पुणेकरांनो सावधान! वाहतूक नियमांचे उल्लंघन महागात पडणार

वाहतूक विभागाकडून शहरात अत्याधुनिक ‘इंटरसेप्टर व्हेईकल्स’ दाखल; रेकलेस ड्रायव्हिंगला आळा घालण्याचा प्रयत्न

पिंपरी, पुणे, ०३ सप्टेंबर २०२५:

पुण्यातील वाहतुकीला शिस्त लावण्यासाठी आणि रस्त्यांवरील अपघातांना आळा घालण्यासाठी महाराष्ट्र परिवहन विभागाने एक मोठा निर्णय घेतला आहे. आता शहरात आधुनिक “इंटरसेप्टर व्हेईकल्स” दाखल होणार असून, या गाड्या वाहतुकीचे नियम मोडणाऱ्यांवर बारीक नजर ठेवतील. सुमारे आठ महिन्यांपूर्वी खरेदी केलेल्या या वाहनांमध्ये अत्याधुनिक तंत्रज्ञान बसवण्यात आले आहे.

अत्याधुनिक तंत्रज्ञानाचा वापर

नवीन इंटरसेप्टर व्हेईकल्स अत्याधुनिक सिस्टीमने सुसज्ज आहेत. त्यामध्ये ऑटोमॅटिक नंबर प्लेट रेकग्निशन (ANPR) आणि रडार-आधारित मॉनिटरिंग प्रणालींचा समावेश आहे. या गाड्या रस्त्यांवर वेगाने धावणारी वाहने, सिग्नल तोडणारे, लेनची शिस्त न पाळणारे आणि सीटबेल्ट न लावलेल्या चालकांवर लक्ष ठेवतील. तसेच हेल्मेट न घालणाऱ्या दुचाकीस्वारांवरही या गाड्या कारवाई करतील.

विशेष म्हणजे, हे तंत्रज्ञान १०० ते ५०० मीटर अंतरावरूनही वाहतूक नियमांचे उल्लंघन ओळखू शकते. उल्लंघनाची नोंद तात्काळ घेऊन ई-चलन प्रणालीद्वारे दंड आपोआप तयार केला जाईल, ज्यामुळे मानवी हस्तक्षेप कमी होईल.

वाहतुकीच्या नियमांमध्ये शिस्त

पुणे प्रादेशिक परिवहन कार्यालयाचे (RTO) उपप्रादेशिक अधिकारी स्वप्निल भोसले यांनी याविषयी माहिती दिली. ते म्हणाले, “या इंटरसेप्टर वाहनांना रडार प्रणालीसह कार्यान्वित करण्याचे काम सुरू झाले आहे. लवकरच ही प्रणाली शहरात सुरू होईल. ही वाहने वाहतुकीचे उल्लंघन ट्रॅक करण्यास मदत करतील आणि मिळालेला डेटा तत्काळ अंमलबजावणी प्रणालीकडे पाठवला जाईल.”

या उपक्रमामुळे अपघातांची संख्या कमी होईल, बेदरकारपणे वाहन चालवणाऱ्यांवर नियंत्रण येईल आणि पुण्यातील वाढत्या वाहतुकीला शिस्त लागेल, अशी अपेक्षा आहे.

© 2025 मॅक्स मंथन डेली न्यूज. सर्व हक्क राखीव.

‘निजाम गॅझेटमध्ये मराठा आणि कुणबी वेगळेच’! मराठा आरक्षणावर अ‍ॅड. मंगेश सासणे यांचा स्फोटक खुलासा

ऐतिहासिक पुराव्यांसह जरांगे पाटलांच्या भूमिकेला थेट आव्हान; ‘हे दस्तऐवज खोटे ठरवणार का?’ असा सरकारला सवाल.

