दापोडी / पिंपरी: आजच्या डिजिटल युगात मोबाईल, ऑनलाइन गेम्स आणि सोशल मीडियाच्या अतिवापरामुळे विद्यार्थ्यांचा पुस्तकांशी असलेला संपर्क कमी होत चालला आहे. विद्यार्थ्यांनी मोबाईलचा वापर व खेळाचा वेळ मर्यादित करून दररोज किमान अर्धा ते एक तास वाचनासाठी द्यावा, असे आग्रही आवाहन सांगवीचे सामाजिक कार्यकर्ते सुनील पोकरे यांनी केले.

सरस्वती अनाथ शिक्षण आश्रम, दापोडी येथील विद्यार्थ्यांमध्ये वाचनाची आवड निर्माण व्हावी आणि वाचनसंस्कृती वाढीस लागावी, या उद्देशाने आयोजित विशेष कार्यक्रमात ते बोलत होते.

विद्यार्थ्यांना मार्गदर्शन करताना सुनील पोकरे म्हणाले की, “विद्यार्थ्यांनी दररोज अवांतर पुस्तके, चरित्रे, आत्मचरित्रे, वर्तमानपत्रे आणि ज्ञानवर्धक साहित्याचे वाचन केले पाहिजे. वाचनामुळे केवळ ज्ञानच वाढत नाही, तर विचार करण्याची क्षमता विकसित होते, शब्दसंग्रह समृद्ध होतो आणि सर्वांगीण व्यक्तिमत्त्व विकास घडतो.”

यावेळी त्यांनी भारतरत्न डॉ. बाबासाहेब आंबेडकर यांच्या “वाचाल तर वाचाल” या विचारसूत्राचा दाखला देत वाचनाचे महत्त्व अधोरेखित केले. तसेच माजी राष्ट्रपती व महान शास्त्रज्ञ डॉ. ए. पी. जे. अब्दुल कलाम यांच्या जीवन संदेशाचे स्मरण करून विद्यार्थ्यांनी सतत वाचन करून मोठी स्वप्ने पाहावीत व ती पूर्ण करण्यासाठी प्रयत्न करावेत, असा मोलाचा संदेश दिला.

विद्यार्थ्यांना प्रेरित करताना पोकरे यांनी स्वतःच्या आयुष्यातील संघर्षाचे उदाहरण दिले. “सुमारे ४० ते ४५ वर्षांपूर्वी अत्यंत गरिबीमुळे मला शिक्षण अर्धवट सोडून नोकरी करावी लागली होती. मात्र, ‘शिक्षणाचे माहेरघर’ असलेल्या पुण्यात आल्यावर मी शिक्षणाची जिद्द सोडली नाही. रात्रीच्या महाविद्यालयात (Night College) प्रवेश घेऊन स्वाध्याय महाविद्यालय, पुणे येथून बी.ए.ची पदवी प्राप्त केली. त्यानंतर शिक्षणाची आवड आणि सतत शिकण्याच्या वेडातून मी तब्बल चार विषयांत पदव्युत्तर (Post Graduation) शिक्षण पूर्ण केले. जिद्द आणि चिकाटी असेल तर परिस्थितीवर मात करून शिक्षण घेता येते,” असे सांगत त्यांनी विद्यार्थ्यांना अभ्यासासाठी प्रोत्साहित केले.

कार्यक्रमाच्या सुरुवातीला आश्रमाचे शिक्षक महादेव गायकवाड यांनी प्रास्ताविक केले व उपस्थितांचे स्वागत केले. या सोहळ्यात आश्रमातील सर्व विद्यार्थ्यांना महाराष्ट्रातील थोर संतांची ज्ञानवर्धक पुस्तके आणि कॅडबरी चॉकलेटचे वाटप करण्यात आले.

सरस्वती अनाथ शिक्षण आश्रमाचे अध्यक्ष देविदास लक्ष्मण सुरवसे यांनी सामाजिक कार्यकर्ते सुनील पोकरे यांना वाढदिवसाच्या स्नेहमयी शुभेच्छा दिल्या. हा कार्यक्रम यशस्वी करण्यासाठी अध्यक्ष देविदास सुरवसे, शिक्षक महादेव गायकवाड, अधीक्षक सागर भोई आणि सहायक दिनकर कांबळे यांनी विशेष परिश्रम घेतले.