महाराष्ट्राच्या राजकारणाला नवी दिशा देणाऱ्या ‘ध्येयवादी देवेंद्रजी’ पुस्तकाचे मुंबईत थाटात प्रकाशन
मुख्यमंत्र्यांच्या दूरदृष्टी, विकासात्मक निर्णयांचा सखोल आढावा; तरुण पिढीसाठी प्रेरणादायी ठरेल असा विश्वास
19 ऑगस्ट २०२५, मॅक्स मंथन डेली न्यूज:
मुंबई: महाराष्ट्राचे लोकप्रिय मुख्यमंत्री देवेंद्र फडणवीस यांच्या ध्येयवादी आणि प्रेरक कार्याचा मागोवा घेणाऱ्या ‘ध्येयवादी देवेंद्रजी’ या पुस्तकाचा भव्य प्रकाशन सोहळा आज भारतीय जनता पार्टीच्या महाराष्ट्र प्रदेश कार्यालयात मोठ्या दिमाखात पार पडला. या पुस्तकाचे प्रकाशन भाजपचे महाराष्ट्र प्रदेशाध्यक्ष आणि आमदार रवींद्र चव्हाण यांच्या शुभहस्ते झाले.
या पुस्तकात मुख्यमंत्री देवेंद्र फडणवीस यांच्या राजकीय प्रवासातील अनेक महत्त्वाच्या टप्प्यांचा सखोल आढावा घेण्यात आला आहे. त्यांच्या दूरदृष्टीमुळे राज्याला मिळालेली नवी दिशा, समाजाच्या सर्व स्तरांसाठी घेतलेले धोरणात्मक निर्णय, कृषी, शिक्षण, पायाभूत सुविधा आणि औद्योगिक विकासाला दिलेले बळ, तसेच त्यांचे सामाजिक उपक्रम यांचे सविस्तर वर्णन यात करण्यात आले आहे. त्यांच्या संघर्षमय पण प्रेरणादायी कहाणीने हे पुस्तक तरुण पिढीसाठी एक उत्तम मार्गदर्शक ठरत आहे.
या सोहळ्यावेळी बोलताना पिंपरी-चिंचवडचे नेते शत्रुघ्न (बापू) काटे म्हणाले, “देवेंद्रजी फडणवीस साहेब हे खऱ्या अर्थाने ध्येयवादी नेतृत्व आहेत. त्यांनी आपल्या कामातून आणि विचारांतून अनेक तरुणांना प्रेरणा दिली आहे. हे पुस्तक केवळ त्यांच्या कार्याचे दर्शन घडवत नाही, तर त्यांच्या दूरदृष्टी आणि कठोर परिश्रमाचेही प्रतीक आहे.”
पुस्तकाच्या प्रकाशनामुळे संपूर्ण वातावरण प्रेरणादायी बनले होते. उपस्थितांनी या महत्त्वपूर्ण कार्याचे स्वागत करत लेखकाचे मनःपूर्वक अभिनंदन केले. याप्रसंगी आमदार अमित गोरखे, सुजाता पलांडे, शीतल शिंदे, मोरेश्वर शेंडगे, कैलास सानप, अजित कुलथे, नामदेव ढाके, माऊली थोरात, संजीवनी पांडे, ॲड. गोरखनाथ झोळ, राजाभाऊ दुर्गे यांच्यासह भाजपचे अनेक नेते, पदाधिकारी, कार्यकर्ते आणि समाजातील विविध क्षेत्रांतील मान्यवर मोठ्या संख्येने उपस्थित होते.
हा सोहळा म्हणजे देवेंद्र फडणवीस यांच्या यशस्वी नेतृत्वाचा गौरव असून, हे पुस्तक महाराष्ट्राच्या राजकारणातील एका महत्त्वाच्या अध्यायाचे द्योतक आहे.
© 2025 मॅक्स मंथन डेली न्यूज. सर्व हक्क राखीव.