 पुणे, ०२ सप्टेंबर २०२५: मराठा आरक्षणासाठी मनोज जरांगे पाटील यांनी निजाम काळातील दस्तावेजांचा आधार घेत मराठा-कुणबी एकच असल्याचा दावा केला असताना, ओबीसी समाजाचे वकील अ‍ॅड. मंगेश सासणे यांनी थेट हैदराबाद गॅझेटमध्येच मराठा आणि कुणबी वेगळे असल्याचा दावा केला आहे. त्यांनी ऐतिहासिक कागदपत्रे दाखवत, मराठा समाजाला कुणबी दाखल्याद्वारे ओबीसीमध्ये घुसविण्याचा प्रयत्न सुरू असल्याचा आरोप केला आणि यामुळे आरक्षणाच्या वादाला एक नवे वळण मिळाले आहे.

ऐतिहासिक दस्तावेजांमधून पुरावे सादर

मंगेश सासणे यांनी आपल्या भाषणात दोन महत्त्वाचे दस्तऐवज सादर केले. पहिले ब्रिटिशकालीन ‘कोलाबा (आजचा रायगड) गॅझेट’. या गॅझेटमधील पान क्रमांक ५४ वर कुणबी समाजाची नोंद असल्याचे सांगत, कुणबी हे ‘शूद्र’ मानले जातात, असे स्पष्ट केले. याउलट, इतर अनेक गॅझेटमध्ये मराठ्यांना ‘क्षत्रिय’ म्हणून नमूद केले आहे. हा वर्णभेद दाखवून त्यांनी दोन्ही समाज ऐतिहासिकदृष्ट्या वेगळे असल्याचे सिद्ध करण्याचा प्रयत्न केला.

हैदराबाद गॅझेटचा संदर्भ आणि थेट आकडेवारी

ज्या हैदराबाद गॅझेटचा हवाला देऊन मनोज जरांगे पाटील मराठा आणि कुणबी एक असल्याचा दावा करतात, त्याच गॅझेटमधील माहिती मंगेश सासणे यांनी उघड केली. त्यांनी स्पष्टपणे सांगितले की, या गॅझेटच्या पान क्रमांक ३२ वर ‘कापू’ (म्हणजेच कुणबी) समाजाची नोंद असून, त्यांची लोकसंख्या ४२,८४६ इतकी दिली आहे. तर, याच गॅझेटच्या पान क्रमांक ३३ वर ‘मराठा’ समाजाची नोंद वेगळी असून, त्यांची लोकसंख्या ५०,६३७ इतकी दर्शविली आहे.

‘ही आकडेवारी खोटं ठरवणार का?’

मराठा आणि कुणबी एकच असल्याच्या दाव्याला या सरकारी नोंदींमधून थेट आव्हान देत अ‍ॅड. सासणे यांनी सरकार आणि जरांगे पाटलांवर प्रश्नांचा भडिमार केला. “हे सगळे गॅझेट मुख्यमंत्री आणि मनोज जरांगे खोटे ठरवणार आहेत का? ही आकडेवारी खोटी ठरवणार आहेत का?” असे सवाल त्यांनी केले. निजाम काळातील अधिकृत दस्तावेजांनुसार जर मराठा आणि कुणबी समाजाच्या नोंदी वेगळ्या आहेत, तर त्यांना एकच कसे मानता येईल, असा त्यांचा युक्तिवाद आहे.

मराठा आरक्षणाचा मुद्दा रस्त्यावरच्या आंदोलनापलीकडे जाऊन आता ऐतिहासिक दस्तऐवजांच्या चिकित्सेपर्यंत पोहोचला आहे. यामुळे, आता या गंभीर आरोपांवर सरकार आणि आंदोलनाचे नेतृत्व करणाऱ्यांची काय प्रतिक्रिया येते, याकडे सर्वांचे लक्ष लागले आहे.

© 2025 मॅक्स मंथन डेली न्यूज. सर्व हक्क राखीव.

