रक्तदान शिबिरात ५६१ जणांचे रक्तदान: तुळशीबाग गणपतीचा सामाजिक उपक्रम

मानाचा चौथा गणपती, श्री तुळशीबाग मंडळाकडून शतकोत्तर रौप्य महोत्सवानिमित्त आयोजन

पुणे: मानाचा चौथा महागणपती म्हणून प्रसिद्ध असलेल्या श्री तुळशीबाग सार्वजनिक गणेशोत्सव मंडळ ट्रस्टने आपल्या शतकोत्तर रौप्य महोत्सवी वर्षानिमित्त एका भव्य रक्तदान शिबिराचे आयोजन केले होते. या शिबिराला पुणेकरांनी उत्स्फूर्त प्रतिसाद दिला, आणि तब्बल ५६१ युवकांनी रक्तदान करून सामाजिक बांधिलकीचे दर्शन घडवले.

हे प्रेरणादायी शिबिर रविवार, दि. ३ ऑगस्ट २०२५ रोजी सकाळी ९ ते सायंकाळी ५ वाजेपर्यंत नु. म. वि. शाळा, बाजीराव रोड येथे आयोजित करण्यात आले होते. या रक्तदानात पुण्यातील विविध गणेश मंडळांचे पदाधिकारी, कार्यकर्ते आणि विविध ढोल ताशा पथकांचे वादक मोठ्या संख्येने सहभागी झाले होते. तरुणांप्रमाणेच तरुणींचाही उत्साह यावेळी विशेष लक्षवेधी ठरला.

मान्यवरांची उपस्थिती आणि ढोल-ताशा पथकांचा सहभाग

या भव्य रक्तदान शिबिराला कसबा मतदारसंघाचे आमदार श्री. हेमंत रासने, भाजपा पुणे शहर अध्यक्ष श्री. धीरज घाटे, तसेच मानाच्या पहिल्या श्री कसबा गणपती मंडळाचे अध्यक्ष श्री. श्रीकांत शेटे यांच्यासह अनेक मान्यवरांनी भेट देऊन आयोजकांना शुभेच्छा दिल्या.

शिबिरात सहभागी झालेल्या ढोल ताशा पथकांमध्ये रुद्रांग वाद्यपथक ट्रस्ट, स्वरुपवर्धिनी, श्री गजलक्ष्मी, शिवमुद्रा, गजर प्रतिष्ठान, स्वराज्य ट्रस्ट, उगम प्रतिष्ठान, तालगर्जना, मैत्री वेलफेअर फाउंडेशन, समर्थ प्रतिष्ठान, नादब्रह्म ट्रस्ट यांचा समावेश होता. त्यांच्या सहभागामुळे शिबिराला एक वेगळीच ऊर्जा मिळाली.

मंडळाच्या कार्यकर्त्यांचे अथक परिश्रम

या यशस्वी आयोजनासाठी श्री तुळशीबाग सार्वजनिक गणेशोत्सव मंडळ ट्रस्टचे अध्यक्ष श्री. विकास पवार, उपाध्यक्ष श्री. विनायक कदम, कोषाध्यक्ष श्री. नितीन पंडित, आणि स्वागताध्यक्ष श्री. कृष्णकुमार गोयल यांच्यासह सर्व कार्यकर्त्यांनी अथक परिश्रम घेतले. त्यांच्या प्रयत्नांमुळे हे शिबिर यशस्वी झाले आणि एक स्तुत्य सामाजिक उपक्रम पूर्णत्वास गेला.

© 2025 मॅक्स मंथन डेली न्यूज. सर्व हक्क राखीव.