पिंपरी-चिंचवड मनपाचा आंतरराष्ट्रीय योग दिन उत्साहात साजरा: ‘स्वस्थ शरीर, शांत मन, समृद्ध समाज’चा संदेश!
सामूहिक योगसत्र, योगनृत्य आणि पथनाट्यातून स्वच्छता जनजागृती; ६०० हून अधिक नागरिकांचा उत्स्फूर्त सहभाग!
पिंपरी, २१ जून २०२५ (मॅक्स मंथन डेली न्यूज): पिंपरी-चिंचवड महानगरपालिका आणि योग विद्या धाम, पिंपरी चिंचवड यांच्या संयुक्त विद्यमाने आंतरराष्ट्रीय योग दिन आज (शनिवार, २१ जून) मोठ्या उत्साहात साजरा करण्यात आला. डॉ. हेडगेवार क्रीडा संकुल, मासुळकर कॉलनी, पिंपरी येथे सकाळी आयोजित सामूहिक योग सत्रात नागरिकांनी, विशेषतः विद्यार्थ्यांनी उत्स्फूर्तपणे सहभाग घेत ‘आरोग्यम् धनसंपदा’चा संदेश दिला.
दीपप्रज्वलन आणि मान्यवरांची उपस्थिती
कार्यक्रमाचे दीपप्रज्वलन महापालिकेचे उप आयुक्त पंकज पाटील आणि सहाय्यक आयुक्त अतुल पाटील यांच्या हस्ते करण्यात आले. यावेळी योग विद्या धाम संस्थेचे प्रमुख प्रमोद निफाडकर, संस्था पदाधिकारी, योगप्रशिक्षक आणि शिक्षक वर्ग यांची देखील उपस्थिती होती.
योग सत्रात क्रीडा प्रबोधिनी, उद्यमनगर, राजीव गांधी विद्यालय, नेहरूनगर, तसेच इतर शाळांतील विद्यार्थ्यांनी मोठ्या उत्साहाने सहभाग घेतला. विद्यार्थ्यांनी विविध योगासने, प्राणायाम व ध्यान सत्रांमध्ये भाग घेतला. सत्रादरम्यान, योगाचे आरोग्यावर होणारे सकारात्मक परिणाम, नियमित योगाभ्यासाचे फायदे आणि निरोगी जीवनशैलीचे महत्त्व यावर उपस्थितांना मार्गदर्शन करण्यात आले.
सांस्कृतिक सादरीकरण आणि योगाचे महत्त्व
कार्यक्रमात अंजली संधाने व त्यांच्या मंडळींनी सुंदर योगनृत्य सादर केले, तर गुरुदेवी शेट्टी आणि त्यांच्या सहकाऱ्यांनी सामूहिक योग प्रात्यक्षिक करून दाखवले. योग विद्या धामचे प्रमोद निफाडकर यांनी ‘स्वस्थ शरीर, शांत मन आणि समृद्ध समाज’ या संदेशावर आधारित योग जागरूकतेविषयी उपस्थितांना सविस्तर मार्गदर्शन केले. त्यांनी श्वसन व तणावमुक्तीसाठी विशेष योगासनांचे महत्त्व विशद केले. कार्यक्रमाचे सूत्रसंचालन संगीता कळमकर यांनी केले.
यावेळी राजीव गांधी विद्यालयाच्या मुख्याध्यापिका नलिनी जाधव, शिक्षिका वैशाली शेलार, विद्या मिसाळ, मनिषा वानखेडे, नंदा सोंडकर, माधुरी सायखेडे, सुरेखा कुसाळकर, शिक्षक संतोष मुनतोंडे, संतोष कपाळे, क्रीडा प्रबोधिनी विद्यालय, उद्यमनगर विद्यालयाचे मुख्याध्यापक जयराम वायळ, शिक्षक ऋषिकांत वचकल, सोनाली पाटील, संग्राम मोहिते, राहुल मोरे, मनोज राऊत, प्रियांका पाटील, अक्षता बांगर तसेच महापालिकेच्या “क” क्षेत्रीय कार्यालयाचे – मुख्य आरोग्य निरीक्षक सतीश इंगेवाड, माहिती व जनसंपर्क विभागाचे छायाचित्रकार विलास साळवी, आरोग्य मुकादम दिलीप गायकवाड व इतर कर्मचारी वर्ग आदी यावेळी उपस्थित होते.
पथनाट्यातून स्वच्छतेचा संदेश: ‘स्वच्छता ही सेवा!’
या ‘योग संगम’ कार्यक्रमात स्वच्छता जनजागृतीसाठी एक प्रभावी पथनाट्य सादर करण्यात आले. विद्यार्थ्यांनी ओला व सुका कचरा, घरगुती घातक व सॅनिटरी कचरा यांचे विलगीकरण, प्लास्टिक पिशवीच्या वापराचे आरोग्यावर होणारे दुष्परिणाम, तसेच कापडी पिशवीचा पर्याय यावर प्रभावी सादरीकरण केले. महापालिकेची घंटागाडी सेवा वापरण्याचे आवाहनही यावेळी करण्यात आले.
हा कार्यक्रम महापालिकेच्या क्रीडा विभाग, आरोग्य विभाग आणि शिक्षण विभाग यांच्या संयुक्त समन्वयातून यशस्वीपणे पार पडला. स्थानिक नागरिक, विद्यार्थी आणि योगप्रेमी नागरिक देखील यावेळी बहुसंख्येने उपस्थित होते, ज्यामुळे कार्यक्रमाला मोठे यश मिळाले.
© २०२५ मॅक्स मंथन डेली न्यूज. सर्व हक्क राखीव.
