पिंपरी चिंचवड, दि. २८ एप्रिल, २०२५: कामगार नेते आणि माजी नगरसेवक यशवंतभाऊ भोसले यांची संत तुकाराम नगर सहकारी गृहरचना संस्था मर्यादित (९४१ घरे) च्या अध्यक्षपदी सर्वानुमते बिनविरोध निवड झाली आहे. त्यांच्या या निवडीमुळे संस्थेतील सभासदांमध्ये आनंदाचे वातावरण पसरले आहे. अंकुश वाघमारे यांनी त्यांच्या नावाला सूचक म्हणून मान्यता दिली आणि याप्रसंगी संस्थेची नवीन कार्यकारिणी देखील जाहीर करण्यात आली. संत तुकाराम नगर येथील संत तुकाराम महाराज हॉलमध्ये (दि. २७) संस्थेची साधारण सभा आयोजित करण्यात आली होती, ज्यात ही निवड प्रक्रिया पार पडली.
अध्यक्षपदी निवड झाल्यानंतर यशवंतभाऊ भोसले यांनी आपल्या भावना व्यक्त करताना सांगितले की, संत तुकाराम नगर वसाहत ही सुमारे ९४१ घरांची मोठी सोसायटी असून, गेल्या ४० वर्षांपासून येथे सर्वधर्मीय नागरिक एकोप्याने आणि बंधुभावाने राहत आहेत. सध्या ही वसाहत पुनर्विकास प्रक्रियेतून जात असून, नवीन कायद्यानुसार ५१% सभासदांच्या संमतीची अट पूर्ण करून संस्थेची नोंदणी झाली आहे. आतापर्यंत ७२% गाळेधारक सभासद झाले असून, उर्वरित सदस्यही लवकरच सामील होतील. म्हाडाकडून सर्व औपचारिकता पूर्ण झाल्यावर येथील रहिवाशांना प्रत्येकी ९०० स्क्वेअर फूट क्षेत्रफळाची एल.आय.जी. आणि १२०० स्क्वेअर फूट क्षेत्रफळाची घरे मिळवण्याचा संस्थेचा प्रस्ताव आहे. सध्याच्या १८० स्क्वेअर फूट घरांच्या तुलनेत हे मोठे परिवर्तन ठरेल आणि त्यामुळे येथील रहिवाशांचे जीवनमान निश्चितच उंचावेल. शासनाने राबवलेल्या नवीन धोरणामुळे पुनर्वसन प्रक्रिया सुलभ झाली असून, त्यांनी याबद्दल सरकारचे आभार मानले.
यशवंतभाऊ भोसले यांनी संत तुकाराम नगर वसाहतीचा उल्लेख ‘मिनी भारत’ असा केला, जिथे डॉ. बाबासाहेब आंबेडकर जयंती, छत्रपती शिवाजी महाराज जयंती, तुकाराम महाराज गाथा सप्ताह, गणपती उत्सव आणि मुस्लिम बांधवांची नमाज तसेच ख्रिश्चन चर्चचे उत्सवही एकोप्याने साजरे होतात. नव्या विकास प्रक्रियेत प्रत्येक इमारतीसाठी १० प्रतिनिधी नियुक्त केले जाणार आहेत, जे सोसायटीच्या दैनंदिन कामकाजात सक्रिय सहभाग घेतील.
काही स्वार्थी लोक या समजूतदार विकास प्रकल्पात अडथळे निर्माण करण्याचा प्रयत्न करत आहेत, परंतु संत तुकाराम नगरमधील नागरिकांच्या हे लक्षात आल्यामुळे त्यांनी एकजुटीने या प्रकल्पाला पाठिंबा दर्शविला आहे, असेही यशवंतभाऊ भोसले यांनी नमूद केले.
सर्व सभासदांच्या वतीने नूतन अध्यक्ष यशवंतभाऊ भोसले यांच्या कार्याचे कौतुक करण्यात आले आणि त्यांचा शाल व श्रीफळ देऊन सत्कार करण्यात आला. तसेच, नूतन कार्यकारिणीचाही सर्व सभासदांच्या वतीने सन्मान करण्यात आला. यशवंतभाऊ भोसले यांच्या नेतृत्वाखाली संत तुकाराम नगर सहकारी गृहरचना संस्थेचा पुनर्विकास प्रकल्प यशस्वीपणे पूर्ण होईल, अशी आशा सभासदांनी व्यक्त केली आहे.
