स्तनपान सप्ताहाची जागरुकता: मोशी मनपा रुग्णालयात मातांना मार्गदर्शन 

रोटरी क्लब डायनॅमिक भोसरीच्या सहकार्याने उपक्रम; नवजात शिशु आणि मातांसाठी जागरूकता

मोशी, मॅक्स मंथन डेली न्यूज,दि. ८ ऑगस्ट २०२५: नवजात बाळासाठी मातेचे दूध हे अमृततुल्य असते. या अनमोल आहाराचे महत्त्व समाजात रुजवण्यासाठी आणि मातांना योग्य मार्गदर्शन देण्यासाठी जगभरात ‘स्तनपान सप्ताह’ साजरा केला जातो. याच अनुषंगाने, मोशी येथील पिंपरी-चिंचवड महानगरपालिकेच्या रुग्णालय आणि रोटरी क्लब ऑफ डायनॅमिक भोसरी यांच्या संयुक्त विद्यमाने गरोदर आणि स्तनदा मातांसाठी जागरूकता व मार्गदर्शनपर कार्यक्रमाचे आयोजन करण्यात आले.

वृक्षारोपण करून कार्यक्रमाचा शुभारंभ

या प्रेरणादायी कार्यक्रमाचे आयोजन पिंपरी चिंचवड महानगरपालिकेच्या यशवंतराव चव्हाण हॉस्पिटलचे मुख्य वैद्यकीय अधिकारी डॉ. लक्ष्मण गोफणे, अतिरिक्त वैद्यकीय अधिकारी डॉ. अभयचंद्र दादेवार, सहायक वैद्यकीय अधिकारी डॉ. अंजली ढोणे आणि भोसरी रुग्णालयाच्या प्रमुख डॉ. ऋतुजा लोखंडे यांच्या मार्गदर्शनाखाली करण्यात आले. कार्यक्रमाचा शुभारंभ वृक्षारोपण आणि झाडाला पाणी घालून करण्यात आला. यावेळी रोटरी क्लबचे अध्यक्ष डॉ. संतोष मोरे, सेक्रेटरी डॉ. योगेश गाडेकर, माजी अध्यक्ष दीपक सोनवणे, तसेच मनपाच्या डॉ. सुजाता गायकवाड यांच्यासह अनेक मान्यवर उपस्थित होते.

तज्ञ डॉक्टरांचे मोलाचे मार्गदर्शन

स्तनपानाचे महत्त्व आणि योग्य पद्धतींबाबत मातांना मार्गदर्शन करण्यासाठी विशेष व्याख्यानांचे आयोजन करण्यात आले होते. याप्रसंगी स्त्रीरोग व प्रसूती तज्ञ डॉ. सुजाता गायकवाड आणि स्तनपान सल्लागार नेहा विखानकर यांनी स्तनपानाचे फायदे, योग्य तंत्र आणि मातांनी घ्यावयाची काळजी याविषयी सखोल माहिती दिली. त्यांच्या व्याख्यानांमुळे उपस्थित मातांना अनेक प्रश्नांची उत्तरे मिळाली आणि त्यांच्या शंकांचे निरसन झाले.

विविध स्पर्धा व उपक्रमांनी कार्यक्रमात भर

या कार्यक्रमात केवळ मार्गदर्शनच नाही, तर विविध स्पर्धा आणि उपक्रमांचेही आयोजन करण्यात आले होते. स्तनपान सप्ताहानिमित्त रांगोळी आणि पोस्टर प्रदर्शन व स्पर्धा घेऊन विजेत्यांना बक्षिसे वितरित करण्यात आली. या स्पर्धांमध्ये मोशी दवाखान्यातील नर्सिंग स्टाफ, सीनियर ए.एन.एम. ज्योत्स्ना बधे व शामल गोसावी तसेच मोशी झोनच्या आशा वर्कर्स आणि मेडिकल स्टाफ यांनी सक्रिय सहभाग घेतला. कार्यक्रमाचे सूत्रसंचालन डॉ. योगेश गाडेकर यांनी केले, तर आभार डॉ. विकल्प भोई यांनी मानले. हा कार्यक्रम यशस्वी करण्यासाठी सर्वांनी मोलाचे योगदान दिले.

© 2025 मॅक्स मंथन डेली न्यूज. सर्व हक्क राखीव.