गेब्र. फिफरकडून इस्कॉन अन्नामृतला अन्न वितरणासाठी २ वाहने
याद्वारे ५ हजार विद्यार्थ्यांना मिळणार मोफत पौष्टिक आहार
पिंपरी, प्रतिनिधी शाम सोनवणे, २५ सप्टेंबर २०२५, मॅक्स मंथन डेली न्यूज:
गेब्र. फिफर इंडिया प्रा. लि. या कंपनीने आपल्या सामाजिक उत्तरदायित्व (CSR) उपक्रमांतर्गत इस्कॉनच्या ‘अन्नमृत फाउंडेशन’ला दोन अन्न वितरण वाहने प्रदान केली आहेत. या वाहनांमुळे आता शहरातील ५ हजार गरजूंना, विशेषतः विद्यार्थ्यांना, ताजे आणि पौष्टिक भोजन उपलब्ध होणार आहे.
बधालवाडी (नवलाखउंब्रे, ता. मावळ) येथे एका विशेष समारंभात या वाहनांना हिरवा झेंडा दाखवून त्यांचे उद्घाटन करण्यात आले. यावेळी गेब्र. फिफरचे उपाध्यक्ष डॉ. एडवर्ड कुलेनकॅम्प, व्यवस्थापकीय संचालक ज्ञानेश वांजळे यांच्यासह अनेक मान्यवर उपस्थित होते. ‘अन्नमृत फाउंडेशन’च्या वतीने उपाध्यक्ष संजय टिक्कू यांनी या वाहनांची चावी स्वीकारली.
पौष्टिक आहारामुळे शिक्षणाला मिळणार बळ
या उपक्रमाची सुरुवात म्हणून, बधालवाडी येथील जिल्हा परिषदेच्या शाळेतील १७० विद्यार्थ्यांना पौष्टिक आहाराचे वितरण करण्यात आले. गेब्र. फिफर कंपनीकडून या शैक्षणिक वर्षापासूनच एक हजार मुलांना शालेय भोजन पुरवले जात आहे.
या वेळी बोलताना डॉ. एडवर्ड कुलेनकॅम्प म्हणाले, “या अन्न वितरण वाहनांमुळे ५ हजार लाभार्थ्यांना गरम आणि पौष्टिक अन्न मिळेल. पौष्टिक आहारामुळे मुलांचे आरोग्य सुधारेल आणि त्यांना शिक्षणावर लक्ष केंद्रित करण्यास मदत होईल.”
कंपनीचे एमडी ज्ञानेश वांजळे यांनी या उपक्रमाचा भाग झाल्याचा आनंद व्यक्त केला. “केवळ व्यवसायापुरते मर्यादित न राहता समाजाला काहीतरी परत देण्याची ही आमची जबाबदारी आहे. यातून मुलांच्या जीवनात सकारात्मक बदल घडवण्याचा आमचा प्रयत्न आहे,” असेही ते म्हणाले.
अन्नमृत फाउंडेशनचे उपाध्यक्ष संजय टिक्कू यांनी गेब्र. फिफर कंपनीच्या पाठिंब्याबद्दल कृतज्ञता व्यक्त केली. या सहकार्यामुळे आता अधिक गरजू मुलांपर्यंत पोहोचणे शक्य होईल आणि या माध्यान्ह भोजनाचा मुलांच्या आरोग्य आणि विकासावर दीर्घकाळ सकारात्मक परिणाम होईल, असा विश्वास त्यांनी व्यक्त केला.
© 2025 मॅक्स मंथन डेली न्यूज. सर्व हक्क राखीव.
