अंबाजोगाई (बीड) : अमरावती येथील ज्येष्ठ लेखिका, सामाजिक कार्यकर्त्या व महाराष्ट्र अंधश्रद्धा निर्मूलन समितीच्या सदस्या रजियाताई सुलताना लिखित ‘देवळाचा धर्म व धर्माची मस्जिद’ हे नूतन प्रकाशित पुस्तक महाराष्ट्र अंधश्रद्धा निर्मूलन समितीच्या (अंनिस) राज्य कार्यकारिणीच्या पदाधिकाऱ्यांना भेट देण्यात आले. अंबाजोगाई (जि. बीड) येथील मानवलोक समाजकार्य महाविद्यालयात आयोजित ‘अंनिस’च्या दोन दिवसीय राज्य कार्यकारिणी बैठकीदरम्यान हा उपक्रम पार पडला.

महाराष्ट्र अंधश्रद्धा निर्मूलन समितीच्या वतीने दर चार महिन्यांनी राज्य कार्यकारिणीची बैठक आयोजित केली जाते. १२ आणि १३ सप्टेंबर २०२६ रोजी पार पडलेल्या या बैठकीत राज्यातील विविध शाखांच्या कार्याचा आढावा, संघटनात्मक बळकटीकरण आणि आगामी उपक्रमांवर सखोल चर्चा करण्यात आली.

रजियाताई सुलताना यांच्या ‘देवळाचा धर्म व धर्माची मस्जिद’ या पुस्तकातून धर्म, समाज आणि विवेकवादी विचारांच्या अनुषंगाने परखड व प्रबोधनात्मक मांडणी करण्यात आली आहे. अत्यंत महत्त्वाचे म्हणजे, हे पुस्तक त्यांनी प्रबोधनकार केशव सीताराम ठाकरे आणि शहीद डॉ. नरेंद्र दाभोलकर या दोन महान सुधारकांना समर्पित केले आहे. समाजात अंधश्रद्धा, कर्मकांड आणि धार्मिक अंधतेविरोधात चिकित्सक बुद्धी व वैज्ञानिक दृष्टिकोन निर्माण करण्यासाठी हे लेखन अत्यंत प्रभावी ठरेल, असा विश्वास या वेळी व्यक्त करण्यात आला.

अमरावतीचे अंनिस जिल्हाकार्याध्यक्ष प्रफुल्ल मंदा श्रीधर आणि जिल्हा प्रधानसचिव विजय डवरे यांच्या हस्ते ‘अंनिस’च्या प्रमुख राज्य पदाधिकाऱ्यांना हे पुस्तक सप्रेम भेट देण्यात आले. यामध्ये माधव बावगे (राज्याध्यक्ष, महा. अंनिस) , संजय बनसोडे (राज्य कार्याध्यक्ष) , विनायक सावळे (राज्य प्रधानसचिव) , टी. आर. गोराने, रुकसाना मुल्ला, आरती नाईक (राज्य पदाधिकारी) , अशोक निकम (राज्य कार्यवाह) , प्राचार्य, मानवलोक समाजकार्य महाविद्यालय, अंबाजोगाई

या प्रसंगी मनोगत व्यक्त करताना अंनिसच्या पदाधिकाऱ्यांनी सांगितले की, पुस्तकाच्या माध्यमातून विवेकवादी विचार, वैज्ञानिक दृष्टिकोन आणि सामाजिक प्रबोधनाचा संदेश समाजात अधिक व्यापकपणे पोहोचवला जाईल. ‘विवेकाचा आवाज बुलंद करूया!’ या विचाराने प्रेरित होऊन वाचन, लेखन आणि प्रबोधनाच्या माध्यमातून समाजात चिकित्सक विचार रुजविण्याची चळवळ अधिक तीव्र करण्याचा निर्धार या वेळी व्यक्त करण्यात आला.