वाकड / भूगाव: निसर्गाच्या सानिध्यात मौज, मजा आणि आनंदाचा अविट अनुभव घेण्यासाठी आनंद ज्येष्ठ नागरिक संघ (पोस्टल कॉलनी, वाकड) यांच्या वतीने भूगाव-पौड रोड येथील ‘निसर्ग छाया फाउंडेशन’ येथे भव्य एकदिवसीय सहलीचे यशस्वी आयोजन करण्यात आले होते. या सहलीमुळे वाकड परिसरातील ४४ ज्येष्ठ नागरिकांना दैनंदिन दिनचर्येतून वेगळा विरंगुळा मिळून त्यांच्या लहानपणीच्या आठवणी ताज्या झाल्या.

महाराष्ट्र राज्याचे नामदार चंद्रकांत दादा पाटील यांच्या संकल्पनेतून साकारलेले ‘निसर्ग छाया फाउंडेशन’ हे निसर्गाच्या कुशीत वसलेले एक निसर्गरम्य ठिकाण आहे. या फाउंडेशनच्या व्यवस्थापनाची जबाबदारी मंदार देगावकर आणि अमृता देगावकर अत्यंत तत्परतेने पाहत आहेत.

या सहलीमध्ये १९ पुरुष आणि २५ महिला मिळून एकूण ४४ ज्येष्ठ नागरिक सहभागी झाले होते. निसर्ग छाया फाउंडेशनच्या वास्तुत प्रवेश करताच प्रसन्न वातावरणामुळे सर्वांचा प्रवासाचा थकवा क्षणात निघून गेला. संस्थेच्या वतीने चहा, नाश्ता आणि भोजनाची उत्तम व चविष्ट सोय करण्यात आली होती.

दिवसभर ज्येष्ठ नागरिकांसाठी विविध रंजक व मनोरंजनात्मक खेळांचे आयोजन करण्यात आले होते. खेळ व स्पर्धा संगीत खुर्ची, पासिंग द रिंग, फुगे, डंबेल यांसारखे विविध खेळ घेण्यात आले. कला व संगीत गाणी, भजन आणि डान्सच्या तालावर सर्व ज्येष्ठ नागरिक मनसोक्त थिरकले.

‘लहानपण देगा देवा, मुंगी साखरेचा रवा’ या उक्तीप्रमाणे सर्व ज्येष्ठ नागरिक स्वतःचे वय विसरून बालपणाच्या आनंदात पूर्णपणे रंगून गेले होते.

दिवसभर निसर्गाच्या सानिध्यात धमाल, मज्जा आणि भरपूर आनंद लुटल्यानंतर संध्याकाळी सर्व सभासदांनी अत्यंत समाधानाने वाकडच्या दिशेने परतीचा प्रवास सुरू केला. उत्तम नियोजन आणि आदरातिथ्यामुळे ही सहल सर्व ज्येष्ठ नागरिकांच्या कायमस्वरूपी स्मरणात राहणारी ठरली आहे.