छायाचित्रकारांच्या कलाकृतींचे प्रदर्शन पुणेकरांसाठी खुले

पुणे श्रमिक पत्रकार संघ आणि पुणे फेस्टिव्हलचा अभिनंदनीय उपक्रम

२९ ऑगस्ट २०२५, मॅक्स मंथन डेली न्यूज:

पुणे – पुणे श्रमिक पत्रकार संघ आणि पुणे फेस्टिव्हल यांच्या संयुक्त विद्यमाने आयोजित करण्यात आलेल्या छायाचित्र प्रदर्शनाचे उद्घाटन बालगंधर्व कलादालन येथे झाले. या प्रदर्शनात पुणे शहरातील ४५ वृत्तपत्र छायाचित्रकारांनी टिपलेली सुमारे तीनशे छायाचित्रे पुणेकरांसाठी मांडण्यात आली आहेत.

छायाचित्रे जपतात देशाचा इतिहास

या प्रदर्शनाचे उद्घाटन काँग्रेसचे ज्येष्ठ नेते उल्हासदादा पवार आणि सावित्रीबाई फुले पुणे विद्यापीठाचे प्र-कुलगुरू प्रा. डॉ. पराग काळकर यांच्या हस्ते झाले. यावेळी बोलताना खासदार प्रणिती शिंदे म्हणाल्या, “छायाचित्रकार नसते तर देशाचा इतिहास कधीच कळला नसता. छायाचित्रांमुळेच आपला इतिहास पुढील पिढीपर्यंत पोहोचतो. तो जपण्याची आणि टिपण्याची मोठी जबाबदारी छायाचित्रकारांवर आहे.”

उल्हासदादा पवार यांनी पुणे फेस्टिव्हलचे संस्थापक सुरेश कलमाडी यांचे स्मरण केले आणि जगभरात पोहोचलेल्या या फेस्टिव्हलने छायाचित्रांचे प्रदर्शन भरवल्याबद्दल कौतुक केले. या प्रदर्शनाचे उद्घाटन काँग्रेसचे ज्येष्ठ नेते उल्हासदादा पवार, सावित्रीबाई फुले पुणे विद्यापीठाचे प्र-कुलगुरू प्रा. डॉ. पराग काळकर यांच्या हस्ते झाले. खासदार प्रणिती शिंदे, पुणे फेस्टिव्हलचे उपाध्यक्ष कृष्णकुमार गोयल, मुख्य संयोजक ॲड. अभय छाजेड, श्रमिक पत्रकार संघाचे अध्यक्ष ब्रिजमोहन पाटील, सरचिटणीस मंगेश फल्ले, सचिन आडेकर, आबा जगताप आदी यावेळी उपस्थित होते.

पोलीस आयुक्तांचीही उपस्थिती

पोलीस आयुक्त अमितेश कुमार यांनीही या प्रदर्शनाला भेट देऊन छायाचित्रकारांचे कौतुक केले. हे प्रदर्शन ३० ऑगस्टपर्यंत सकाळी १० ते रात्री ८ या वेळेत सर्वांसाठी विनामूल्य खुले राहणार आहे.

© 2025 मॅक्स मंथन डेली न्यूज. सर्व हक्क राखीव.

वाघोली-बकोरी रोडच्या दुरवस्थेमुळे नागरिक आक्रमक; रस्त्यावर ठिय्या आंदोलन

१३ वर्षांपासून खड्डेमय रस्त्यामुळे अपघात वाढले; नागरिकांचा तात्काळ दुरुस्तीचा आणि बिल्डरवर गुन्हा दाखल करण्याचा इशारा

पुणे/वाघोली – वाघोली-बकोरी रोडची गेल्या १३ वर्षांपासून दुरवस्था झाली असून, खड्डे आणि खराब रस्त्यांमुळे होणाऱ्या वाढत्या अपघातांना कंटाळून संतप्त नागरिकांनी थेट रस्त्यावर उतरून ठिय्या आंदोलन केले. रविवारी (दि. २४) येथील नागरिकांनी एकत्र येत रस्ता रोको करण्याचा प्रयत्न केला.

