहेब शितोळे, आशिष पवार, ह.भ.प. संजय ढोरे, अर्जुन खामकर, ह.भ.प. अशोक ढोरे, वामन भरगंडे, किशोर अट्टरगेकर, बालाजी पांचाळ, अनिता पांचाळ, दत्तात्रय धोंडगे, बाळासाहेब साळुंके, मोहम्मदशरीफ मुलानी, नागनाथ लोंढे, नंदकुमार धुमाळ, शिवाजी घोडके उपस्थित होते. तसेच विजयराज नागरी पतसंस्थेचे संचालक सूर्यकांत कुरूलकर, व्यवस्थापक युवराज नलावडे, सकाराम वालकोळी, सोमेश्वर झुमके, भैरवनाथ ज्येष्ठ नागरिक संघ, संत गाडगेबाबा ज्येष्ठ नागरिक संघ, नवचैतन्य हास्य क्लब (राजमाता गार्डन ग्रुप) आणि हास्ययोग परिवार संघाचे सर्व पदाधिकारी, दिंडी प्रमुख व विठ्ठलभक्त मोठ्या संख्येने उपस्थित होते.
© २०२६ मॅक्स मंथन डेली न्यूज. सर्व हक्क राखीव.
