बटरफ्लाय पूल ठरतोय आकर्षणाचा केंद्रबिंदू; विद्युत रोषणाईच्या झगमगाटाने रात्रीच्या प्रवासाला नवा अनुभव

उच्च दर्जाचे एलईडी तंत्रज्ञान वापरून पुलावर साकारला रंगोत्सव; कमी विजेत अधिक आकर्षकपणा

पिंपरी, प्रतिनिधी शाम सोनवणे, १० सप्टेंबर २०२५, मॅक्स मंथन डेली न्यूज:

पवना नदीवरील थेरगाव ते चिंचवड दरम्यानचा ‘बटरफ्लाय पूल’ आता केवळ वाहतुकीचा दुवा राहिला नसून, शहरातील एक नवा आणि आकर्षक केंद्रबिंदू ठरला आहे. रात्रीच्या वेळी विविध रंगांच्या छटांनी उजळून निघालेला हा पूल प्रवाशांना आणि परिसरातील नागरिकांना एक वेगळाच, नेत्रसुखद अनुभव देत आहे. पिंपरी चिंचवड महापालिकेच्या विद्युत विभागाने आधुनिक एलईडी तंत्रज्ञानाचा वापर करून ही आकर्षक विद्युत रोषणाई केली आहे.

शहराच्या सौंदर्याचे प्रतीक

पिंपरी चिंचवड महापालिका शहरात आधुनिक पायाभूत सुविधा उभारण्याबरोबरच सौंदर्यपूर्ण वास्तू निर्माण करण्यावर भर देत आहे. त्यापैकीच एक असलेला हा बटरफ्लाय पूल आता शहरातील एक महत्त्वाचे आकर्षण बनला आहे. यावर केलेल्या रोषणाईमुळे रात्रीच्या वेळी पुलावरून प्रवास करणारे आणि परिसरातील अनेक नागरिक त्याची छायाचित्रे व व्हिडिओ काढत आहेत, ज्यामुळे हा पूल आता वाहतुकीपलीकडे जाऊन पर्यटनाचे एक ठिकाण बनला आहे.

याबद्दल बोलताना महापालिका आयुक्त तथा प्रशासक शेखर सिंह म्हणाले, “बटरफ्लाय पूल हा केवळ थेरगाव आणि चिंचवडला जोडणारा दुवा नसून, तो पिंपरी चिंचवड शहराच्या आधुनिक आणि सौंदर्यपूर्ण ओळखीचे प्रतीक आहे. या पुलावरील आकर्षक रोषणाईमुळे नागरिकांना एक नवा अनुभव मिळत असून, त्याचे सौंदर्य जपणे ही आपली सर्वांची सामूहिक जबाबदारी आहे.”

तंत्रज्ञानाचा अनोखा संगम

या रोषणाईसाठी उच्च दर्जाचे एलईडी लिनिअर वॉश लाईट्स (IP65) वापरण्यात आले आहेत, ज्यांना ५१२ डीएमएक्स पॉवरसह आरजीबी तंत्रज्ञानाची जोड दिली आहे. यामुळे पुलावरील रोषणाई विविध रंगांच्या छटा निर्माण करून प्रत्येक क्षणी वेगळेच दृश्य साकारते.

या तंत्रज्ञानाबद्दल अधिक माहिती देताना सहशहर अभियंता अनिल भालसाकळे म्हणाले, “बटरफ्लाय पुलावर फसाड पद्धतीची विद्युत रोषणाई केली आहे, ज्यामुळे केवळ २२ किलोवॅट एवढीच वीज खर्ची पडते. अशाच पद्धतीने शहरात इतर पुलांवरही आकर्षक रोषणाई करण्याचे नियोजन आहे.” यापूर्वीच चिंचवड येथील मदर तेरेसा उड्डाणपूल आणि नाशिक फाटा येथील जे. आर. डी. टाटा उड्डाणपुलावरही अशाच प्रकारची रोषणाई करण्यात आली असून, भक्तीशक्ती येथील उड्डाणपुलावरील काम प्रगतीपथावर आहे.

© 2025 मॅक्स मंथन डेली न्यूज. सर्व हक्क राखीव.