नागरिकांनी तीव्र भावना व्यक्त करत म्हटले की, या रस्त्यामुळे दररोज अपघात होत असून अनेकांना गंभीर जखमा होत आहेत. तसेच, वाहनांचेही प्रचंड नुकसान होत आहे. या परिस्थितीतून मार्ग काढण्यासाठी नागरिकांनी तात्काळ रस्त्याची दुरुस्ती करण्याची मागणी केली. या रस्त्याच्या स्थितीला जबाबदार असणाऱ्या बिल्डरवर गुन्हा दाखल करण्याची मागणीही यावेळी करण्यात आली.

पोलिसांकडून तात्पुरता तोडगा आणि कारवाईचे आश्वासन

आंदोलनाची माहिती मिळताच वाघोली पोलीस घटनास्थळी दाखल झाले. त्यांनी नागरिकांचे म्हणणे ऐकून घेतले आणि वाहतूक सुरळीत ठेवली. नागरिकांच्या मागणीनुसार, पोलिसांनी त्यांचे जबाब घेण्यास सुरुवात केली आहे. पोलिसांनी संबंधित बिल्डरचीही चौकशी केली असून, वरिष्ठांच्या सूचनेनुसार गुन्हा दाखल करण्याची कारवाई केली जाईल, असे आश्वासन दिले आहे.

हा प्रश्न तातडीने न सुटल्यास येत्या काही दिवसांत आमरण उपोषण करण्याचा इशाराही आंदोलकांनी दिला आहे. या आंदोलनाने प्रशासनाचे लक्ष वेडल्याने या प्रश्नावर लवकरच तोडगा निघेल अशी आशा व्यक्त केली जात आहे.

© 2025 मॅक्स मंथन डेली न्यूज. सर्व हक्क राखीव.

विकसित भारतासाठी नव तंत्रज्ञान उपयुक्त: डॉ. सुरेश गोसावी

पीसीसीओईआर येथे पाचव्या ‘एशियाकॉन-२५’ आंतरराष्ट्रीय परिषदेचे उद्घाटन; १६ देशांतील २५६ शोधनिबंधांचे सादरीकरण

२५ ऑगस्ट २०२५, मॅक्स मंथन डेली न्यूज:

पुणे – भारतात ऊर्जा, कृत्रिम बुद्धिमत्ता (AI) आणि डिजिटल तंत्रज्ञानाचा वापर झपाट्याने वाढत आहे. यामुळेच देश प्रगतीपथावर वाटचाल करत असून, नव तंत्रज्ञान विकसित भारतासाठी अत्यंत उपयुक्त ठरत आहे, असे मत सावित्रीबाई फुले पुणे विद्यापीठाचे कुलगुरू डॉ. सुरेश गोसावी यांनी व्यक्त केले.

ते पिंपरी चिंचवड एज्युकेशन ट्रस्ट (पीसीईटी) संचालित पिंपरी चिंचवड कॉलेज ऑफ इंजिनिअरिंग ॲन्ड रिसर्च (पीसीसीओईआर) येथे आयोजित पाचव्या ‘एशियाकॉन-२५’ आंतरराष्ट्रीय परिषदेच्या उद्घाटनप्रसंगी बोलत होते. या परिषदेचे आयोजन पीसीसीओईआर आणि आयईईई यांच्या संयुक्त विद्यमाने करण्यात आले होते.

जागतिक स्तरावर संशोधकांना व्यासपीठ

या आंतरराष्ट्रीय परिषदेला सोळा देशांमधून आलेल्या २ हजार २६२ प्रवेशिकांमधून एकूण २५६ शोधनिबंध सादरीकरणासाठी निवडले गेले, असे प्रास्ताविकेत डॉ. राहुल मापारी यांनी सांगितले. ही परिषद संशोधकांसाठी एक महत्त्वाचे व्यासपीठ आहे, जिथे त्यांना विज्ञान आणि तंत्रज्ञानातील प्रगतीची माहिती मिळते, नवकल्पनांची देवाणघेवाण होते आणि पुढील वाटचालीस योग्य दिशा मिळते, असे मत सावी इन्फ्रास्ट्रक्चरचे संचालक डॉ. विकास पाटील यांनी व्यक्त केले.

