तेली समाजाचा पिंपरी चिंचवडमधून ‘हुंडा विरोधी’ एल्गार! संताजी सेवा प्रतिष्ठानच्यावतीने हुंडा व अनिष्ट प्रथांविरोधात राज्यव्यापी चळवळीची हाक!

क्रांतिवीर चापेकर चौकात शपथग्रहण, महिलांचा लक्षणीय सहभाग; लग्नसोहळे साधे आणि कर्जमुक्त करण्याचे आवाहन! (मॅक्स मंथन डेली न्यूज, पिंपरी)

पिंपरी, ३ जून २०२५: समाजातील अनिष्ट प्रथांना मूठमाती देण्यासाठी आणि लग्नातील अनावश्यक खर्च टाळण्यासाठी पिंपरी चिंचवड शहरातील तेली समाजाने एक महत्त्वाचे पाऊल उचलले आहे. संताजी सेवा प्रतिष्ठान आणि प्रदेश तेली महासंघ यांच्यावतीने आज (दिनांक ०१/०६/२०२५) ‘हुंडा विरोधी’ आणि लग्नातील अनिष्ट व नवीन रूढ होत चाललेल्या प्रथांविरुद्ध एक राज्यव्यापी चळवळ उभी करण्याचा निर्धार करण्यात आला. या चळवळीची सुरुवात क्रांतिवीर चापेकर चौकातील क्रांतिवीर चाफेकर यांच्या पुतळ्यासमोर शपथ घेऊन करण्यात आली, ज्यात समाजातील महिला आणि मुलींचा लक्षणीय सहभाग होता.

राज्यभरातील संघटनांना आवाहन: संताजी सेवा प्रतिष्ठानने संपूर्ण राज्यभरातील तेली समाजातील सर्व संघटना, राजकीय नेते, समाजातील कार्यकर्ते, मान्यवर तसेच वधू-वर मेळावे आयोजित करणाऱ्या संस्थांना प्रत्यक्ष भेटून किंवा पत्राद्वारे, तसेच आवाहनाद्वारे या ‘हुंडा विरोधी’ आणि अनिष्ट प्रथांविरुद्धच्या चळवळीत सहभागी होण्याचे आवाहन केले आहे. या मोहिमेचा उद्देश समाजातील लग्नसमारंभ अधिक साधे, कर्जमुक्त आणि प्रतिष्ठेचे बनवणे हा आहे.

क्रांतिवीर चापेकर चौकात ऐतिहासिक शपथ: या चळवळीची सुरुवात पिंपरी चिंचवड शहरातून झाली. क्रांतिवीर चापेकर चौकातील पुतळ्यासमोर तेली समाजातील मान्यवर, संताजी सेवा प्रतिष्ठानचे तसेच प्रदेश तेली महासंघ पदाधिकारी, कार्यकर्ते इत्यादींनी एकत्रित जमून एकजूटीची शपथ घेतली. यावेळी समाजातील महिलांची आणि मुलींची संख्या विशेषत्वाने लक्ष वेधून घेणारी होती, ज्यामुळे या चळवळीला महिलांचाही सक्रिय पाठिंबा असल्याचे स्पष्ट झाले.

या प्रसंगी, वैष्णवी हगवणे यांना समाजाच्या वतीने श्रद्धांजली अर्पण करण्यात आली.

श्री मोरया इन्स्टिट्यूटमध्ये जाहीर ठराव आणि महत्त्वाचे निर्णय: यापूर्वी, श्री मोरया इन्स्टिट्यूट ऑफ पॅरामेडिकल हेल्थ सायन्स, चिंचवड येथे दिनांक ०१/०६/२०२५ रोजी संताजी सेवा प्रतिष्ठानने एक जाहीर ठराव पारित केला, ज्यात समाजातील लग्न सोहळ्यातील अनिष्ट प्रकार थांबविण्यासाठी चळवळ उभी करण्याची घोषणा केली. समाजातील मान्यवरांच्या सहमतीने तसेच संस्थेच्या सर्व पदाधिकारी आणि सभासद यांच्या उपस्थितीत खालील महत्त्वाचे निर्णय घेण्यात आले:

