पिंपरी: भारतीय चित्रपटसृष्टी आणि नाट्यक्षेत्रातील ज्येष्ठ व प्रतिभावंत अभिनेते कै. नाना पाटेकर यांना राष्ट्रवादी काँग्रेस पार्टीच्या वतीने पिंपळे गुरव येथे भावपूर्ण श्रद्धांजली अर्पण करण्यात आली. पिंपळे गुरव येथील ‘नटसम्राट निळू फुले नाट्यगृहात’ या शोकसभेचे आयोजन करण्यात आले होते. या प्रसंगी विविध क्षेत्रांतील मान्यवरांनी कै. नाना पाटेकर यांच्या कला क्षेत्रातील व सामाजिक योगदानाच्या आठवणींना उजाळा दिला.

शोकसभेत बोलताना पिंपरी-चिंचवड महापालिकेच्या स्थायी समितीचे माजी सभापती अतुल शितोळे म्हणाले, “नाना पाटेकर यांनी अत्यंत सामान्य मध्यमवर्गीय कुटुंबातून येत, कोणतीही नाट्य किंवा चित्रपट क्षेत्राची कौटुंबिक पार्श्वभूमी नसताना केवळ स्वतःच्या जिद्दीने आणि अथांग कष्टाने अभिनय क्षेत्रात स्वतःचे अढळ स्थान निर्माण केले. आपल्या सहज आणि तडफदार अभिनयाने त्यांनी लाखो रसिकांच्या मनावर राज्य केले. महाराष्ट्र अशा महान कलावंताला कधीही विसरू शकणार नाही आणि त्यांच्या स्मृती सदैव आपल्या मनात कायम राहतील.”

शिक्षण मंडळाचे माजी सभापती सतीश दरेकर यांनी नाना पाटेकर यांच्या सामाजिक कार्याचा विशेष गौरव केला. ते म्हणाले, “नाना पाटेकर हे केवळ एक उत्कृष्ट अभिनेतेच नव्हते, तर संवेदनशील समाजसेवकही होते. त्यांनी स्थापन केलेल्या ‘नाम फाउंडेशन’च्या माध्यमातून महाराष्ट्रातील हजारो आत्महत्याग्रस्त व गरजू शेतकरी कुटुंबांना मोठा आर्थिक व मानसिक आधार दिला. प्रचंड प्रसिद्धी मिळूनही त्यांची राहणी अत्यंत साधी होती आणि त्यांचा स्वभाव प्रेमळ व अतिशय नम्र होता.”

या वेळी राष्ट्रवादी काँग्रेसचे कार्यक्षम पदाधिकारी प्रदीप गायकवाड यांनी एक महत्त्वाची घोषणा केली. कै. नाना पाटेकर यांच्या अभिनय क्षेत्रातील महान योगदानाला आणि कै. अजितदादा यांच्या स्मृतीला अभिवादन म्हणून दरवर्षी ‘अजितदादा व नाना पाटेकर एकपात्री अभिनय स्पर्धा’ आयोजित करण्यात येईल, असे त्यांनी जाहीर केले. या उपक्रमामुळे नवोदित कलाकारांना आपले कौशल्य सिद्ध करण्यासाठी हक्काचे व्यासपीठ उपलब्ध होणार आहे.

या श्रद्धांजलीसभेस मराठवाडा जनसंघाचे अरुण पवार, बाळासाहेब पिल्लेवार, उदय ववले, विष्णू शेळके सर, रमजान सय्यद यांच्यासह राष्ट्रवादी काँग्रेसचे अनेक वरिष्ठ पदाधिकारी, महिला प्रतिनिधी आणि कार्यकर्ते मोठ्या संख्येने उपस्थित होते. कार्यक्रम यशस्वी पार पाडण्यासाठी प्रदीप गायकवाड व सतीश चोरमले यांनी विशेष परिश्रम घेतले.