गेल्या पाच वर्षांपासून पीसीईटीच्या सहयोगाने अशा आंतरराष्ट्रीय परिषदांचे यशस्वी आयोजन होत असल्याचा आनंद वाटत असल्याचे आयईईईचे डॉ. शशिकांत पाटील यांनी नमूद केले.

तंत्रज्ञानाचा उपयोग समाज कल्याणासाठी

या परिषदेच्या आयोजनाचा मुख्य उद्देश स्पष्ट करताना पीसीसीओईआरचे संचालक डॉ. हरिश तिवारी म्हणाले की, तंत्रज्ञानाचा उपयोग समाजाच्या उन्नतीसाठी व्हावा, या दृष्टीने चर्चा आणि संशोधनाला चालना देणे महत्त्वाचे आहे.

या कार्यक्रमात ‘एशियाकॉन’ परिषदेच्या स्मरणिकेचे प्रकाशन करण्यात आले. परिषदेमध्ये विविध विद्याशाखांचे प्रमुख, प्राध्यापक आणि विद्यार्थी उपस्थित होते. पीसीईटीच्या पदाधिकाऱ्यांनी उपस्थित प्रतिनिधींचे स्वागत करून परिषदेला शुभेच्छा दिल्या.

© 2025 मॅक्स मंथन डेली न्यूज. सर्व हक्क राखीव.

तंत्रज्ञान क्षेत्रात भारताला जागतिक स्तरावर अनेक संधी: प्रा. राव तुमाला

पीसीसीओईमध्ये दोन आंतरराष्ट्रीय परिषदांचे उद्घाटन; १६ देशांतील संशोधकांचा सहभाग

२३ ऑगस्ट २०२५, मॅक्स मंथन डेली न्यूज:

पुणे – गेल्या काही वर्षांत भारताने विज्ञान आणि तंत्रज्ञान क्षेत्रात मोठी प्रगती साधली आहे. नवकल्पना, निर्मिती, उत्पादन आणि कृत्रिम बुद्धिमत्तेच्या प्रभावी वापरामुळे जागतिक स्तरावर तंत्रज्ञान क्षेत्रात भारतासाठी अनेक संधी निर्माण झाल्या आहेत, असे प्रतिपादन मायक्रो इलेक्ट्रॉनिक पॅकिंग इनोव्हेशन्सचे पुरस्कर्ते प्रा. राव तुमाला यांनी केले.

ते पिंपरी चिंचवड एज्युकेशन ट्रस्ट (पीसीईटी) संचालित पिंपरी चिंचवड कॉलेज ऑफ इंजिनिअरिंग (पीसीसीओई) येथे नवव्या ‘आयसीसीयुबीईए-२५’ आणि चौथ्या ‘आयमेस-२५’ या दोन आंतरराष्ट्रीय परिषदांच्या उद्घाटनप्रसंगी बोलत होते. ही दोन दिवसांची परिषद ‘संगणन, संप्रेषण, नियंत्रण आणि ऑटोमेशन’ तसेच ‘यांत्रिक अभियांत्रिकीमधील नवकल्पना’ या विषयांवर आयोजित करण्यात आली आहे.

संशोधन आणि नवकल्पनांना व्यासपीठ

या परिषदेसाठी भारतासह १६ परदेशांमधून एकूण १२४० शोधनिबंध आले होते. त्यापैकी २१४ शोधनिबंध ‘आयसीसीयुबीईए’ साठी, तर २६० प्रवेशिकांमधून १२० शोधनिबंध ‘आयमेस’ साठी निवडण्यात आले, अशी माहिती डॉ. जयश्री कट्टी आणि डॉ. नरेंद्र देवरे यांनी दिली.

