22
मनपातील भ्रष्टाचार व ‘बीट मार्शल’ गैरव्यवहाराविरोधात विरोधी पक्षनेते भाऊसाहेब भोईर आक्रमक; मुख्य अभियंत्याच्या काळातील फायलींची चौकशी करण्याची आयुक्तांकडे आग्रही मागणी!
पिंपरी-चिंचवड प्रतिनिधी बालाजी नवले, दि. ३० ऑक्टोबर २०२६ मॅक्स मंथन डेली न्यूज:
पिंपरी: पिंपरी-चिंचवड महानगरपालिकेतील लाचखोरी प्रकरण आणि ‘बीट मार्शल’ संदर्भातील तक्रारींची अत्यंत सखोल व स्वतंत्र चौकशी करून दोषींवर कठोर प्रशासकीय कारवाई करण्यात यावी, या मागणीसाठी विरोधी पक्षनेते भाऊसाहेब भोईर यांनी प्रशासनाविरोधात आक्रमक पवित्रा घेतला आहे. यासंदर्भात त्यांनी महापालिका आयुक्त डॉ. विजय सूर्यवंशी यांना थेट पत्र लिहून भ्रष्टाचाराविरोधात कठोर पावले उचलण्याची जोरदार मागणी केली असून, या कारवाईमुळे भाऊसाहेब भोईर यांची जनसामान्यांच्या हितासाठी धावून जाणाऱ्या एका सक्षम आणि अभ्यासू लोकप्रतिनिधीची प्रतिमा पुन्हा एकदा अधोरेखित झाली आहे.
दिनांक २९ ऑक्टोबर रोजी लाचलुचपत प्रतिबंधक विभागाने (ACB) पाणीपुरवठा विभागाचे मुख्य अभियंता प्रमोद ओंबासे यांना लाच घेताना रंगेहाथ ताब्यात घेतले. या घटनेमुळे पिंपरी-चिंचवड महापालिकेची प्रतिमा मलीन झाली असून सर्वसामान्य नागरिकांचा प्रशासनावरील विश्वास उडाला आहे, अशी खंत विरोधी पक्षनेते भाऊसाहेब भोईर यांनी व्यक्त केली.
केवळ एका कारवाईवर न थांबता, ओंबासे यांच्या संपूर्ण कार्यकाळातील सर्व संशयास्पद फायली, निविदा आणि कामांची महापालिका स्तरावर उच्चस्तरीय स्वतंत्र चौकशी करण्यात यावी, अशी स्पष्ट आणि आग्रही अट भोईर यांनी आयुक्तांसमोर ठेवली आहे.
महापालिकेच्या ‘बीट मार्शल’ यंत्रणेकडून होत असलेली नागरिकांची पिळवणूक, गैरवर्तणूक आणि भ्रष्टाचाराच्या वाढत्या तक्रारींची गंभीर दखल घेत भाऊसाहेब भोईर यांनी प्रशासनाचे कान टोचले. बीट मार्शल संदर्भात प्राप्त झालेल्या सर्व प्रलंबित तक्रारींची निष्पक्ष चौकशी करून यातील गैरव्यवहारांचा पर्दाफाश करावा, अशी मागणी त्यांनी निवेदनाद्वारे केली.
लाचप्रकरणी अडकलेले मुख्य अभियंता प्रमोद ओंबासे यांच्या कार्यकाळातील सर्व फायली व टेंडर्सची चौकशी व्हावी. बीट मार्शल संदर्भातील सर्व भ्रष्टाचाराच्या तक्रारींची सखोल चौकशी करण्यात यावी. दोन्ही प्रकरणांत दोषी आढळणाऱ्या सर्व अधिकारी व कर्मचाऱ्यांवर तात्काळ निलंबनासह कठोर कायदेशीर कारवाई व्हावी.
“पिंपरी-चिंचवडकरांच्या कष्टाच्या आणि कराच्या पैशांची अशी उधळपट्टी व भ्रष्टाचार आम्ही खपवून घेणार नाही. महापालिका प्रशासनाने भ्रष्टाचार मोडून काढण्यासाठी तातडीने कडक पावले उचलावीत. भ्रष्ट अधिकाऱ्यांना पाठीशी न घालता त्यांच्यावर तात्काळ निलंबनाची कारवाई करावी; अन्यथा शहरातील जनसामान्यांच्या हक्कासाठी आम्हाला रस्त्यावर उतरून तीव्र आंदोलन छेडावे लागेल.”— भाऊसाहेब भोईर (विरोधी पक्षनेते, पिंपरी-चिंचवड महानगरपालिका)
नागरिकांच्या प्रश्नांवर सतत आक्रमक भूमिका घेऊन प्रशासनाला धारेवर धरणारे आणि विरोधी पक्षनेता म्हणून अत्यंत सक्षमपणे जबाबदारी पेलणारे भाऊसाहेब भोईर यांच्या या भूमिकेमुळे शहरभरातून आणि सामाजिक वर्तुळातून त्यांचे कौतुक केले जात आहे.
© २०२६ मॅक्स मंथन डेली न्यूज. सर्व हक्क राखीव.
