पिंपरी, दि. २८ एप्रिल, २०२५: “दिव्यांग भवन ही संकल्पना प्रत्यक्षात आणणारी पिंपरी चिंचवड महानगरपालिका देशातील पहिली आहे. प्रत्येक राज्यातील महानगरपालिकेने पिंपरी चिंचवड महानगरपालिकेला भेट देऊन अशा प्रकारचे उपक्रम राबवावेत. पिंपरी चिंचवड महानगरपालिकेचे दिव्यांग भवन हे खरंच देशातील पहिल्या दिव्यांग सक्षमीकरणाचे आदर्श मॉडेल आहे,” असे गौरवोद्गार भारत सरकारच्या सामाजिक न्याय आणि सक्षमीकरण विभागाचे सचिव राजेश अग्रवाल यांनी काढले.
पिंपरी चिंचवड महानगरपालिकेच्या दिव्यांग भवन फाऊंडेशनच्या वतीने आज, २८ एप्रिल २०२५ रोजी आकुर्डी येथील ग. दि. माडगूळकर नाट्यगृहात एका राष्ट्रीय परिसंवादाचे आयोजन करण्यात आले होते. या परिसंवादात दूरदृश्यप्रणालीद्वारे सहभागी होताना राजेश अग्रवाल बोलत होते.
या महत्त्वपूर्ण परिसंवादात भारत पुनर्वसन परिषदेच्या डॉ. शरणजीत कौर, पिंपरी चिंचवड महानगरपालिकेचे आयुक्त तथा प्रशासक शेखर सिंह, अतिरिक्त आयुक्त प्रदीप जांभळे पाटील, दिव्यांग भवन फाउंडेशनचे व्यवस्थापकीय संचालक ओमप्रकाश देशमुख, समाज विकास विभागाचे सहाय्यक आयुक्त तानाजी नरळे, दिव्यांग कक्षाच्या सहाय्यक आयुक्त निवेदिता घार्गे, वैद्यकीय आरोग्य अधिकारी डॉ. लक्ष्मण गोफणे, प्रशासन अधिकारी संगीता बांगर यांच्यासह विविध संस्थांचे प्रतिनिधी, बालवाडी/अंगणवाडी सेविकांना प्रशिक्षण देणारे प्रशिक्षक/समन्वयक तसेच अनेक सामाजिक संघटनांचे कर्मचारी उपस्थित होते.
परिसंवादात मार्गदर्शन करताना डॉ. शरणजीत कौर यांनी पिंपरी चिंचवड महानगरपालिकेच्या दिव्यांग भवन उपक्रमाचे मुक्त कंठाने कौतुक केले. त्या म्हणाल्या, “मी माझ्या ३३ वर्षांच्या कारकिर्दीत दिव्यांग भवनसारखा उदात्त उपक्रम यापूर्वी कधीही पाहिला नाही. देशातील सर्व महानगरपालिकांनी पिंपरी चिंचवड महानगरपालिकेच्या या कार्याची दखल घेऊन असे प्रेरणादायी उपक्रम आपापल्या शहरात राबवावेत.”
आयुक्त शेखर सिंह यांनी दिव्यांग मुलांच्या नोंदीसाठी लवकरच ‘शून्य ते सहा’ ही एक विशेष मोहीम सुरू करण्याची घोषणा केली. या मोहिमेअंतर्गत शहरात घरोघरी जाऊन सर्वेक्षण केले जाईल, ज्याद्वारे किमान एक लाख दिव्यांगांची नोंदणी केली जाईल. या महत्त्वपूर्ण उपक्रमात अंगणवाडी सेविकांचा मोलाचा सहभाग असेल, असेही त्यांनी नमूद केले.
यावेळी आयुक्त शेखर सिंह यांनी ‘दिव्यांग भवन फाऊंडेशन’ आणि इतर संस्थांनी महानगरपालिकेसोबत केलेल्या उत्कृष्ट कार्याची प्रशंसा केली आणि पिंपरी चिंचवड महानगरपालिकेचे दिव्यांग भवन देशभरातील लोकांसाठी एक आदर्श केंद्र बनावे, यासाठी सर्वांनी एकत्रित प्रयत्न करण्याचे आवाहन केले. “आपली महानगरपालिका केवळ नेतृत्व देणारी नाही, तर देशभरातील लोकांसाठी एक आदर्श केंद्र म्हणूनही नावारूपाला येऊ शकते,” असा दृढ विश्वास त्यांनी व्यक्त केला.
याप्रसंगी आयुक्त शेखर सिंह यांच्या हस्ते ‘उन्नती समावेशित शिक्षणाची, प्रथम या संस्थेचा शीघ्र हस्तक्षेपण व शालेय तयारीकरिता क्रॉस डिसेबिलिटी (दिव्यांगत्व) अभ्यासक्रम आराखड्याचे प्रकाशन करण्यात आले. या अभ्यासक्रमामुळे दिव्यांग बालकांच्या शिक्षणाला नवी दिशा मिळेल, अशी अपेक्षा व्यक्त करण्यात आली.