या परिषदेचा मुख्य उद्देश संशोधकांच्या नवकल्पनांना प्रोत्साहन देणे आणि राष्ट्रीय तसेच आंतरराष्ट्रीय पातळीवरील संशोधकांना एक व्यासपीठ उपलब्ध करून देणे हा आहे, असे पीसीसीओईचे संचालक डॉ. गोविंद कुलकर्णी यांनी सांगितले. ‘तंत्रज्ञानाच्या सहाय्याने समाजाला चांगल्या सेवा मिळाल्या पाहिजेत, यासाठी आयईईई काम करत असून, या परिषदेमुळे विद्यार्थ्यांना भविष्यात मोठा फायदा होईल,’ असे मत आयईईईचे पुणे विभागीय प्रमुख डॉ. अमर बुचडे यांनी व्यक्त केले.

या कार्यक्रमात परिषदेच्या स्मरणिकेचे प्रकाशनही करण्यात आले. या परिषदेसाठी विविध देशांतील प्रतिनिधी, प्राध्यापक आणि विद्यार्थी मोठ्या संख्येने उपस्थित होते. पीसीईटीच्या पदाधिकाऱ्यांनी उपस्थित मान्यवरांचे स्वागत करून परिषदेला शुभेच्छा दिल्या.

© 2025 मॅक्स मंथन डेली न्यूज. सर्व हक्क राखीव.

‘उत्कृष्ट संशोधन’ घडवण्यासाठी ISB&M पुणे येथे आंतरराष्ट्रीय FDP चे आयोजन

संशोधन पद्धतीशास्त्र, डेटा विश्लेषण आणि अत्याधुनिक साधनांवर तज्ज्ञांचे मार्गदर्शन; ‘संशोधन संस्कृती’ विकसित करण्याचे उद्दिष्ट

२२ ऑगस्ट २०२५, मॅक्स मंथन डेली न्यूज:

पुणे – शैक्षणिक संशोधन आणि व्यावसायिक उत्कृष्टतेला चालना देण्यासाठी इंटरनॅशनल स्कूल ऑफ बिझनेस अँड मीडिया (ISB&M), पुणे येथे ‘उत्कृष्ट दर्जाचे संशोधन डिझाईनिंग व पब्लिशिंग’ या विषयावर चार दिवसीय आंतरराष्ट्रीय फॅकल्टी डेव्हलपमेंट प्रोग्रॅम (FDP) यशस्वीरीत्या पार पडला. संस्थेचे संस्थापक-अध्यक्ष डॉ. प्रमोद कुमार आणि डॉ. अरुण जोशी यांच्या सहकार्याने आयोजित या हायब्रीड कार्यक्रमात ६५ हून अधिक संशोधकांनी सहभाग घेतला.

या कार्यक्रमाचा उद्देश “जिज्ञासा-केंद्री संशोधन संस्कृती विकसित करणे” असल्याचे डॉ. अरुण जोशी यांनी सांगितले. या FDP मध्ये डॉ. मीना बेईगी (साउथॅम्प्टन बिझनेस स्कूल, यूके), डॉ. रमाधार सिंह, डॉ. प्रवीण कुमार (बार्कलेज इंडिया) यांसारख्या आंतरराष्ट्रीय प्राध्यापकांनी संशोधकांना बहुमोल मार्गदर्शन केले.

या तज्ज्ञांनी संशोधन पद्धतीशास्त्र, डेटा विश्लेषण, Smart PLS, SPSS, बिब्लियोमेट्रिक्स आणि मेटा-अ‍ॅनॅलिसिस यांसारख्या विषयांवर सखोल माहिती दिली. ज्यामुळे सहभागी संशोधकांना त्यांच्या कामात अधिक अचूकता आणि दर्जेदार परिणाम मिळण्यास मदत होईल.