१. हुंडा प्रथेला विरोध: तेली समाजातील लग्न सोहळ्यात हुंडा या प्रथेला पूर्णपणे विरोध करून ही प्रथा बंद करणे. हुंडा मागितल्यास तेथे लग्नास नकार देण्याचा ठाम निर्णय घेणे. २. रुखवतातील अनावश्यक वस्तू: रुखवतामध्ये मुलीकडून महागड्या वस्तू न मागणे. ३. साधेपणाचा स्वीकार: लग्न सोहळा शक्य तितका साध्या पद्धतीने आणि कर्ज काढून न करण्याचा निर्णय घेणे. ४. मोठ्या खर्चाचे अनुकरण टाळणे: मोठ्या व खर्चिक लग्न सोहळ्याचे अनुकरण टाळणे. ५. वेळेचे पालन: लग्न वेळेत लावणे. ६. भाषणबाजी आणि सत्कार सोहळे कमी करणे: लग्नात अनावश्यक भाषणबाजी तसेच सत्कार सोहळे कमी करणे. ७. एकूण खर्च कमी करणे: एकूणच लग्न सोहळ्यातील खर्च शक्य तितका कमी करणे. ८. रिटर्न गिफ्ट प्रथा बंद: सोहळ्यामधील ‘रिटर्न गिफ्ट’ देण्याची प्रथा बंद करणे. ९. हुंडा मागणाऱ्यांना समज: हुंडा मागणाऱ्या तसेच घेणाऱ्या कुटुंबाला समाजाच्या वतीने योग्य ती समज देणे.

या नवीन सामाजिक नियमांची अंमलबजावणी करण्यासाठी समाजातील अनेक संघटना, राजकीय मान्यवर, सामाजिक कार्यकर्ते इत्यादींची मदत घेतली जाईल. संपूर्ण राज्यात या बाबत चळवळ उभी करून जनजागृती करण्याचे लक्ष्य ठेवण्यात आले आहे.

वरील ठरावास संताजी सेवा प्रतिष्ठान तसेच प्रदेश तेली महासंघ मंडळ इत्यादींनी पाठिंबा तसेच अनुमोदन दिले.

मान्यवरांची उपस्थिती: या शपथग्रहण समारंभास आणि आयोजित बैठकीसाठी समाजाचे खालील मान्यवर उपस्थित होते: डॉ. सरोज गणेश अंबिके (अध्यक्ष, संताजी सेवा प्रतिष्ठान), बाळासाहेब गेनू शेलार (संस्थापक), जिजा राजाराम वंजारी (सेक्रेटरी, संताजी सेवा प्रतिष्ठान), राजेश विश्वास डोंगरे (उपाध्यक्ष – प्रदेश तेली महासंघ), रोहिदास पडगळ (खजिनदार, संताजी सेवा प्रतिष्ठान), मनोज अणेकर (प्रकल्प प्रमुख – संताजी सेवा प्रतिष्ठान), नरेंद्र रंगनाथ मेहेर, विश्वास हरिभाऊ डोंगरे (विश्वस्त – श्री संताजी महाराज प्रदीप चंद्रकांत सायकर पालखी सोहळा मंडळ), राजाराम वंजारी, वैशाली आतकर (माजी अध्यक्ष – वधू-वर मेळावा), डॉ. गणेश माधवराव अंबिके, श्रीमती. मनीषा राजेंद्र किर्वे (अध्यक्ष – संताजी महाराज उत्सव पी. टी. चौधरी समिती २०२६- सुदुंबरे), विठ्ठल सायकर, सुनील बाळकृष्ण देशमाने, लता विश्वासराव डोंगरे (अध्यक्ष, वधू-वर मेळावा), सुधाकर केशवराव लोखंडे, आरती स्वप्नील विभुते, अमोल हरिभाऊ देशमाने, पूजा आकाश कापसे, गजानन रामचंद्र सायकर, सुवर्णा विजय आतकर, गोविंद ब. चौधरी, देवश्री सचिन चौधरी, भरत दशरथ चौधरी, वैशाली प्रवीण चौधरी, अशोक लक्ष्मण कल्याणकर, स्वाती पिंगळे, प्रीतम ज्ञानेश्वर किर्वे, शीतल महेश वंजारी, वरद गणेश अंबिके, कु. रोहिणी आतकर, महेश लालाजी वंजारी, स्वप्निल विभूते.

या कार्यक्रमाचे संयोजन मनोज आणेकर यांनी केले, तर आभार व निवेदन नितीन साळी यांनी केले.

© 2025 मॅक्स मंथन डेली न्यूज. सर्व हक्क राखीव.