वाय.सी.एम. हॉस्पिटलमध्ये ‘जागतिक रक्तदाता दिन’ उत्साहात साजरा; ‘रक्त देऊया, आशा जागवूया’ संदेशासह ऐच्छिक रक्तदाता शपथेचे वाचन!
पुणे, पिंपरी-चिंचवड मनपाचा आरोग्य विभाग, ९५ बिग एफएम आणि रोटरी क्लब ऑफ पिंपरी यांच्या संयुक्त विद्यमाने जनजागृती; युवकांना नियमित रक्तदानाचे आवाहन!
पिंपरी, १४ जून २०२५: जागतिक आरोग्य संघटनेद्वारे २००४ पासून दरवर्षी १४ जून हा दिवस प्रसिद्ध वैद्यकशास्त्रज्ञ आणि नोबेल पारितोषिक विजेते डॉ. कार्ल लँडस्टिनर यांच्या जन्मदिनानिमित्त ‘जागतिक रक्तदाता दिन’ म्हणून साजरा केला जातो. याच दिवसाचे औचित्य साधून पिंपरी चिंचवड महानगरपालिकेच्या वाय.सी.एम. हॉस्पिटल रक्तकेंद्राने शहराच्या विविध ठिकाणी रक्तदान शिबिरांचे आयोजन करत हा दिवस मोठ्या उत्साहात साजरा केला. या वर्षीची संकल्पना होती: “रक्त देऊया, आशा जागवूया : एकत्रितपणे जीव वाचवूया!”
मान्यवरांची उपस्थिती आणि रक्तदात्यांचा सन्मान
या कार्यक्रमाप्रसंगी पिंपरी चिंचवड मनपाचे आरोग्य वैद्यकीय अधिकारी डॉ. लक्ष्मण गोफणे, वाय.सी.एम. हॉस्पिटल विभाग प्रमुख तथा अतिरिक्त आरोग्य वैद्यकीय अधिकारी डॉ. अभयचंद्र दादेवार, वाय.सी.एम हॉस्पिटल रक्तकेंद्राचे रक्त संक्रमण अधिकारी डॉ. नीता घाडगे, चिंचवड देवस्थान ट्रस्टचे श्री. घोडके, रक्ताचे नाते ट्रस्टचे श्री. सुहास हिंगणे यांची प्रमुख उपस्थिती होती.
या रक्तदान शिबिरासाठी आलेल्या सर्व रक्तदात्यांचे पुष्प आणि सन्मानपत्र देऊन मान्यवरांच्या हस्ते स्वागत करण्यात आले. तसेच, उपस्थित सर्व रक्तदात्यांना आणि आयोजकांना राज्य रक्त संक्रमण परिषदेच्या सूचनेनुसार ‘जागतिक रक्तदाता दिनानिमित्त’ ऐच्छिक रक्तदाता शपथेचे वाचन करण्यात आले. वरिष्ठ रक्ततंत्रज्ञ श्री. गिरीजात्मक जोशी यांनी शपथेचे वाचन केले.
युवकांना नियमित रक्तदानाचे आवाहन: आरोग्य वैद्यकीय अधिकारी डॉ. गोफणे यांचे मार्गदर्शन
या प्रसंगी कार्यक्रमाचे प्रमुख अतिथी, पिंपरी चिंचवड मनपाचे आरोग्य वैद्यकीय अधिकारी डॉ. लक्ष्मण गोफणे यांनी उपस्थित रक्तदाते आणि रक्तदान शिबिर आयोजकांना संबोधित केले. त्यांनी विविध मंडळे, संस्था, ट्रस्ट, महाविद्यालये आणि औद्योगिक वसाहतींना रक्तदान शिबिरे आयोजित करून वाय.सी.एम. हॉस्पिटल रक्तकेंद्राला सहकार्य करण्याचे आवाहन केले. विशेषतः युवकांना त्यांनी नियमित रक्तदान करण्याचे आवाहन करत रक्तदानाचे महत्त्व, जाणीवजागृती आणि लोकांमध्ये असलेले गैरसमज याबद्दल मोलाचे मार्गदर्शन केले.
आजच्या या रक्तदान शिबिरात एकूण ५८ रक्तदात्यांनी सक्रिय सहभाग नोंदवून रक्तदानासारख्या महान कार्यात आपले योगदान दिले. कार्यक्रमाचे सूत्रसंचालन वाय.सी.एम. हॉस्पिटलचे समाजसेवा अधीक्षक श्री. किशन गायकवाड यांनी केले, तर आभार प्रदर्शन समुपदेशक श्री. सुनीत आवटे यांनी केले.
हा कार्यक्रम यशस्वी करण्यासाठी चिंचवड देवस्थान ट्रस्ट, चिंचवडगाव, रक्ताचे नाते ट्रस्ट-महाराष्ट्र राज्य आणि रक्तकेंद्राचे रक्त संक्रमण अधिकारी डॉ. गणेश लांडे, श्रीमती उर्मिला हजारे तसेच रक्तकेंद्रातील उपस्थित सर्व अधिकारी व कर्मचारी यांचे मोलाचे सहकार्य लाभले.
© २०२५ मॅक्स मंथन डेली न्यूज. सर्व हक्क राखीव.
