सांगवी: नवरात्रोत्सवाचे औचित्य साधून सांगवी परिसरातील ‘ज्येष्ठ नागरिक महिला भजनी मंडळा’च्या वतीने शितोळेनगर येथील श्री तुळजाभवानी मंदिराच्या प्रांगणात विशेष भक्तिमय भजनांचा कार्यक्रम उत्साहात पार पडला. महिला सदस्यांनी टाळ-मृदंगाच्या गजरात आणि सुरेल सुरांत देवीची विविध भक्तिगीते सादर करून उपस्थितांना भक्तिरसात न्हाऊ घातले. या सोहळ्यामुळे संपूर्ण शितोळेनगर परिसरात धार्मिक व भक्तिमय वातावरण निर्माण झाले होते.

कार्यक्रमप्रसंगी भजनी मंडळाच्या महिलांनी सुरुवातीला ‘ओंकार प्रधान रूप गणपतीचे’ या नांदीने कार्यक्रमाचा प्रारंभ केला. त्यानंतर ‘जय जगदंबे’, ‘स्वरूप सुंदरी’, ‘शिवशंभोची अर्धांगिनी’, ‘माय भवानी’, ‘नाच अंबे नाच’, ‘अंबिका चंडिका’ आणि ‘ये हंसवारी’ अशा एकापेक्षा एक बहारदार देवीगीतांचे सादरीकरण केले. महिलांच्या सामूहिक आणि लयबद्ध गायनामुळे मंदिर परिसर भाविकांच्या गर्दीने आणि जयघोषाने गुंजून उठला होता.

या भजनाच्या कार्यक्रमात भजनी मंडळाच्या प्रमुख सदस्या अनिता गाढवे, कल्पना देवगांवकर, वंदना शेळके, सुमन शिर्के, माधुरी कोल्हे, शीतल बरडे, वैशाली कदम, दीपा शिंदे, अरुणा खोत, कुसुम केसरे, अलका खोपडे आणि लतिका जगताप यांनी उत्स्फूर्त सहभाग नोंदवून नवरात्रोत्सवाचा आनंद द्विगुणित केला.

ज्येष्ठ नागरिकांच्या जीवनात आनंद, उत्साह आणि आपुलकी निर्माण व्हावी, तसेच आपल्या धार्मिक व सांस्कृतिक परंपरांचे जतन व्हावे, या उद्देशाने या विशेष कार्यक्रमाचे आयोजन करण्यात आले होते. अशा सांस्कृतिक व धार्मिक उपक्रमांमुळे ज्येष्ठ नागरिकांमध्ये स्नेहभाव आणि सामाजिक एकोपा अधिक दृढ होण्यास मदत होते, असे मत आयोजकांनी व्यक्त केले.

या कार्यक्रमाचे उत्कृष्ट आयोजन ज्येष्ठ नागरिक संघाचे अध्यक्ष कमलाकर जाधव, सचिव सुरेंद्र शेळके आणि महिला भजनी मंडळाच्या सदस्यांनी मिळून केले.