पिंपरी-चिंचवड : येथे भीमशक्ती सामाजिक संघटनेच्या वतीने परिवर्तनवादी ज्येष्ठ गीतकार, महाकवी लोकशाहीर वामनदादा कर्डक यांची जयंती सोहळा अत्यंत उत्साही व गरिमापूर्ण वातावरणात साजरा करण्यात आला. समाजात परिवर्तन घडवणाऱ्या आणि शोषित-वंचितांच्या हक्कांना आपल्या काव्यातून वाचा फोडणाऱ्या वामनदादांच्या विचारांचा जागर या कार्यक्रमाच्या माध्यमातून करण्यात आला.

कार्यक्रमासाठी प्रमुख पाहुण्या म्हणून दक्षिण मुंबई काँग्रेस जिल्हा अध्यक्षा तथा भीमशक्ती संघटनेच्या धडाडीच्या युवा नेत्या ॲड. प्रज्योती हंडोरे उपस्थित होत्या. त्यांनी वामनदादा कर्डक यांच्या प्रतिमेस पुष्पहार अर्पण करून विनम्र अभिवादन केले. याप्रसंगी त्यांच्या हस्ते विविध क्षेत्रांत उल्लेखनीय कार्य करणाऱ्या मान्यवरांना “वामनदादा कर्डक गुणगौरव पुरस्कार” देऊन विशेष सन्मानित करण्यात आले.

भीमशक्ती सामाजिक संघटनेचे पिंपरी-चिंचवड शहराध्यक्ष सुरज गायकवाड यांनी आपल्या सहकाऱ्यांच्या साथीने या सोहळ्याचे अत्यंत भव्य व नियोजनबद्ध आयोजन केले होते. सुरज गायकवाड हे पिंपरी-चिंचवड शहर परिसरात सामाजिक, शैक्षणिक व सांस्कृतिक क्षेत्रात सातत्याने उत्कृष्ट कार्य करत असून, सर्वसामान्यांच्या प्रश्नांवर नेहमीच हिरीरीने धावून जातात. त्यांच्या याच कर्तव्यदक्ष आणि अभ्यासू वृत्तीमुळे शहरात त्यांचा मोठा जनसंपर्क निर्माण झाला आहे. या जयंती सोहळ्याच्या अभूतपूर्व यशामागे सुरज गायकवाड व त्यांच्या टीमचे विशेष प्रयत्न लाभले, ज्याचे उपस्थितांनी मनापासून कौतुक केले.

या दिमाखदार सोहळ्यास चित्रपट क्षेत्रातील प्रसिद्ध अभिनेत्री रोजलीन खान, पिंपरी-चिंचवड मनपाच्या माजी नगरसेविका चंद्रकांताताई सोनकांबळे, प्राचार्य वृषाली रणधीर, प्राचार्य रमेश रणदिवे, प्राचार्य मेघना भोसले, प्राचार्य शिल्पा गायकवाड, भीमशक्ती पुणे शहर अध्यक्ष विजय हिंगे यांच्यासह भीमशक्ती संघटनेचे सर्व प्रमुख पदाधिकारी, कार्यकर्ते व नागरिक मोठ्या संख्येने उपस्थित होते.

कार्यक्रमाच्या यशस्वीतेबद्दल सुरज गायकवाड यांनी उपस्थितांचे व सहकाऱ्यांचे मनःपूर्वक आभार मानले व वामनदादांच्या पुरोगामी विचारांवर चालत सामाजिक कार्य अधिक जोमाने पुढे नेण्याचा संकल्प व्यक्त केला.