सध्या वजन कमी करण्यासाठी आणि टाईप-२ मधुमेहावर नियंत्रण मिळवण्यासाठी जगभरात अत्यंत लोकप्रिय ठरलेल्या GLP-1 रिसेप्टर ॲगोनिस्ट (GLP-1 RA) या वर्गातील औषधांबाबत अमेरिकेच्या अन्न आणि औषध प्रशासनाने (US FDA) एक मोठा इशारा दिला आहे. Ozempic, Wegovy, Mounjaro, आणि Zepbound यांसारख्या प्रसिद्ध औषधांमुळे ‘नायॉन’ (NAION – Non-Arteritic Anterior Ischemic Optic Neuropathy) हा डोळ्यांचा दुर्मिळ पण गंभीर आजार होण्याचा धोका निर्माण होऊ शकतो, असा इशारा एफडीएने (FDA) दिला आहे.

NAION हा डोळ्यांच्या मज्जातंतूशी (Optic Nerve) संबंधित एक गंभीर आजार आहे. डोळ्यांच्या या मज्जातंतूला होणारा रक्तपुरवठा अचानक कमी झाल्यामुळे किंवा थांबल्यामुळे हा आजार होतो. एका डोळ्याची दृष्टी अचानक, कोणतीही वेदना न होता (Painless Vision Loss) कमी होणे किंवा पूर्णपणे बंद होणे.  हा आजार झाल्यास रुग्णाची दृष्टी कायमस्वरूपी जाण्याचा (Permanent Blindness) मोठा धोका असतो.

 एफडीएने १३४,२५३ रुग्णांचा समावेश असलेल्या १२६ क्लिनिकल चाचण्यांचे (Meta-analysis) सखोल विश्लेषण केले. GLP-1 औषधे घेणारे रुग्ण  दर १,००,००० व्यक्ती-वर्षांमागे (Person-Years) ६.४ प्रकरणे समोर आली. इतर औषधे किंवा प्लेसिबो घेणारे रुग्ण दर १,००,००० व्यक्ती-वर्षांमागे ३.८ प्रकरणे नोंदवली गेली. ‘नायॉन’ या आजाराचे धोके आणि GLP-1 औषधे घेणाऱ्या रुग्णांमधील लक्षणे (जसे की मधुमेह, उच्च रक्तदाब, कोलेस्ट्रॉल, हृदयविकार आणि स्लीप एपनिया) हे एकमेकांशी जुळणारे आहेत. त्यामुळे या औषधांमुळेच हा आजार होतो का, यावर अधिक संशोधनाची गरज असल्याचे एफडीएने स्पष्ट केले आहे.

अमेरिकेतील अब्जाधीश एलॉन मस्क (Elon Musk) यांनीही वजन कमी करण्यासाठी या प्रकारच्या औषधांचा वापर करत असल्याचे जाहीररीत्या कबूल केले होते. मस्क यांनी त्यांच्या सोशल मीडिया पोस्टवर “Mounjaro” चे सेवन करत असल्याचे सांगत GLP-1 औषधांच्या वाढत्या वापराकडे जगाचे लक्ष वेधले होते.

FDA ने स्पष्ट केले आहे की, GLP-1 औषधे (उदा. Semaglutide, Tirzepatide) घेणाऱ्या कोणत्याही रुग्णाला दृष्टी कमी होणे, अंधुक दिसणे किंवा डोळ्यांसमोर धुसरता येणे अशी लक्षणे आढळल्यास त्यांनी त्वरित आपल्या डॉक्टरांशी संपर्क साधावा. डॉक्टरांनीही रुग्णांना या औषधांची नोंद करताना डोळ्यांच्या आरोग्याबाबत सतर्क राहण्याचा सल्ला द्यावा.