क्रांती दिनानिमित्त पिंपरी-चिंचवड शहरात हुतात्म्यांना अभिवादन
‘इन्कलाब जिंदाबाद’ आणि ‘भारत माता की जय’ च्या घोषणांनी शहर दुमदुमले
पिंपरी, दि. ९ ऑगस्ट २०२५: भारताच्या स्वातंत्र्य संग्रामातील महत्त्वाचा दिवस असलेल्या ९ ऑगस्ट, म्हणजेच क्रांती दिनानिमित्त पिंपरी-चिंचवड शहरात विविध ठिकाणी हुतात्म्यांना आदराने अभिवादन करण्यात आले. ‘भारत माता की जय’ आणि ‘इन्कलाब जिंदाबाद’ अशा घोषणांनी शहरातील वातावरण देशभक्तीमय झाले होते.
पिंपरी चिंचवड महानगरपालिकेच्या वतीने आयोजित या कार्यक्रमात, उपायुक्त अण्णा बोदडे यांच्या हस्ते पुष्पहार अर्पण करून शहिदांना आदरांजली वाहण्यात आली. याप्रसंगी माजी नगरसदस्या अश्विनी चिंचवडे, उपायुक्त सचिन पवार, क्षेत्रीय अधिकारी अश्विनी गायकवाड, तसेच विविध विभागांचे अधिकारी, कर्मचारी आणि नागरिक मोठ्या संख्येने उपस्थित होते.
हुतात्मा चापेकर बंधूंना अभिवादन
चिंचवड येथे असलेल्या हुतात्मा चापेकर बंधूंच्या समूह शिल्पाला पुष्पहार अर्पण करून त्यांना आदराने वंदन करण्यात आले. दामोदर हरी चापेकर, बाळकृष्ण चापेकर आणि वासुदेव चापेकर यांनी पुण्यामध्ये जुलमी इंग्रज अधिकारी रॅन्ड याची हत्या करून क्रांतीची मशाल अधिक प्रज्वलित केली होती. या शौर्याबद्दल त्यांना फाशीची शिक्षा झाली. त्यांच्या बलिदानाच्या स्मरणार्थ हे समूह स्मारक उभारण्यात आले आहे.
क्रांतिगुरू लहुजी वस्ताद साळवे आणि वासुदेव बळवंत फडके यांना वंदन
चिंचवड स्टेशन येथील क्रांतिगुरू लहुजी वस्ताद साळवे आणि क्रांतिकारक वासुदेव बळवंत फडके यांच्या पुतळ्यांनाही पुष्पहार अर्पण करून अभिवादन करण्यात आले. आद्य क्रांतीगुरू साळवे हे युद्धकलेत निपुण होते आणि त्यांनी ‘जगेन तर देशासाठी आणि मरेन तर देशासाठी’ अशी क्रांतिकारी घोषणा केली होती.
शहीद भगतसिंग आणि नारायण दाभाडे यांचे स्मरण
दापोडी येथे शहीद भगतसिंग आणि हुतात्मा नारायण दाभाडे यांच्या पुतळ्यांनाही आदरांजली वाहण्यात आली. भगतसिंग, राजगुरू आणि सुखदेव यांच्या बलिदानाने देशभक्तांना मोठी प्रेरणा मिळाली. या कार्यक्रमाला शहीद नारायण दाभाडे यांचे नातू विजय दाभाडे हे देखील उपस्थित होते.
उपायुक्त अण्णा बोदडे यांनी याप्रसंगी बोलताना सांगितले की, भारताच्या स्वातंत्र्यपूर्व काळात पिंपरी-चिंचवड शहराचे देशाच्या स्वातंत्र्यासाठी मोठे योगदान आहे. शहरातील तसेच देशातील सर्व शहीद, ज्ञात-अज्ञात स्वातंत्र्यसैनिक आणि वीर जवानांप्रति त्यांनी कृतज्ञता व्यक्त केली.
© 2025 मॅक्स मंथन डेली न्यूज. सर्व हक्क राखीव.
