शिवरायांच्या प्रतिमेची विटंबना: मुख्यमंत्री देवेंद्र फडणवीस यांच्या पोस्टर्सवरून नवा वाद
पिंपरी-चिंचवड, प्रतिनिधी शाम सोनवणे १६ सप्टेंबर २०२५, मॅक्स मंथन डेली न्यूज:
पिंपरी-चिंचवड शहरात छत्रपती शिवाजी महाराज आणि मुख्यमंत्री देवेंद्र फडणवीस यांच्या प्रतिमेच्या पोस्टरवरून एक नवा वाद निर्माण झाला आहे. शहरातील भुयारी मार्ग आणि उड्डाणपुलांच्या भिंतींवर लावण्यात आलेल्या या पोस्टरमुळे दोन्ही महापुरुषांची आणि घटनात्मक पदाची विटंबना होत असल्याचा आरोप सामाजिक कार्यकर्ते मारुती साहेबराव भापकर यांनी केला आहे. या संदर्भात त्यांनी पोलीस आयुक्त आणि महापालिका आयुक्त यांना पत्र देऊन तातडीने चौकशी व कारवाई करण्याची मागणी केली आहे.
‘देव भाऊ’ जाहिरातीवरून वाद
राज्यात “देव भाऊ” या नावाने छत्रपती शिवाजी महाराजांच्या सिंहासनासमोर मुख्यमंत्री देवेंद्र फडणवीस अभिवादन करतानाचे पोस्टर विविध माध्यमांवर प्रसिद्ध झाले होते. याच जाहिरातीचे लोण पिंपरी-चिंचवड शहरात पोहोचले असून, काही ठिकाणी हे पोस्टर सार्वजनिक भिंतींवर लावण्यात आले आहेत. भापकर यांच्या म्हणण्यानुसार, हे पोस्टर अशा ठिकाणी लावले आहेत की रस्त्यावरून जाणाऱ्या वाहनांमुळे त्यावर चिखल उडत आहे, ज्यामुळे छत्रपती शिवाजी महाराज आणि मुख्यमंत्र्यांच्या प्रतिमेचा अपमान होत आहे.
सीसीटीव्ही तपासून कारवाईची मागणी
या कृतीमागे काही राजकीय स्वार्थ असल्याचा संशय भापकर यांनी व्यक्त केला आहे. त्यांनी दोन्ही आयुक्तांना विनंती केली आहे की, ज्या ठिकाणी असे बॅनर किंवा पोस्टर्स लावले आहेत, ते तातडीने काढून टाकावे. तसेच, या भागांतील सीसीटीव्ही फुटेज तपासून बॅनर लावणारे कोण आहेत, त्यांचा उद्देश काय आहे, याचा तपास करून संबंधित समाजकंटकांवर कठोर कारवाई करावी, अशी मागणी त्यांनी केली आहे.
© 2025 मॅक्स मंथन डेली न्यूज. सर्व हक्क राखीव.
