महाराष्ट्रात ‘भगतसिंग गिरी’चा एल्गार: शेतकऱ्यांच्या चक्काजामाने सरकार हादरले! ‘गांधीगिरी संपली – आता भगतसिंग गिरी सुरू!’
बच्चू कडूंचा थेट इशारा – “हा फक्त ट्रेलर आहे, पिक्चर अजून बाकी आहे!” पोकळ आश्वासनांनी फसवल्या गेलेल्या शेतकऱ्यांचा संताप रस्त्यावर!
परतवाडा, दि. २४ जुलै २०२५ (जयकुमार चर्जन): महाराष्ट्रातील रस्ते आजच्या दिवशी थांबले, पण या थांबण्यात दुःख नव्हते, तर शासनाच्या खोट्या आश्वासनांनी फसवले गेलेल्या शेतकऱ्यांचा संताप होता! ‘गांधीगिरी’चा काळ संपला असून, आता ‘भगतसिंग गिरी’ची सुरुवात झाली आहे, असा स्पष्ट इशारा देत शेतकरी आज रस्त्यावर उतरले. संपूर्ण महाराष्ट्रात तब्बल ५४२ ठिकाणी झालेल्या या ‘चक्काजाम’ आंदोलनाने शासनाला अक्षरशः हादरवून सोडले. कित्येक राष्ट्रीय महामार्ग तासनतास शेतकऱ्यांनी रोखून धरले होते, ज्यामुळे वाहनांच्या लांबच लांब रांगा लागलेल्या होत्या.
जात-पात विसरून, पेटलेला शेतकरी एकवटला!
आजच्या आंदोलनाचे सर्वात मोठे वैशिष्ट्य म्हणजे, कोणत्याही जात, धर्म, पक्ष किंवा संघटनेचा विसर पडून संपूर्ण महाराष्ट्रातील शेतकरी एकजुटीने सरकारविरोधात उभे राहिले. सर्वपक्षीय शेतकरी संघटना आणि नेत्यांनी एकत्र येत आपल्या मागण्यांसाठी बुलंद आवाज उठवला. “सातबारा कोरा करू” यासारख्या फसव्या घोषणांनी फसवले गेलेले शेतकरी आज कोरड्या जमिनीवर, थकीत कर्जदार म्हणून उभे आहेत. शासनाकडून मदतीची आशा ठेवणाऱ्या शेतकऱ्यांना आता बँका कर्ज देत नाहीत, शेती तोट्यात चालली आहे आणि सरकार मात्र गप्प आहे. शेतकऱ्यांचा आक्रोश आहे की, “हे धोरण नव्हे, ही शेतकऱ्यांच्या आत्महत्येची जमीन तयार करण्याची सरकारी रणनीती आहे!”
सरकारचे पोकळ दावे उघडे पडले: “आता आम्हाला शब्द नको, हिशोब हवा!”
आजच्या चक्काजाम आंदोलनात शेतकऱ्यांनी आपल्या पशुधनासह, मेंढपाळांनी शेकडो मेंढ्यांसह, बैलगाड्या व ट्रॅक्टर रस्त्यावर आणले. शासनाच्या कानठळ्या बसवणाऱ्या घोषणा देत, ‘आता आम्हाला शब्द नको, हिशोब हवा!’ अशी जोरदार मागणी केली. विशेष म्हणजे, रस्त्यांवर चक्क पत्त्यांचे डाव मांडण्यात आले होते – पण ही केवळ खेळी नव्हती, तर कृषिमंत्र्यांच्या रमी खेळण्यावरून सुरू असलेल्या ‘रमी सरकार’चा तीव्र निषेध होता!
बच्चू कडूंचा सरकारला ठणकावून इशारा: “हा फक्त ट्रेलर आहे, पिक्चर अजून बाकी आहे!”
प्रहार संघटनेचे नेते, बच्चू कडू यांनी यावेळी सरकारला थेट आणि खणखणीत इशारा दिला. ते म्हणाले, “आता कुठलीही पूर्वसूचना न देता मंत्रालयात घुसू. सरकारला शेवटचा इशारा आहे – हे फक्त ट्रेलर होतं! पुढचं पिक्चर एवढं धगधगतं असेल की सत्ताधाऱ्यांच्या बुडाला आग लागल्याशिवाय राहणार नाही!” पोलिसांच्या दडपशाहीचाही त्यांनी निषेध केला. “ज्या जिल्ह्यांमध्ये पोलिसांनी शेतकऱ्यांच्या कर्जमुक्तीची व मालाच्या हमीभावाची चळवळ दाबायचा प्रयत्न केला, तिथं पुन्हा चक्काजाम करणार,” असाही इशारा त्यांनी दिला. “आता लाठीने नाय, जनतेच्या लाटेने सरकार उडणार!” असा आत्मविश्वासही त्यांनी व्यक्त केला.
राज्यभरातील व्यापाऱ्यांचाही पाठिंबा: हे आता केवळ शेतकऱ्यांचं नव्हे, तर जनतेचं आंदोलन!
या आंदोलनाला राज्यभरातील व्यापाऱ्यांनीही आपले दुकाने बंद ठेवत पाठिंबा दिला. यातून हे स्पष्ट झाले आहे की, हे संकट केवळ शेतकऱ्यांचे नाही, तर ते आता सामान्य जनतेच्या उदरनिर्वाहाचे आणि त्यांच्या जगण्याचे संकट बनले आहे.
आंदोलनाचा पुढचा अध्याय – २९ जुलै रोजी होणार चिंतन:
शेतकऱ्यांनी आपल्या आंदोलनाचा पुढचा अध्याय २९ जुलै रोजी सुरू करण्याची घोषणा केली आहे. हरित क्रांतीचे जनक स्वर्गीय वसंतराव नाईक यांच्या स्मृतिस्थळी राज्यभरातील शेतकरी नेते एकत्र येऊन चिंतन करणार आहेत आणि आंदोलनाची पुढील दिशा अधिक तीव्र ठरणार असल्याचे संकेत दिले आहेत. सरकारने जर याहीवेळी दुर्लक्ष केले, तर यावेळचा चक्काजाम केवळ सुरुवात ठरेल, असा कडक इशारा देण्यात आला आहे. “शब्दाने फसवणं थांबवा, शेतकऱ्यांना हक्क द्या! नाहीतर ‘ट्रेलर’नंतरचा ‘पिक्चर’ तापदायक असेल. सरकारने शेतकऱ्यांच्या भावनांचा आदर करावा, आम्हाला उग्र आंदोलन करण्यास भाग पाडू नये!” अशी तीव्र मागणी शेतकऱ्यांनी केली आहे.
© २०२५ मॅक्स मंथन डेली न्यूज. सर्व हक्क राखीव.
