पिंपरी: वेगाने बदलणाऱ्या कॉर्पोरेट उद्योगजगतातील नव्या गरजा आणि अपेक्षा लक्षात घेऊन विद्यार्थ्यांनी आपल्या करिअरची तयारी करावी, असे अमूल्य मार्गदर्शन सावित्रीबाई फुले पुणे विद्यापीठाच्या व्यवस्थापन शास्त्र विद्याशाखेच्या शंतनुराव किर्लोस्कर अध्यासनाचे माजी प्रमुख कॅप्टन डॉ. सी.एम. चितळे यांनी केले.

इन्स्टिट्यूट ऑफ सायन्स, पूना संचालित इन्स्टिट्यूट ऑफ बिझनेस मॅनेजमेंट अँड रिसर्च (IBMR) च्या वाकड येथील संकुलात नुकतेच ‘कॅम्पस टू कॉर्पोरेट: करिअर तयारी आणि यशाची गुरुकिल्ली’ या विषयावर विशेष व्याख्यान सत्राचे आयोजन करण्यात आले होते, त्याप्रसंगी ते बोलत होते.

विद्यार्थ्यांशी संवाद साधताना कॅप्टन डॉ. सी.एम. चितळे म्हणाले की, “कॉर्पोरेट जगतात तुम्ही भूतकाळात काय शिकलात यापेक्षा आज तुम्ही किती वेगाने नवीन गोष्टी आत्मसात करू शकता, याला सर्वात जास्त महत्त्व आहे. ‘लर्न, अनलर्न आणि री-लर्न’ (शिकणे, जुने विसरणे आणि पुन्हा नवीन शिकणे) हाच आजच्या आधुनिक व्यावसायिक युगाचा खरा मंत्र आहे.” याशिवाय त्यांनी मुलाखतीची (Interview) प्रभावी तयारी कशी करावी आणि व्यावसायिक नैतिकता (Professional Ethics) याचे महत्त्व विद्यार्थ्याye सविस्तरपणे समजावून सांगितले.

या मार्गदर्शन सत्राला एमबीए (MBA), एमसीए (MCA), बीबीए (BBA) आणि बीसीए (BCA) या व्यावसायिक अभ्यासक्रमांचे शेकडो विद्यार्थी-विद्यार्थिनी मोठ्या संख्येने उपस्थित होते. कार्यक्रमाची सांगता अत्यंत उत्साहात झाली.

या कार्यक्रमाचे आयोजन संस्थेच्या ‘ट्रेनिंग अँड प्लेसमेंट विभागा’तर्फे करण्यात आले होते. याप्रसंगी आयआयएमएसचे संचालक डॉ. शिवाजी मुंढे, आयबीएमआरचे प्रभारी संचालक डॉ. सचिन मिसाळ यांच्यासह महाविद्यालयाचा संपूर्ण प्राध्यापक वर्ग आणि शिक्षणतज्ज्ञ उपस्थित होते.