संस्थेचे अध्यक्ष डॉ. प्रमोद कुमार म्हणाले, “एक प्रभावी पीजीडीएम संस्था दूरदृष्टीपूर्ण नेतृत्व आणि शैक्षणिक उत्कृष्टतेतून उद्याचे जागतिक बिझनेस लीडर्स घडवते. हे एफडीपी त्या ध्येयाचे प्रतीक आहे.”

अशा कार्यक्रमांच्या माध्यमातून ISB&M, पुणे केवळ विद्यार्थ्यांनाच नाही, तर शिक्षण आणि संशोधन क्षेत्रात कार्यरत असलेल्या व्यक्तींनाही जागतिक दर्जाचे ज्ञान उपलब्ध करून देत आहे.

© 2025 मॅक्स मंथन डेली न्यूज. सर्व हक्क राखीव.

राज्यातील आपत्तीकडे दुर्लक्ष करून मुख्यमंत्री राहुल गांधींवर टीका करतायेत: दीपक केदार

‘महाराष्ट्राचे दुर्दैव की इतके असंवेदनशील मुख्यमंत्री राज्याला लाभले’; ऑल इंडिया पॅंथर सेनेचा हल्लाबोल

 १९ ऑगस्ट २०२५, मॅक्स मंथन डेली न्यूज:

पुणे: राज्यात गेल्या काही दिवसांपासून सुरू असलेल्या संततधार पावसामुळे अर्धा महाराष्ट्र उद्ध्वस्त झाला आहे, अनेक ठिकाणी लोकांचा मृत्यू झाला आहे, आणि शेतीचे मोठे नुकसान झाले आहे. अशा गंभीर परिस्थितीत राज्यातील मुख्यमंत्री यावर कोणतेही ठोस पाऊल न उचलता विरोधी पक्षनेते राहुल गांधी यांच्यावर ‘किलर की लायर’ (खूनी की खोटा) यावरून बोलत आहेत. राज्याच्या या दुर्दशेवर ऑल इंडिया पॅंथर सेनेचे राष्ट्रीय अध्यक्ष दीपक केदार यांनी तीव्र नाराजी व्यक्त केली आहे.

दीपक केदार यांनी एका निवेदनात म्हटले आहे की, “राज्याचे हे दुर्दैव आहे की, इतके असंवेदनशील मुख्यमंत्री राज्याला लाभले आहेत. एका बाजूला पूर आणि अतिवृष्टीने शेतकरी आणि सामान्य जनतेचे जीवन उद्ध्वस्त झाले आहे, तर दुसऱ्या बाजूला मुख्यमंत्री संवेदनशीलतेचा अभाव दाखवत राजकीय टीका-टिप्पणीत व्यस्त आहेत.”

केदार म्हणाले की, राज्याच्या प्रमुख म्हणून मुख्यमंत्र्यांनी सर्वप्रथम पूरग्रस्त भागांना भेट देऊन, मदतकार्याची पाहणी करणे आणि आपद्ग्रस्तांना दिलासा देणे अपेक्षित आहे. मात्र, या आपत्तीला गांभीर्याने न घेता ते केवळ राजकीय विरोधकांवर टीका करून स्वतःची प्रतिमा जपण्याचा प्रयत्न करत आहेत.

राज्यात अनेक ठिकाणी पुरामुळे घरे, शेती आणि पायाभूत सुविधांचे मोठे नुकसान झाले आहे. शेतकऱ्यांच्या उभ्या पिकांची नासाडी झाली आहे, ज्यामुळे ते आर्थिक संकटात सापडले आहेत. अशा वेळी, शेतकऱ्यांसाठी त्वरित मदत पॅकेज जाहीर करणे आणि पूरग्रस्तांच्या पुनर्वसनासाठी तातडीने उपाययोजना करणे गरजेचे आहे. मात्र, सरकारने याकडे दुर्लक्ष केल्याचा आरोप केदार यांनी केला.

