पिंपरी: पिंपरी चिंचवड महानगरपालिका आयोजित ‘अभिजात मराठी भाषा सप्ताह’ या उपक्रमांतर्गत चिखली टाऊन हॉल येथे सोमवारी महापालिका शाळांमधील विद्यार्थ्यांसाठी ‘ग्रीझीच्या दुनियेत चिंटूची धमाल’ या बालनाट्याचे सादरीकरण करण्यात आले. लहान मुलांसाठी विशेष मनोरंजनात्मक स्वरूपाच्या या बालनाट्याला विद्यार्थ्यांनी तुफान प्रतिसाद दिला.

नाटकातील विनोदी प्रसंग, ग्रीझी अस्वल आणि चिंटू यांच्यातील धमाल जुगलबंदी, मजेदार गाणी आणि नृत्यामुळे संपूर्ण वातावरणात हास्य आणि उत्साहाचे रंग भरले.

या बालनाट्याचे प्रमुख आकर्षण म्हणजे त्यासाठी उभारण्यात आलेले भव्य आणि रंगीत नेपथ्य ठरले. बालमनाला आकर्षित करणाऱ्या रंगसंगती आणि दृश्यरचनेमुळे नाटकातील कल्पनाविश्व अधिक प्रभावीपणे विद्यार्थ्यांसमोर उभे राहिले.

हास्य, गाणी, उत्कृष्ट प्रकाशयोजना आणि ग्रीझी-चिंटूच्या धमाल प्रसंगांनी रंगलेल्या या बालनाट्याचा महापालिका शाळांमधील शेकडो विद्यार्थ्यांनी मनसोक्त आनंद लुटला. अभिजात मराठी भाषा सप्ताहातील या उपक्रमामुळे विद्यार्थ्यांच्या चेहऱ्यावर हास्य फुलले आणि मराठी रंगभूमीशी त्यांचा अत्यंत मनोरंजक पद्धतीने परिचय झाला.

बालनाट्यानंतर चिखली टाऊन हॉल येथे ‘सा रे ग म प’ फेम गायक ज्ञानेश्वर मेश्राम, गायिका कल्याणी देशपांडे आणि सहकाऱ्यांचा अभंग व भक्तीगीतांचा ‘अभंगवारी’ हा सांगीतिक कार्यक्रम सादर करण्यात आला.

संतपरंपरेतील अभंग, भावपूर्ण भक्तीगीते आणि त्यातून व्यक्त होणारी अध्यात्मिक भावना यांमुळे चिखली टाऊन हॉल भक्तिरसात न्हाऊन निघाला. अभिजात मराठी भाषा सप्ताहाच्या निमित्ताने आयोजित या कार्यक्रमामुळे मराठी भाषेच्या सांस्कृतिक आणि भक्तिसंगीताच्या समृद्ध परंपरेचा अनुभव उपस्थितांनी घेतला.