पिंपरी चिंचवड: वातावरणातील बदलामुळे सध्या शहरात तापाच्या रुग्णसंख्येत वाढ होण्याची शक्यता असून, स्वाईन फ्लूसारख्या संसर्गजन्य आजारांचा प्रादुर्भाव वाढू शकतो. या पार्श्वभूमीवर नागरिकांनी घाबरून न जाता आवश्यक ती प्रतिबंधात्मक काळजी घ्यावी, असे आवाहन पिंपरी-चिंचवड महानगरपालिकेच्या माहिती व जनसंपर्क आणि वैद्यकीय विभागाच्या वतीने करण्यात आले आहे.

ताप, सर्दी, खोकला, घसादुखी किंवा श्वसनाशी संबंधित लक्षणे आढळल्यास त्याकडे दुर्लक्ष न करता तातडीने वैद्यकीय सल्ला घेण्याचे निर्देश प्रशासनाने दिले आहेत.

पिंपरी-चिंचवड महानगरपालिका कार्यक्षेत्रात १ जानेवारी २०२६ पासून इन्फ्लुएंझा H1N1 (स्वाईन फ्लू) बाधित एकूण १९ रुग्ण आढळून आले आहेत. मात्र, योग्य वेळी घेतलेला वैद्यकीय सल्ला आणि प्रशासनाच्या सतर्कतेमुळे या कालावधीत एकही जीवितहानी झालेली नाही, ही दिलासादायक बाब आहे.

नागरिकांनी आजाराच्या लक्षणांबाबत अनावश्यक भीती न बाळगता वेळेत नजीकच्या मनपा दवाखान्यात किंवा रुग्णालयात तपासणी करून घ्यावी, जेणेकरून प्रभावी उपचार करणे शक्य होईल.

महापालिकेच्या वैद्यकीय विभागाने नागरिकांना प्रतिबंधात्मक उपाययोजनांचे तंतोतंत पालन करण्याचे आवाहन केले आहे. वारंवार साबण आणि स्वच्छ पाण्याने हात धुवावेत. खोकताना किंवा शिंकताना नाक व तोंड रुमालाने अथवा टिश्यूने झाकावे. गर्दीच्या ठिकाणी जाणे शक्यतो टाळावे आणि आवश्यकता भासल्यास मास्कचा वापर करावा.  शरीराला पुरेशी झोप व विश्रांती द्यावी. आहारात लिंबू, आवळा, मोसंबी, संत्री तसेच हिरव्या पालेभाज्यांचा समावेश करावा आणि पुरेसे पाणी प्यावे. ताप, सर्दी, खोकला जाणवल्यास स्वतः औषधे न घेता डॉक्टरांच्या सल्ल्यानुसारच उपचार करावेत. धूम्रपान पूर्णपणे टाळावे.

नागरिकांच्या आरोग्याची काळजी घेत पिंपरी-चिंचवड महानगरपालिकेच्या सर्व रुग्णालयांमध्ये आणि दवाखान्यांमध्ये स्वाईन फ्लूच्या उपचारासाठी आवश्यक असलेली सर्व औषधे व वैद्यकीय सुविधा सज्ज ठेवण्यात आल्या आहेत. वातावरणातील बदलाच्या काळात नागरिकांनी स्वतःच्या व कुटुंबाच्या आरोग्याची काळजी घेऊन महापालिकेस सहकार्य करावे, असे आवाहन वैद्यकीय विभागाने केले आहे.