या निवेदनाद्वारे दीपक केदार यांनी राज्य सरकारला पूरपरिस्थितीकडे गांभीर्याने लक्ष देण्याची मागणी केली आहे. ते म्हणाले की, “राजकारण करण्याची ही वेळ नाही. लोकांचे जीव वाचवणे आणि त्यांना मदत करणे ही सरकारची नैतिक आणि संवैधानिक जबाबदारी आहे. मुख्यमंत्र्यांनी राजकारणातून बाहेर पडून लोकांच्या वेदना समजून घ्याव्यात आणि तातडीने मदतीसाठी पुढे यावे.”

© 2025 मॅक्स मंथन डेली न्यूज. सर्व हक्क राखीव.

सावधान! या पाच प्रकारच्या लोकांसाठी पपई हानिकारक ठरू शकते

गरोदर महिलांपासून ते मूत्रपिंडाच्या विकारांनी त्रस्त लोकांसाठी धोक्याची घंटा; तज्ज्ञांचा सल्ला महत्त्वाचा

१९ ऑगस्ट २०२५, मॅक्स मंथन डेली न्यूज:

पुणे: पपई हे एक पौष्टिक फळ असले तरी, काही विशिष्ट आरोग्य स्थिती असलेल्या लोकांसाठी ते हानिकारक ठरू शकते. एका ताज्या अहवालानुसार, पपईमध्ये असलेले काही घटक विशिष्ट विकारांवर नकारात्मक परिणाम करू शकतात, ज्यामुळे सावधगिरी बाळगणे आवश्यक आहे.

Human Female Kidney Anatomy highlighted red on body

खालील पाच प्रकारच्या लोकांसाठी पपईचे सेवन काळजीपूर्वक करण्याचा सल्ला दिला जातो:

• गरोदर महिला: कच्च्या पपईमध्ये ‘लेटेक्स’ आणि ‘पपेन’ नावाचे घटक असतात, जे गर्भाशयाचे आकुंचन वाढवू शकतात. यामुळे अकाली प्रसूतीचा धोका वाढतो. त्यामुळे गरोदर महिलांनी पपईचे सेवन टाळावे.
• हृदयाच्या ठोक्यांचा विकार असलेले लोक: पपईमध्ये ‘सायनोजेनिक’ संयुगे असतात, जे हृदयाच्या ठोक्यांच्या विकारांना आणखी गंभीर बनवू शकतात.
• लेटेक्स ॲलर्जी असलेले लोक: लेटेक्स ॲलर्जी असलेल्यांना पपईच्या सेवनाने ॲलर्जीचा त्रास होऊ शकतो, कारण दोन्हीमध्ये सारखे प्रोटीन्स आढळतात.
• हायपोथायरॉईडीझम (Hypothyroidism) असलेले लोक: पपईमध्ये काही घटक असतात जे थायरॉईडच्या कार्यावर परिणाम करू शकतात. त्यामुळे, थायरॉईडच्या विकाराने त्रस्त असलेल्या लोकांनी पपईचे सेवन काळजीपूर्वक करावे.
• मूत्रपिंडात खडे होण्याचा धोका असलेले लोक: पपईमध्ये जास्त प्रमाणात ‘व्हिटॅमिन सी’ असते, जे शरीरात ‘ऑक्झलेट’मध्ये रूपांतरित होते. ऑक्झलेटचे प्रमाण वाढल्यास मूत्रपिंडात खडे (Kidney Stones) तयार होण्याचा धोका वाढतो.

तज्ज्ञांच्या मते, कोणत्याही आरोग्य स्थितीमध्ये पपईचे सेवन करण्यापूर्वी डॉक्टरांचा किंवा आरोग्य तज्ज्ञांचा सल्ला घेणे महत्त्वाचे आहे.

© 2025 मॅक्स मंथन डेली न्यूज. सर्व हक्क राखीव.